ENGLISH
03 އޭޕްރީލު 2025
އިންޓަރ މޮޅުވިއިރު، މިލާން ބަލިކޮށް ނަޕޯލީ ފަހަތުން ވިއްދާފައި
31 މާރިޗު 2025
|
ރޭގެ މެޗުގައި ލަނޑުޖެހުމަށްފަހު އިންޓަރގެ ފޯވާޑް، އާނައުޓޮވިޗް އުފާ ފާޅުކުރަނީ. --ފޮޓޯ: އޭޕީ
އެންމެ މަޤްބޫލު
އިޓާލިއަން ލީގުގައި ރޭ ކުޅުނު މެޗުގައި އުދިނޭޒީ އަތުން ހޯދި މޮޅާއެކު އިންޓަރ މިލާން ތިން ޕޮއިންޓުގެ ލީޑު ދެމެހެއްޓިއިރު، އޭސީ މިލާން ބަލިކޮށް ނަޕޯލީ އިން ލީގު ރޭހުގައި ހިންދެމިލައިފިއެވެ.
އުދިނޭޒީ އަތުން އިންޓަރ މޮޅުވީ 2-1 އިންނެވެ. އަމިއްލަ ދަނޑުގައި ނަޕޯލީން މިލާން ބަލިކުރީ ވެސް ހަމަ 2-1 އިންނެވެ.
މި ނަތީޖާއާއެކު، އިންޓަރ އެއްވަނައިގައި އުޅެނީ 30 މެޗުން 67 ޕޮއިންޓް ހަމަކޮށްގެންނެވެ. ތިން ޕޮއިންޓް ފަހަތުން ދެވަނައިގައި ނަޕޯލީ އޮތްއިރު، އެޓަލާންޓާ ތިންވަނައިގައި އޮތީ 58 ޕޮއިންޓާއެކު އެވެ.
ސެން ސީރޯގައި ކުޅުނު މެޗުގައި އިންޓަރގެ ލަނޑުތައް ޖަހައިދިނީ މާކޯ އާނައުޓޮވިޗް އާއި ޑެވިޑޭ ފްރަޓޭސީ އެވެ. އެ ޓީމުން މި ދެ ލަނޑުވެސް ޖެހީ ފުރަތަމަ ހާފުގައެވެ.
އުދިނޭޒީގެ ހަމައެކަނި ލަނޑު، ފަހު ހާފުގައި ކާމިޔާބުކޮށްދިނީ އޮމާރް ސޮލެޓް އެވެ.
މިލާނާ ނަޕޯލީ ބައްދަލުކުރި މެޗުގެ ތެރެއިން. --ފޮޓޯ: އޭޕީ
ރޭގެ މެޗުގެ އިތުރު ވަގުތުގެ ތެރޭގައި އިންޓަރގެ ކޯޗު، ސިމޯނީ އިންޒާގީ އަށް ވަނީ ދެ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލައިފައެވެ.
ލީގުގައި ރޭ ކުޅުނު އަނެއް މެޗުގައި މިލާން އަތުން ނަޕޯލީ މޮޅުވިއިރު އެ ޓީމުގެ ލަނޑުތައް ޖަހައިދިނީ މަޓެއޯ ޕޮލިޓާނޯ އާއި ރޮމެލޫ ލުކާކޫ އެވެ. މިލާންގެ ލަނޑުޖެހީ ލޫކާ ޔޮވިޗް އެވެ.
މި މެޗުގައި ޖެހި ގޯލާއެކު ލުކާކޫ ވަނީ ގައުމީ ޓީމަށާއި ކުލަބަށް 400 ލަނޑު ހަމަކޮށްފައެވެ.
މި މުބާރާތުގައި ރޭ ރަށުން ބޭރުގައި ފިއޮރެންޓީނާ އަތުން 1-0 އިން ބަލިވެ، އެޓަލާންޓާގެ ލީގު ހޯދުމުގެ އުއްމީދުތަކަށް ވަނީ ހުރަސްއެޅިފައެވެ.