ކުޅުދުއްފުށި ސިޓީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ފަރާތުން އިންތިޒާމުކޮށްގެން ބޭއްވި ކަނބަލުންގެ މަސްރޭހުން އެއްވަނަ ކެއްނުލަވާ ޓީމު ހޯދައިފިއެވެ. އެކި އުމުރުފުރާގެ ކަނބަލުންގެ، ޖުމްލަ 16 ޓީމު މުބާރާތުގައި ބައިވެރިވެފައިވެއެވެ.

މަސްރޭހުގެ ނަތީޖާ ފާޅުކުރުމަށްޓަކާ، މަސްކިރުމުގެ މަސައްކަތުގެ ތެރެެއިން--ފޮޓޯ:ކުޅުދުއްފުށި ސިޓީ ޑަބްލިއުޑީސީ

ފިތުރު އީދު ދުވަހުގެ ހަވީރު ހަތަރަކުން، ރޭގަނޑު ނުވައެއް ޖަހަންދެން ކުރިޔަށްދިޔަ މި މިމަސްރޭހުގެ އެއްވަނަ ކެއްނުލަވާ ޓީމު ހޯދީ 174.75 ކިލޯގެ މަސްބާނައިގެންނެވެ. ދެވަނައަށްދިޔަ ޓީމު "ގިޔޮޅު" 149.10 ކިލޯގެ މަސްބޭނިއިރު، ތިންވަނައަށްދިޔަ ޓީމު "ޝަރަފް" އަށް ބޭނިފައިވަނީ 98.2 ކިލޯ މަހެވެ.

މަސްރޭހުގެ ނަތީޖާ ފާޅުކުރުން ކުރިޔަށް ގެންގޮސްފައިވަނީ ވަރަށް ފޯރިގަދަކޮށެވެ. އެގޮތުން ޓީމުތައް މަސްބާނައިގެން ލަފަން ހަމަޖެހިފައިވާ ސަރަހައްދުގައި ރޭގަނޑު 20:30 އިން 23:30 އަށް ސަގާފީ ބޮޑުބެރުގެ ހަރަކާތްތައް ކުރިޔަށްދިޔައެވެ.

ނަތީޖާ ފާޅުކުރި ސަރަހައްދުގައި ފޯރިގަދަ ބޮޑުބެރުގެ ހަރަކާތްތައް ކުރިޔަށްދިޔަ--ފޮޓޯ:ކުޅުދުއްފުށި ސިޓީ ޑަބްލިއުޑީސީ

ބަނދަރުމަތީގައި ބޭއްވުނު ނަތީޖާ ފާޅުކުރުމުގެ ހަފްލާގައި، ވަނަވަނައަށް ދިޔަ ޓީމުތަކުގެ އިތުރުން، ހާއްސަ މަގާމުތަކަށް ހޮވުނު ބައިވެރިންނަށްވެސް އިނާމު ދިނެވެ. އެންމެ މޮޅު ކެޔޮޅުގެ މަގާމު 41 މަސް ބާނައިގެން ހޯދައިފައިވަނީ ޓީމު "ގިޔޮޅު" ގެ ލުބްނާ ހަސަންއެވެ. އެންމެ ބަރުމަސް ބޭނި ފަރާތަކަށް ހޮވިފައިވަނީ، 6.6 ކިލޯގެ މަހެއް ބާނައިގެން "ޝަރަފް" ޓީމުގެ ޝާހިދާ މުހައްމަދު އެވެ. މަސްރޭހުގެ އެންމެ މޮޅު ޒުވާން ބައިވެރިޔާ އަދި ދޮށީއުމުރުގެ ބައިވެރިޔާގެ މަގާމުވެސް ހޮވާފައިވެއެވެ. އުމުރުން 15 އަހަރުގެ އައިޝަތު އިޝާ އަޝްރަފް، އެންމެ ޒުވާން މަސްވެރިޔާގެ މަގާމު ހޯދާފައިވަނީ 13 މަސް ބާނައިގެންނެވެ. އަދި ދޮށީއުމުރުގެ ބައިން އެންމެ ކުޅަދާނަ މަސްވެރިޔަކަށް ހޮވިފައިވަނީ އުމުރުން 69 އަހަރުގެ "ރެހެންދި" ޓީމުގެ އާމިނަތު އަލީ އެވެ.

މަސްރޭހުގެ އެއްވަނަ ޓީމަށް މެޑަލް، ޓްރޮފީ އަދި އިނާމު ހަވާލު ކޮށްދެއްވީ، ކުޅުދުއްފުށި ސިޓީ ކައުންސިލުގެ މޭޔަރު މުހައްމަދު އާތިފް އެވެ. އިތުރު ވަނަތަކަށް ހޮވުނު ބައިވެރިންނަށް އިނާމު ހަވާލު ކޮށްދެއްވީ ސިޓީ ކައުންސިލުގެ މެމްބަރުން އަދި ކުޅުދުއްފުށި ސިޓީ ޑަބްލިއުޑީސީގެ މެމްބަރުންނެވެ.

ވަނަތަކަށް ހޮވުނު ބައިބެރިން--ފޮޓޯ:ކުޅުދުއްފުށި ސިޓީ ޑަބްލިއުޑީސީ

އަންހެނުންގެ ދުވަހުގެ މުނާސަބަތުގައި ބާއްވަން ރޭވުނު މި މުބާރާތް، މިފަހަރު އެދުވަހު ނުބޭއްވުނީ ރަމަޟާން މަހާ ދިމާވުމުންކަމަށް ކުޅުދުއްފުށި ސިޓީ ޑަބްލިއުޑީސީން މައުލޫމާތު ދީފައިވެއެވެ. އަދި އަންނަ އަހަރުގެ މަސްރޭސް، މިފަހަަރުގެ ރޭހަށްވުރެ ހުރިހާ ގޮތަކުންވެސް ފުރިހަމަޔަށް ބޭއްވުމަކީ އެފަރާތުގެ އަމާޒެއްކަމަށްވެސް ފާހަގަ ކޮށްފައިވެއެވެ.