މި ފަހަރުގެ ފިތުރު ޢީދުގެ ކަންކަން ކިހިނެއްތޯ މީހެއްގެ ކައިރީ އަހައިފި ނަމަ އެއްވެސް އަޅައިގަތުމެއް ނެތި ވަރަށް ފަސޭހައިން، ވަރަށް ރަނގަޅޭ ބުނާނެ އެވެ. މިއީ ދެމީހެއްގެ ދެމެދުގައި ބަހުސަކަށް ވާނެ ކަމެއް ނޫނެވެ. އީދަކީ ހަމަ ކޮންމެ މުސްލިމަކަށް ވެސް އަންނަ އުފާވެރި ދުވަހަކަށް ވާއިރު މިއީ އެންމެންގެ އީދަކަށް ހަދައި ވީހާވެސް ގިނަ ބަޔަކު އީދު އުފަލުގައި ބައިވެރިކުރަން ސަރުކާރުން ވެސް ދިޔައީ ދުރާލާ ރާވައިގެން ކަންކަން އިންތިޒާމްކުރަމުންނެވެ. ރަށްރަށުގެ ކައުންސިލްތަކާއި ޖަމިއްޔާ ޖަމާއަތްތަކުން ދިޔައީ އެބަޔަކަށްވީ އެންމެ ފުރިހަމައަށް އީދު ފާހަގަކުރަން ކަންކަން ކުރަމުންނެވެ. 

 އީދު ބޮކިފަތިތަކުގެ ހިތްގައިމުކަން

އީދާ ދިމާކޮަށް މުޅި މާލެ އާއި އަތޮޅު ތެރޭގެ ބައެއްް ރަށްތައް ދިއްލާލުމަކީ އީދުގެ އުފާވެރި އިހްސާސްތައް ވަރަށް ބޮޑަށް ގެނުވާ ކަމެކެވެ. އެންމެ ބޮޑު އާބާދީއެއް ދިރިއުޅޭ މި ފުރަމާލޭގައި ދިއްލާފައިވާ ހިތްގައިމު މަންޒަރު ޒުވާނުންގެ ސްނެޕް ޗެޓްތަކުން ފުރާލި އެވެ. ރީނދޫ ކުލައިން ދިއްލިފައިވާ ހަނދުފަޅިމަތީ އިށީންދެ ކުޑަކުދިންނާއި އާއިލާތައް ނަގާފައިވާ ފޮޓޯތަކާއި ވީޑިއޯތަކުން ކޮންމެ މީހެއްގެ ހިތްތަކަށް ލިބުނު އުފާވެރިކަން ފެނެ އެވެ. ކުލަ އަލިތަކުން ޖަރީވެފައިވާ މާތައް ހިމެނޭ މަގުތަކުން ދުއްވާފައިދާއިރު "އީދު އައީ ހިނިތުންވަމުން، މާމަލުގައި ނަލަ ކުލަ ޖައްސަމުންނޭ" ބުނެ އަބްދުﷲ ސޯދިގު (ސޯދުބެ) ހައްދަވާފައިވާ ޅެން ސިނކުޑީގައި އެނބުރިގަނެ އެވެ. އީދު ވިލޭރެއިން ފެށިގެން ދިއްލާލި ހިތްގަމުކަން ވެގެން ދިޔައީ އީދެއް އައިސްފިކަމުގެ ފުރަތަމަ ސިގުނަލަށެވެ. 

