މާލޭ ރައްޔިތުންނަށް ފެނާއި ނަރުދަމާގެ ހިދުމަތް ފޯރުކޮށްދިނުމަށް 1995 ވަނަ އަހަރުގެ އޭޕްރީލު މަހުގެ އެއްވަނަ ދުވަހު ދިވެހި ސަރުކާރުން ވުޖޫދަށް ގެނައި މާލޭ ވޯޓާ އެންޑް ސްވެރޭޖް ކޮމްޕެނީ ޕްރައިވެޓް ލިމިޓެޑަށް މިއަދު 30 އަހަރު ފުރުނުއިރު، އެ ކުންފުނިން އެ މުއްދަތުގައި ބޮޑެތި ކާމިޔާބުތަކެއް ހޯދާފައިވެއެވެ. އަދި މިހާރު އެ ކުންފުނި ތައްޔާރުވަމުންދަނީ އެ ކުންފުނީގެ ތާރީހުގައި މުޅިން އައު މަރުހަލާއަކަށް ދިއުމަށެވެ. 

އެންމެ ފުރަތަމަ އެ ކުންފުނިން އުފެދުނީ އެންމެ 60 މުވައްޒަަފުންނާއެކު އެވެ. ކުންފުނީގެ ހަމައެކަނި ޒިންމާއަކީ އެއިރު 60،000 މީހުންގެ އާބާދީއެއް އޮތް މާލެއަށް ހިދުމަތް ދިނުމެވެ. ނަމަަވެސް ޒަމާނާއެކު ކުންފުންޏަށް އައި ބަދަލުތަކާއެކު މިހާރު އެމްޑަބްލިއުއެސްސީން އަންނަނީ މާލޭގެ އިތުރަށް ވިލިމާލެއާއި ހުޅުމާލެއާއި ގުޅިފަޅައި، ތިލަފުއްޓާއި، ކ.މާފުއްޓާއި، ރ.ދުވާފަރާއި، ހދ.ކުޅުދުއްފުށީގައި ފެނާއި ނަރުދަމާ ޚިދުމަތް ދެމުންނެވެ. 

އެ ކުންފުނިން ބުނެފައިވާ ގޮތުން މިހާރު ރާއްޖޭގެ އާބާދީގެ ދެބައިކުޅަ އެއްބައާ ގާތްކުރާ އަދަދެއްގެ މީހުންނަށް ފެނާއި ނަރުދަމާގެ ހިދުމަތް އެ ކުންފުނިން ފޯރުކޮށްދެމުންދެއެވެ. އެއީ ދެ ލައްކަ މީހުންނަށެވެ. ރ. ދުވާފަރުގައި ފެނާއި ނަރުދަމާގެ ހިދުމަތުގެ އިތުރަށް، އެ ރަށުގައި ކަރަންޓާއި ކުނި މެނޭޖުކުރުމާއި، މަސްވެރިންނަށް އައިސް ފޯރުކޮށްދިނުމުގެ ހިދުމަތް އެ ކުންފުނިން ފޯރުކޮށްދެމުންދެއެވެ. 

ފަންނީ މަސައްކަތްތަކެއް ކުރާ އެމްޑަބްލިއުއެސްސީ އުފެދިގެންއައިއިރު އެ ކުންފުނީގެ މެނޭޖުމެންޓުގައި ތިއްބެވީ ޑެންމާކު ބޭފުޅުންތަކެކެވެ. ނަމަވެސް މިހާރު ކުންފުނީގެ މެނޭޖުމެންޓަކީ ސައްތައިން ސައްތަ ދިވެހިންގެ ޓީމެކެވެ. ކުންފުނީގައި 1،013 މުވައްޒަފުން މިއަދު އެބަތިއްބެވެ. ކުންފުނިން މި ފާއިތުވި މުއްދަތުގައި އެންމެ ބޮޑު އިސްކަމެއްދިން އެއް ކަމަަކީ މުވައްޒަފުންގެ ގާބިލުކަން އިތުރުކުރުމެވެ. 

ކުންފުނިން ދޭ ހިދުމަތްތަކުގެ ފެންވަރު މަތިކުރުމަށް ކުންފުނީގެ ގާބިލުކަން އިތުރުކުރަން އެކި މަރުހަލާގައި ގިނަ މަސައްކަތްތައް ކޮށްފައިވެއެވެ. އެގޮތުން 1995 ވަނަ އަހަރު ކުންފުނި އުފެދިގެން އައި އިރު ފެން އުފެއްދުމުގެ ޤާބިލްކަން ހުރީ ދުވާލަކު 900 ކޮޑި މީޓަރު  އަދި  ފެން ރައްކާކުރެވޭ މިންވަރު ހުރީ 10,000 ކޮޑި މީޓަރު ކަމުގައި ވީނަމަވެސް، މިއަދު ދުވާލަކު 47,300  ކޮޑި މީޓަރުގެ ފެން އުފެއްދުމުގެ އަދި 44,858 ކޮޑި މީޓަރުގެ ފެން ރައްކާ ކުރުމުގެ ޤާބިލްކަން ވަނީ ހޯދާފައެވެ.

