ENGLISH
04 އޭޕްރީލު 2025
ޒަމާންތަކެއް ވީއިރުވެސް ދެމިއޮތް "ރޯދަ ފިނިބުރު"
31 މާރިޗު 2025
|
އިރު އޮއްސުމަށް ގާތްވެގެން އައި ވަގުތު މީހުން ސައިކަލުގައި ފިނިބުރު ޖަހަނީ: ރޯދަ މަހުގެ ކޮންމެ ދުވަހަކު ވެސް ސައިކަލު ފިނިބުރު އޮވޭ. -- ފޮޓޯ/ އެއްއެމްޓީވީ
އެންމެ މަޤްބޫލު
މާލޭގެ މަގުތައް އޮއްވަޅު ގޮނޑިއެއްހެން އޮތް ޒަމާނުގައިވެސް މި ސައިކަލު ބުރު އޮވެއެވެ. ކުރިން ބައިސްކަލުގައި، ކޮންމެ ރޯދަމަހަކު ޖަހަމުން އައި ބުރު ސައިކަލު ބުރަށް ބަދަލުވީ، މާލޭ މަގުތަކުގައި ގާއަތުރާ މާލެއަށް ސައިކަލުތައް އިތުރުވި ހިސާބުންނެވެ. މޫނަށް ދަޅަ އެޅޭ ވަރަށް އިރު ތިރިވުމުން މާލެ ވަށައި ރޯދަ ފިނިބުރު ޖަހާތާ މިހާރު ސާޅީހަކަށް އަހަރު ވެދާނެ އެވެ.
ރޯދަ ފިނިބުރަށް ނުކުމެ އުޅުނު އުމުރުން 25 އަހަރުގެ ޒުވާނަކު ބުނީ ބައްޕައާ އެކު ރޯދަ ފިނިބުރު ޖަހަން ނުކުމެ، ޖީއެން ސައިކަލެެއްގެ ޓޭންކު މަތީގައި އިންނަ ހަނދާން މިހާރު ވެސް އެބަހުރި ކަމަށެވެ. އޭނާ ބުނީ ސައިކަލު ދުއްވަން ދަސްވެ ލައިސަންސް ލިބެންދެން ވެސް ކޮންމެ ރޯދަ ދުވަހަކު ހަވީރު ފިނިބުރަށް ނުކުންނަ ކަމަށެވެ.
އުމުރުން ފަސް އަހަރުގެ ދަރިފުޅު ގޮވައިގެން ފިނިބުރު ޖަހަން ނުކުމެ އުޅުނު އެހެން ޒުވާނަކު ބުނީ ރޯދަ ދުވަހެއް ފުރިހަމަ ވަނީ ކޮންމެ ދުވަހަކު ޖަހާ ފިނުބުރާ އެކު ކަމަށެވެ. އެ ޒުވާނާ ބުނީ ގިނަ ބަޔަކާ އެއްވަރަށް ސައިކަލުގެ މަޑު ދުވެލީގައި މާލެ ވަށާ ޖަހާ ފިނިބުރަކީ ވަރަށް ބޮޑު ހިތަހަމަޖެހުމެއް ގެނެސްދޭ، ރޯދަ ކުރުވާ ކަމެެއް ކަމަށެވެ.
ރޯދަ މަހު ހަވީރު މީހުން ފިނިބުރު ޖަހަނީ: މަދުން ނަމަވެސް ކާރުގައި ވެސް ފިނިބުރު ޖަހާ-- ފޮޓޯ/އެމްއެމްޓީވީ
ހަވީރު ހަތަރުގަޑި ބައިގެ ފަހުން ފިނި ބުރަށް މީހުން ނުކުންނަން ފަށައެވެ. މި ފިނިބުރު، އިރު އޮއްސުމާ ހަމައަށް ކުރިއަށް ދެއެވެ. އާންމުކޮށް ފިނިބުރަށް ނުކުންނަކީ ފިރިހެނުންނާ އަދި ކުޑަކުދިން ގޮވައިގެން ނުކުންނަ ބައްޕަމެންނެވެ.
ފިނިބުރު ޖަހަން ނުކުންނަ ތަފާތު މީހުންގެ ވާހަކަތަކަށް ބަލާއިރު ރޯދަ ފިނިބުރު ޖަހާ މީހުންގެ ވިސްނުމުގައި އެއްގޮތް ކަންތައްތަކެއް އެބަހުއްޓެވެ. އެކަނި ފިނިބުރަށް ނުކުތުމަކީ މީހުންގެ އާދައެއް ނޫނެވެ. ރައްޓެއްސަކާއެކު ފިނިބުރު އެޅުމަށްވުރެ ގިނަ މީހުން އިސްކަން ދެނީ އާއިލާގެ މެންބަރަކާއެކު، ނުވަތަ އާއިލާގެ ދެތިން ހަތަރު މެންބަރުންގެ ގްރޫޕަކާއެކު ފިނިބުރު ޖެހުމަށެވެ. އުޑުމަތި ރީތި ދުސްތަކުގައި އޮއްސެމުންދާ އިރުގެ ފޮޓޯ ސްނެޕްކޮށްލަން ފިޔަވާ، ފިނިބުރުގައި އިތުރު ތަނަކަށް މަޑުކުރުމެއް ނޯވެއެވެ. މަންޒިލެއް ނެތި ޖަހާ މި ފިނިބުރުގެ މަންޒިލަކީ، މާލެ ވަށާ ބުރެއް ޖެހުމަށްފަހު ބަންގި ގޮވަންވާއިރަށް އެނބުރި ގެއަށްވަނުމެވެ.
ސިނަމާލެ ބުރިޖާއެކު ވެސް މި ފިނިބުރުގެ ރޫޓަށް ބަދަލެއް ނާދެއެވެ. އިއްތިފާގުން ނަމަވެސް މި ފިނިބުރު ޖަހަނީ މާލޭގެ އެންމެ ބޭރު މަގުން މާލެ ވަށައި ކަނާތުން ވާތަށް ދުއްވާ ގޮތަށެވެ. ސައިކަލުގެ ރީތިކަން ދައްކާލުމަކީ ކުރިން މި ފިނިބުރުގައި ފާހަގަ ކުރެވޭ ކަމެކެވެ. މިހާރު އުނިވެފައިވާ ކަމަކީ ފިނިބުރަށް ނުކުތުމުގެ ކުރިން ސައިކަލު ފޮހެ އޮފު އެރުވުމަށް ދޭ ސަމާލުކަމެވެ. ފިނިބުރަށް އިތުރުވީ، ހިތްގައިމު ރީތި ކާރުތަކެވެ.