ފާއިތުވެދިއަ ރަމަޟާން މަހު ނައިފަރުގެ މިސްކިތްތަކުގައި ފޫހިކަމެއް، ވަރުބަލިކަމެއް ނެތި އިމާމްވެ ދަމުނަމާދާއި ތަރާވީހް ނަމާދު ކުރި މަދަރުސަތުލް އިފްތިތާހުގައި ކިޔަވަމުން ދާ 11 ދަރިވަރުން ކުރި މަސައްކަތުގެ އަގުވަޒަން ކޮށްފިއެވެ. 

އެކުދިންގެ އަގުވަޒަން ކުރި 'ދޯކާ އެފްސީ' އިން ބުނީ އިމާމްވެ ދަމުނަމާދު ކޮށްދިން ދަރިވަރުންނަށް ފައިސާގެ އިނާމާ ހަނދާނީ ފިލާ އަދި އިމާމްވެ ތަރާވީހް ނަމާދު ކޮށްދިން ދަރިވަރުންނަށް ހަނދާނީ ފިލާ ހަވާލު ކޮށްފައިވާ ކަމަށެވެ. 

އެ ޖަމުއިއްޔާ އިން ބުނީ އެ ދަރިވަރުންނަށް މި ފުރުސަތު ފަހި ކޮށްދެއްވާފައިވާތީ ފާދިއްޕޮޅު ނައިފަރު ކައުންސިލަށް ވަރަށް އިޚުލާސްތެރި ކަމާއެކު ޝުކުރު އަދާކުރާ ކަމަށެވެ. އަދި މިފަދަ ކޮންމެ ކަމެއްގައި 'ދޯކާ އެފްސީ' މެންބަރުންގެ ފަރާތުން ލިބިގެންދާ އެހީތެރިކަމާ އެއްބާރުލުމަށް އެ ފަރާތްތަކަށް ވެސް އެ ކްލަބުން ޝުކުރު އަދާކޮށްފައިވެއެވެ.

މިފަދަ ހުނަރުވެރި ކުދިންނަށް ފުރުސަތުތައް ފަހިވެގެން ދިޔުމަކީ 'ދޯކާ އެފްސީ' ގެ ފަރާތުން ނުހަނު އުފާ ކުރާ ކަމެއް ކަމަށާ މިއީ މި ކްލަބުގެ ފަރާތުން މިކަން ފާހަގަކުރަމުން ގެންދާ ފަސް ވަނަ އަހަރުކަން އުފަލާއެކު ފާހަގަކުރާ ކަމަށް ވެސް ބުނެފައިވެއެވެ.

ޤުރުއާނަށް އަހުލުވެރި ދީނީ ކަންތައްތަކަށް ލޯބިކުރާކުދިން މުޖުތަމައުއަށް ނެރުމަށްޓަކައި އާއިލާތަކުން ކުރަމުން ގެންދާ ބުރަ މަސައްކަތް ފާހަގަކޮށް އެންމެހާ ބެލެނިވެރިންނަށް ވެސް 'ދޯކާ އެފްސީ' އިން ވަނީ ޝުކުރުއަދާކޮށްފައެވެ. 

އިމާމްވެ ތަރާވީހް ނަމާދު ކުރި ކުދިން:

1. އަލް ހާފިޒް ޒާލިފް މަދީހް

2. އަލް ހާފިޒް އަބްދުﷲ ޒަކްވާން މުހައްމަދު ރިކްޒާން

3. އަލް ހާފިޒް އަބދުﷲ ހަޔާން ހަމީޒް

4. އަލް ހާފިޒް އާސިރް އާރިފް ޔޫސުފް

5. އަލް ހާފިޒް އާރިޝް އަބްދުﷲ އިބްރާހިމް

އިމާމްވެ ދަމު ނަމާދު ކުރި ކުދިން:

1. ޔޫސުފް ޒަކްނޫން މުހައްމަދު ޖުނައިދް

2. އިބްރާހިމް މިޒާން އާދަމް

3. މިރުއާޝް ހުސައިން މިރްޒާ

4. މުހައްމަދު ޔާޒިން ޔާސިރް

ބަދަލުގައި އިމާމްވެ ދަމުނަމާދު ކުރި ކުދިން:

1. އިސްމާއިލް އަޝްހަމް މުހައްމަދް

2. މުހައްމަދު ހާދިން ސައުދުﷲ