ފެނުގެ ރައްކާތެރިކަމާއި ފެން ލިބުމުގެ ކަށަވަރުކަން ގާއިމުކުރުމަކީ އެމްޑަބްލިއުއެސްސީން ބުނާ ގޮތުން އެކުންފުނީގެ އެންމެ ބޮޑު އަމާޒެވެ. އެ އަމާޒަށް ވާސިލުވުމަށް ފެން އުފައްދާ މައި މަރުކަޒުގެ އިތުރަށް މާލޭގެ ދެ ސަރަހައްދެއްގައި ފެން އުފައްދާ މަރުކަޒުތައް ގާއިމުކޮށް ފެން އުފެއްދުން ލާމަރުކަޒުކޮށްފައިވެއެވެ. 

މިހާރުވެސް ފެން އުފެއްދުމާއި ރައްކާކުރުމުގެ ގާބިލުކަން އިތުރުކުރުމަށް އެ ކުންފުނިން އަންނަނީ މަސައްކަތްތަކެއް ކުރަމުންނެވެ. އެގޮތުން 2025 ވަނަ އަހަރު ނިމޭއިރު ފެން އުފެއްދުމުގެ ކެޕޭސިޓީ %26 އަދި ފެން ރައްކާކުރެވޭ މިންވަރު %28 އަށް އިތުރުކުރެވިގެން ދާނެއެވެ. މީގެ އިތުރުން، މާލެ އާއި ހުޅުމާލޭގެ ފެނުގެ ވިޔުގަ ގުޅާލުމަށް ސިނަމާލެ ބްރިޖްމެދުވެރިކޮށް އަޅާފައިވާ ފެނުގެ މައި ވިއުގަ ޑިސްއިންފެކްޓް ކުރުމާއި، ޕްރެޝަރ ޓެސްޓް ކުރުމުގެ މަސައްކަތް ވަނީ ނިމިފައެވެ. އަދި މާލެއާއި ހުޅުމާލޭގެ ޓްރާންސްފަރ ޕަމްޕް ސްޓޭޝަން ޤާއިމްކުރުމުގެ މަސައްކަތުގެ ބޮޑުބައެއްވެސް މިހާރުވަނީ ނިމިފައެވެ. މުޅި މަޝްރޫޢު ނިންމާލައި، ހުޅުމާލެ އާއި މާލޭގެ ފެނުގެ ވިޔުގަ ގުޅާލައި ޚިދުމަތަށް ގެނައުމަށް ތާވަލު ކުރެވިފައިވަނީ 2025 ވަނަ އަހަރުގެ ފަހުކޮޅުގައެވެ. މި މަޝްރޫޢު ނިމުމުން، ބޭނުންވެއްޖެ ހާލަތެއްގައި، މާލެއިން ހުޅުމާލެއަށް ނުވަތަ ހުޅުމާލެއިން މާލެއަށް، ގަޑިއަކު 800 ޓަނުގެ ފެން ޕަންޕުކުރުމުގެ ގާބިލްކަން ލިބިގެންދާނެއެވެ.

ފެން ކުންފުންޏަށް 30 އަހަރު ފުރުނުއިރު، މިއަދު އެމް.ޑަބްލިޔު.އެސް.ސީ އަކީ އިންޖީނިއަރިންގ، ޓްރޭޑިންގ އަދި މެނުފެކްޗަރިންގް ގެ ދާއިރާއިންވެސް ފާހަގަކޮށްލެވޭ ކުންފުންޏެކެވެ. ފެނާއި ނަރުދަމާ ނިޒާމު ފަރުމާކުރުމާއި، ޤާއިމްކުރުމާއި، އޮޕަރޭޓް ކުރުމާއި، އަދި ފެން ޕްލާންޓް އަމިއްލައަށް ޑިޒައިންކޮށް ފެބްރިކޭޓް ކުރުމުގެ މަސައްކަތްވެސް މިއަދު އެމް.ޑަބްލިޔު.އެސް.ސީ އިން އަންނަނީ ކުރަމުންނެވެ. އަދި އެމް.ޑަބްލިއު.އެސް.ސީ ޝޯރޫމުން އަންނަނީ ފެނާ ނަރުދާމާގެ ނިޒާމާ ގުޅުންހުރި، ދުނިޔޭގެ މަޝްހޫރު ބްރޭންޑްތަކުގެ ތަކެތި ކަސްޓަމަރުންނަށް ފޯރުކޮށްދެމުންނެވެ. އަދި މި ކުންފުނީގެ އައި.އެސް.އޯ 17025: 2005 ސްޓޭންޑަރޑުގެ ލެބޯރެޓަރީ އިން ދަނީ، ރިޒޯޓުތަކާ، ފަންނީ ކޮންސަލްޓަންޓުން ފަދަ ފަރާތްތަކަށް، ވިޔަފާރީގެ އުސޫލުން ފެން ތަހުލީލު ކުރުމުގެ ޚިދުމަތްވެސް ފޯރުކޮށްދެމުންނެވެ.

ދިވެހިންގެ ފެން ކުންފުންޏަށް 30 އަހަރު ފުރި 31 ވަނަ އަހަރު ފެށިގެންދިޔައިރު ކުންފުނި އޮތީ ކުންފުނީގެ ގާބިލުކަން އިތުރުކުރުމުގެ އައު މަރުހަލާއަކަަށް ބަލަބަލައެވެ. ކުންފުނީގެ މުސްތަގުބަލު ފެންނަނީ ވަރަށް އުޖާލާކޮށެވެ.