 އީދު ނަމާދާއި ހަދިޔާ ބެހުން

އީދު ނަމާދު، ރާއްޖޭގެ ހުރިހާ ރަށެއްގައި ކުރެވިގެން ދިޔައިރު މިކަމަށް ފުރިހަމަ ކަމެއް ގެނެސްދިނީ އީދަށް ފަހު ބޭއްވި އީދު ޖާފަތެވެ. އެކުވެރި ރައްޔިތަކު ދިރިއުޅޭ މުޖުތަމައުއެއްގެކަން ރަމްޒުކޮށްދޭ މި ހަރަކާތް ގިނަ ރަށްރަށުގައި ކުރިއަށް ގެންދިޔައީ އެރަށް ރަށުގެ ކައުންސިލުންތަކާއި ޖަމިއްޔާ ޖަމާއަތްތަކުން ބައިވެރިވެގެންނެވެ. އީދު ނަމާދަށް ދިޔައިރު ގެއިން ބަރުކޮށްގެން ހިފައިގެން ދިޔަ ކޮތަޅުތައް ހުޅުވާ ތުއްތު ކުދިންނާއި ބޮޑެތި މީހުން ބަހަންފެށި ހަދިޔާތަކާއެކު ފެނުނު ދީލަތިކަމަކީ އެހާމެ ހިތްގައިމު މަންޒަރެކެވެ. ބައެއް ކުދިން ގެއަށް އައީ ކޮތަޅެއް ފުރެންދެން ހަދިޔާ ހިފައިގެންނެވެ. ފެނުނީ އެކަކު އަނެކަކަށް އޮތް އަޚްވަންތަކަމާއި ހިތްހެޔޮކަމެވެ.

އީދު ސަލާންކުރުން

އޭގެ ފަހުން ދެން ފެނިގެން ދިޔައީ ޤައުމުގެ އެންމެ މަތީވެރިޔާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުންނާ އީދު ސަލާންކުރެއްވުމަށް މުލީއާގެއަށް މީހުން ޖަމާވި މަންޒަރެވެ. ރައީސްގެ ދެ ކަނބަލުންނާ އީދު ސަލާން ކުރެއްވުމުގެ ޒަމާންވީ މި އާދަކާދަ ރައީސް ޑރ. މުޢިއްޒުގެ ދެކަނބަލުން ދެމެހެއްޓެވުން ވެގެން ދިޔައީ އީދު ދުވަހުގެ ހެނދުނުގެ ވަގުތަށް އިތުރު ފުރިހަމަކަމެއް ގެނެސްދިން ކަމަކަށެވެ. އީދު ސަލާންކުރަން ދިޔަ ކުޑަކުދިންނަށް ރައީސްގެ ދެކަނބަލުންގެ ފަރާތުން ދެއްވި އީދު ހަދިޔާ އާއި ވަކިފަންތިއެއް ގިންތިއެއް ނެތި ހަމަހަމަ ކަމާއެކު ރައީސްގެ ދެކަނބަލުންނާ ސަލާންކުރެއްވުންވީ އީދުގެ ރީތި މިސާލު އެންމެ ކުޑަ ކުއްޖާއަށްއަށްވެސް އިހްސާސްވި ކަމަކަށެވެ. 

އެތައް ސަތޭކަ ބަޔަކު ބައިވެރިވި އީދު ހަވީރު

އީދު ދުވަހު އަސުރަށްފަހު ގިނަ ބަޔަކު ތައްޔާރުވީ އީދު ކުޅިވަރުތަކަށް ދާށެވެ. ރާއްޖޭގެ ފަހުގެ ތާރީޚެއްގައި ބޭއްވި އެންމެ ބޮޑު އާއިލީ ހަވީރަށް ވެގެންދިޔައީ މި އީދުގައި އެމްއެންޑީއެފްއިން އިންތިޒާމްކޮށްގެން މާލޭގައި އިއްޔެ ބޭއްވި އީދު ހަވީރެވެ. ސަލަންޓަން ޕާކާއި، އިސްލާމީ މަރުކަޒުގެ ގޯތިތެރެއާއި، ޖުމްހޫރީ މައިދާން ހިމެނޭހެން ބޭއްވި އީދު ހަވީރުގައި އެތައް ސަތޭކަ މީހުންނާއި ކުޑަކުދިން ބައިވެރިވި އެވެ. ތަފާތު ކުޅިވަރުތަކާއެކު ކުދިން މަޖާކުރަމުން ދިޔައިރު އެ އުފަލުގައި ރައީސްގެ ދެކަނބަލުން ބައިވެރިވެވަޑައިގެން އެކަން ގެންދެވީ ގާތުން ބައްލަވަމުންނެވެ. އީދު ހަވީރުގެ ކުޅިވަރުތަކުގެ ތެރޭގައި އީދު ކޭކު ފެޅުން ފަދަ ކަންކަން ކުރިއަށް ގޮސް އީދު ހަވީރު ނިމުނީ ރޭގަނޑުގެ ކުޅިވަރުތަކަށް އެންމެންނަށް ދައުވަތު ދެމުންނެވެ.

