ފިތުރު އީދު ފާހަގަ ކުރުމުގެ ގޮތުން އެޗްޑީސީގެ ފަރާތުން ހުޅުމާލެ ސެންޓްރަލް ޕާކުގައި ހަވާއެރުވުމާއެކު، ޑްރޯން ޝޯއެއް ބާއްވައިފިއެވެ.

ގާތްގަނޑަކަށް ސާޅީހަކަށް މިނެޓަށް ކުރިޔަށް ގެންދިޔަ މި ހަރަކާތްތަކުގައި  އެންެމެ ފުރަތަމަ ހަވާއެރުވުން ކުރިޔަށް ގެންގޮސްފައިވާއިރު، އޭގެ ފަހުން ވަރަށް ފުރިހަމަ ޑްރޯން ޝޯއެއް ވަނީ ދައްކާލާފައެވެ.

ރޭގައި ބޭއްވުނު ހަވާއެރުވުމާއި ޑްރޯންޝޯ ބަލާލުމަށް ރެކޯޑް އަދަދެއްގެ މީހުން ހުޅުމާލެ ސެންޓްރަލް ޕާކަށް ޖަމާވެފައިވެއެވެ. ހުޅުމާލެ ސެންޓްރަލް ޕާކު ސަރަހައްދުގައި މީހުން ތޮއްޖެހުމުގެ ސަބަބުން ބަަހުގެ ޚިދުމަތް ވެސް މެދުކަނޑާލަން ޖެހުނެވެ.

ގިނަ ބަޔަކަށް އެންމެ ކަމުދާ ކަމަށް ފާހަގަކޮށްފައިވަނީ ރޭގެ ބޭއްވުނު ޑްރޯން ޝޯއެވެ. އީދާއި ގުޅޭ ބައެއް މަންޒަރުތަކުގެ އިތުރުން، މި ޝޯގައި ދިވެހީންގެ އިސްލާމީވަންތަކަމާއި ސަގާފަތް ރަމްޒުކޮށްދޭ ބައެއް މަންޒަރުތައްވެސް ފެނިގެން ދިޔައެވެ. ޑްރޯން ޝޯގައި ހިތެއްގެ ބައްޓަމަށް ދައްކާލި ފަލަސްތީނުގެ ދިދަޔަށް ވަރަށް ގިނަބަޔެއްގެ ސަމާލުކަން ލިބުނެވެ.

ފިތުރު އީދުގެ މުނާސަބަތުގައި އިއްޔެ ހަވީރު، އެޗްޑީސީ އަދި މަންފާ ޖަމިއްޔާ ގުޅިގެން "އީދު ފެސްޓިވަލް" ގެ ނަމުގައި ކުޑަކުދިންގެ ހަވީރެއް ވެސް ބާއްވާފައިވެއެވެ. ކުޑަކުދިން ޝައުގުވެރިވާނެ ގިނަ ހަރަކާތްތަކާއެކު މި ފެސްޓިވަލް ވެސް ކުރިޔަށް ގެންގޮސްފައި ވަނީ ހުޅުމާލެ ސެންޓްރަލް ޕާކުގައެެވެ.

ހުޅުމާލޭގެ އިތުރުން މާލޭގައި ވެސް، ފިތުރު އީދުގެ މުނާސަބާތުގައި ގިނަ ހަރަކާތްތަކެއް ބޭއްްވުނެވެ. އެގޮތުން ވަކިން ޚާއްސަކޮށް ތަފާތު ސްޓޯލްތަކާ އެކު، ސަލްޓަން ޕާކު އަދި ޖުމްހޫރީ މައިދާނުގައި ބޭއްވުނު "އީދު ހަވީރު" ފާހަގަކޮށްލެވެއެވެ. މި ހަރަކާތަށް ރައްޔިތުންގެ ފަރާތުން ލިބުނު އާދަޔާ ޚިލާފު ތަރުހީބުގެ ސަބަބުން މިއަދު ވެސް މި ހަރަކާތް ވަނީ ކުރިއަށް ގެންގޮސްފައެވެ. އަދި މާދަމާ ވެސް "އީދު ހަވީރު" ކުރިޔަށްގެންދަން ސަރުކާރުން ވަނީ ނިންމައިފައެވެ.

ގިނަ ބަޔަކު ފާހާގަކުރާ ގޮތުގައި، މި އަހަރުގެ ފިތުރު އީދަކީ ފަހުގެ ތާރީޚެއްގައި، ޚާއްސަކޮށް މާލެ ސަރަހައްދުގައި ދިރިއުޅޭ ރައްޔިތުންނަށް، އާއިލާއާއެކު ހިތްހަމަޖެހިލައިގެން ފިތުރު އީދު ފާހަގަކުރުމުގެ ފުރުސަތު އެންމެ ފުރިހަމައަށް ލިބުނު އީދެވެ.