އއ. ރަސްދޫގައި ހިނގި އަލިފާނުގެ ހާދިސާގައި ފިހުނު ދެމީހުންގެ ތެރެއިން އަންހެންމިހާ މިރޭ ނިޔާވެއްޖެއެވެ. އުމުރުން 31 އަހަރުގެ މި އަންހެންމީހާ ނިޔާވެފައިވަނީ އައިޖީއެމްއެޗްގެ އައިސީޔޫގައި، ވެންޓިލޭޓަރުގައި ފަރުވާދެމުންދަނިކޮށެވެ.

އައިޖީއެމްއެޗްއިން މައުލޫމާތުދޭގޮތުގައި އަންހެންމީހާ ނިޔާވީ މިރޭ 07:17 ހާއިރުގައެވެ. ނިޔާވިއިރު އަންހެންމީހާގެ ހަށިގަނޑުގެ %83 ފިހިފައިވާކަމަށް ހޮސްޕިޓަލުން ހާމަކޮށްފައިވެއެވެ.

މިހާދިސާގައި ފިހުނު ފިރިހެން މިހާއަށްވެސް ފަރުވާދެމުންދަނީ  އައިޖީއެމްއެޗްގެ އައިސީޔޫގައި ވެންޓިލޭޓަރުގައެވެ. ފިރިހެންމީހާގެ ހަށިގަނޑުގެ %78 ފިހިފައިވާކަމަށް ހޮސްޕިޓަލުން މީގެ ކުރިން މައުލޫމާތު ދީފައިވެއެވެ.

އަންހެންމިހާ ނިޔާވިއިރު، މިދިޔަ ހުކުރު ދުވަހު ރާއްޖެއިން ބޭރުގެ "ބާން އެކްސްޕާޓުން" ގެ ޓީމެއް އައިސް، ފިހުނު ދެމީހުންނަށް ފަރުވާދޭންފެށިއެވެ.

އަލިފާން ރޯވެފައިވަނީ މި ދެމީހުން ދިރިއުޅެމުންދިޔަ ކޮޓަރީގައެވެ. ހާދިސާ ހިނގަން މެދުވެރިވި ސަބަބު އަދިވެސް ހޯދިފައިނުވާއިރު، ފުލުންދަނީ މި ހާދިސާ ތަހުގީގުކުރަމުންނެވެ.