ENGLISH

04 އޭޕްރީލު 2025

Advertisement

މިސްކިތްތަކުގެ އިމާމުން ފިގުހުވެރިވުމަކީ ވަރަށް މުހިންމު ކަމެއް: މިނިސްޓަރު

31 މާރިޗު 2025

|

ޝާމަ ޝުޢައިބު

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު - ފޮޓޯ: އިސްލާމިކް މިނިސްޓްރީ

މިސްކިތްތަކުގެ އިމާމުން ފިގުހުވެރިވުމަކީ ވަރަށް މުހިންމުކަމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ. 

އިއްޔެ ހުޅުމާލެ އަޒީޒާ މިސްކިތުގައި އީދު ނަމާދު ކުރުމަށް ހަމަޖެހިފައިވާ ދެ އިމާމުން، ނަމާދަށް ހާޒިރު ނުވުމުގެ ސަބަބުން، ފަސް އަހަރު ދުވަހަށް ޚުތުބާ ކިޔުމުން މިނިސްޓްރީން ވަނީ ސަސްޕެންޑު ކޮށްފައެވެ. 

އެކަމާ ގުޅިގެން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި މިނިސްޓަރު ވިދާޅުވީ ފިގުހުވެރިވުމަކީ ޝަރުއުގެ ހުކުމްތައް އެވަގުތެއްގެ ހާލަތުގައި ކަން އޮތްގޮތުގެ މައްޗަށް ފައްތައި އަމަލުކުރުމަށް ދަނެގަތުން ކަމަށެވެ. 

އެގޮތުން މިސްކިތްތަކުގެ އިމާމުން ފިގުހުވެރިވުމަކީ ވަރަށް މުހިންމު ކަމެއްކަން ފާހަގަކުރައްވާ މިނިސްޓަރު ވިދާޅުވީ ފިގުހުވެރިވުމަކަށް ކޮންމެހެން މާ މަތީ ޑިގްރީއެއް އޮތުން ލާޒިމް ނޫން ކަމަށެވެ. މިނިސްޓަރު ވިދާވީ އަޙްކާމްތައް ތަޠްބީޤުކުރުމަށް ދެނެގަތުން ފުދޭ ކަމަށެވެ.

"މިސާލަކަށް 7:00 ޖަހާއިރު ޢީދު ނަމާދު ފަށާއިރު، 7:00 ޖަހާއިރު ތެދުވެ ވަގުތުން ހަށަން ބަނުމުގެ ބަދަލުގައި 7:00 ގެ ކުރިން ތެދުވެ 7:00 ޖަހަން ވާއިރަށް، ބޮޑުވެގެންވާ އެ ޖަމާާއަތުގެ ސަފުތައް ތަރުތީބުކޮށްލެވޭނެހައި ވަގުތު އޮއްވައި ތެދުވެ ސަފުތަރުތީބު ކުރުމަށް ޖާގަ ދިނުން،" - އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު 

މިނިސްޓަރު ވިދާޅުވީ ހަމަ މިމަގުން ފަރުޟު ނަމާދު ކުރާ ނަމަ، ޖަމާއަތް ބޮޑުވި ވަރަކަށް ކިޔެވުން ކުރު ކުރުމާއި، ޖަމާއަތުގައި ނަމާދު ކުރަމުން ދަނިކޮށް ކުޑަކުދިން ރޯއަޑު އިވިއްޖެ ނަމަ ނަމާދު އަވަސް ކުރުމާއި، މިސްކިތް ކައިރީގައި އެހެނިހެން މިސްކިތްތަކާއި މީހުން ދިރިއުޅޭ ގޭގޭ ހުރި ނަމަ ތާޅަ ފިއްޔަށް ނަމާދު ކުރާ އަޑު ނުޖެއްސުން ހިމެނޭ ކަމަށެވެ.

އެއީ ކައިރި ކައިރީގައި ހުންނަ މިސްކިތްތަކަށް އުނދަގޫވެދާނެތީއާއި ކައިރި ގޭގޭގައި ނަމާދުކުރަން ތިބޭ އަންހެނުންނާއި ބަލިމީހުންނާއި ނިދާފައި ތިބޭ ކުޑަކުދިންނަށް ދަތިވެދާނެތީކަން މިނިސްޓަރު ފާހަގަކުރެއްވިއެވެ. އަދި އެއްބަޔަކު އަނެއްބަޔަކަށް ގުރުއާން ކިޔެވުމުގެ އަޑު އުފުލައި އުނދަގޫވާގޮތް ހެދުމަކީ ހަދީސްގައި ނަހީކުރެވިގެންވާ ކަމެއް ކަން ވެސް ފާހަގަކުރެއްވިއެވެ.

ނަމަވެސް މި ހާލަތުގައި ވެސް ބަންގި ގޮވާއިރު ތާޅަ ފިއްޔަށް އަޑު ދޭން ޖެހޭ ކަމަށާ އެެއީ ނަމާދު ވަގުތު ވަދެއްޖެކަން ގިނަ ބަޔަކަށް އިއުލާން ކުރުމަށް ކަމަށް މިނިސްޓަރު ވިދާޅުވިއެވެ. އަދި ހަމަ މިގޮތަށް ދަމު ނަމާދުގައްޔާއި ޖަމާއަތުގައި ނަމާދުކުރާއިރު ރުކޫޢު އާއި ސުޖޫދު ކުރުމުގައި އެހާގިނަ އިރު އެގޮތަށް ނުތިބެވޭ ބަލި މީހުންނާއި އުޒުރުވެރިން ޖަމާޢަތުގައި ތިބޭނެ ކަމަށް ވިސްނުމާއި ގަދަ އަތްވާއި ނުވަތަ ވިއްސާރަ ވެހޭ ވަގުތު ޖަމާއާތް ކުރުކުރުމާއި، އާއްމު ހާލަތުގައި ހިތްހަމަޖެހޭ މިނެއްގައި އެންމެންނަށް ވެސް ފަސޭހަވާނެ ގޮތަށް މެދުމިންކަމާއެކު ނަމާދުގެ ޖަމާއަތް ގެންދިއުމާއި ނަމާދުގައި ޚުޝޫއަތްތެރިވެ ނަމާދުކުރުމާއި މި ހުރިހައި ކަމަކީ ވެސް ފިގުހުވެރިވުމުގެ ތެރެއިންވާ ކަންކަން ކަމަށް މިނިސްޓަރު ޝަހީމް ވިދާޅުވިއެވެ.  

ކިޔުންތެރިންގެ ހިޔާލު