ޑްރޯންޝޯ އާއި ހިއްޗަށް ވަޑައިގަތުން

އީދު ދުވަހުގެ ރޭގަނޑު މާލޭ އެންމެ ބޮޑު މަޖީދީ މަގަށް އައިސްފައި އޮތީ މީގެ އެތައް ސަތޭކަ އަހަރެއްގެ ކުރިން ރާއްޖޭގެ ރަސްކަމުގެ ދުވަސްވަރުގެ ހަނދާންތަކެވެ. ރާއްޖޭގެ ރަސްކަމުގެތެރޭގައި ރަސްގެފާނު ބައިވެރިވެވަޑައިގަންނަވާ ހިއްޗަށް ވަޑައިގަތުން އަދުގެ ޖީލުތަކަށް ތަމްސީލުވާނެހެން ދައްކާލުން ވެގެން ދިޔައީ ދިވެހި ސަޤާފަތާއި މި އީދު ވަރަށް ބޮޑަށް ގުޅުވާލި ކަމަކަށެވެ. މި ހަރަކާތުން ރަސްގެފާނު ހިއްޗަށް ވަޑައިގަތުމުގެ ދަރުބާރު އަދުގެ ޒުވާން ޖީލަށް ކިތަންމެހާވެސް ބޮޑަށް ސިފަކޮށްދިނެވެ.

މާލޭގެ މި ހަރަކާތްކުރިއަށް ދިޔައިރު އަނެއް ކޮޅުން ހަމަ އެގަޑީގައި މީހުން ޖަމާވަމުން ދިޔައީ ހުޅުމާލޭ ސެންޓްރަލް ޕާކަށެވެ. ރޭގަނޑު 8.30 ވީއިރު މީހަކަށް ހިނގާނުލެވޭވަރަށް މީހުން ޖަމާވެފައި އޮތީ އީދަށް ޚާއްސަކޮށްގެން ދައްކަން ނިންމި ޑްރޯންޝޯ އާއި ހަވާ އަރުވަތަން ބަލާށެވެ. ޑްރޯން ޝޯގައި ދައްކާލި ހިތްގައިމުކަން ރާއްޖޭގައި އުޅޭ ބިދޭސީން ވެސް ދިޔައީ ބަލަމުންނެވެ. ސެންޓްރަލް ޕާކް އޮތީ ރީތި ކުލަތަކުން ދިއްލާ އަޅައިފަ އެވެ. އެއީ މީހުން ބަލާ ފޫހިނުވި މަންޒަރެކެވެ. އެތަނަށް ދިޔަ ކުދިބޮޑު އެންމެންނަށް ވީ މިއީ އީދަށް ޚާއްސަ އުފަލަކަށެވެ. 

ޚުލާސާކޮށް އެންމެނަށްވެސް ފެންނަން އޮތީ ސިޔާސީ ހަލަބޮލި މި ޤައުމުގައި މަދުން ނޫނީ ނުފެންނާނެ ފަދަ އުފާވެރި މަންޒަރެކެވެ. ކަމެއް ރަނގަޅަށް ކުރިއަސް، ކޮންމެ ކަމެއްްވެސް ނުބައިކުރަން އުޅޭ ބަޔަކު އުޅޭ ތަނެއްގައި ކިލަނބުކަމެއް ނެތި އެންމެން ބައިވެރިވާ މަޖާ އީދެއް ގެނަވުމަކީ ޚާއްސަ ކަމެކެވެ. މި އީދުގައި ފެނިގެން ދިޔައީ އީދު އިޙުތިފާލުކުރުމުގެ ރީތި ނަމޫނާ އެވެ. ޚާއްޞަކޮށް، ކުޑަކުދިން އިސްލާމް ދީނަށް ލޯބިކުރުމަށް ބާރުއެޅި، ދީނަށް ލޯބިޖެހި، ދީނުގެ ކަންކަން އުނގެނުމަށް ވެސް ބާރު އެޅޭނެ ގޮތަށް އީދުގެ ކަންކަން އިންތިޒާމްކުރެވި ކާމިޔާބުކަމާއެކު ނިމިދިޔަ ތަނެވެ.