ENGLISH

03 އޭޕްރީލު 2025

Advertisement

ޖިރޯނާ ބަލިކޮށް، ބާސެލޯނާ އަލުން ލީޑު ދަމަހައްޓައިފި

31 މާރިޗު 2025

|

މުޙައްމަދު އަދުހަމް

ޖިރޯނާ ކޮޅަށް ލަނޑުޖެހުމަށްފަހު ލެވަންޑޯސްކީ (ކ) އުފާ ފާޅުކުރަނީ. --ފޮޓޯ: އޭޕީ

ސްޕެނިޝް ލީގުގައި ރޭ ކުޅުނު މެޗުގައި ޖިރޯނާ 4-1 އިން ބަލިކޮށް، ބާސެލޯނާ އަލުން ލީޑު ދަމަހައްޓައިފިއެވެ.

މިއީ ހުރިހާ މުބާރާތެއް ހިމެނޭ ގޮތަށް ބާސެލޯނާ ޖެހިޖެހިގެން މޮޅުވި ހަވަނަ މެޗެވެ. އަދި، އެ ޓީމު އެންމެ ފަހުން ކުޅުނު 12 މެޗުގެ ތެރެއިން މޮޅުވި 11 ވަނަ މެޗު ވެސް މެއެވެ. ބާސެލޯނާ އެންމެ ފަހުން ބަލިވެފައިވަނީ މިދިޔަ ޑިސެމްބަރު މަހު އެވެ.

މި މޮޅާއެކު، ބާސެލޯނާ އެއްވަނައިގައި އުޅެނީ 29 މެޗުން 66 ޕޮއިންޓް ހޯދައިގެންނެވެ. ދެވަނައިގައި އޮތް ރެއާލް މެޑްރިޑަށް ލިބިފައިވަނީ 63 ޕޮއިންޓެވެ. އެތުލެޓިކޯ މެޑްރިޑް ތިންވަނައިގައި އޮތީ 57 ޕޮއިންޓާއެކު އެވެ.

ރޭގެ މެޗުގައި ބާސެލޯނާގެ ލަނޑުތައް ޖަހައިދިނީ ރޮބަޓް ލެވަންޑޯސްކީ އާއި ފެރާން ޓޮރޭސް އެވެ. ލެވަންޑޯސްކީ ދެ ގޯލު ޖެހިއެވެ. އެ ޓީމުގެ އަނެއް ލަނޑަކީ ޖިރޯނާގެ ކުޅުންތެރިއެއް އަތުން ބައިކޮޅަށް ވަތް ގޯލެކެވެ.

ޖިރޯނާގެ ހަމައެކަނި ލަނޑުޖެހީ އާނައުޓް ޑަންޖޫމާ އެވެ.

ޖިރޯނާއާ ބާސެލޯނާ ބައްދަލުކުރި މެޗުގެ ތެރެއިން. --ފޮޓޯ: ރޮއިޓާސް

މެޗަށްފަހު ވާހަކަ ދައްކަމުން ބާސެލޯނާގެ ކޯޗު، ހަންސީ ފްލިކް ބުނީ، މި ވަގުތު ބާސެލޯނާ ރަނގަޅު ފޯމެއްގައި އޮތް ކަމަށާއި، މެޗުތަކުގައި އެ ޓީމުން ބޯޅަ ގެންގުޅޭ ވަގުތުތަކުގައި ލަނޑުޖަހާނެ ގިނަ ފުރުޞަތުތަކެއް ތަނަވަސްކުރަމުންދާ ކަމަށެވެ.

އަދި، އޭނާގެ ޓީމުގެ އެންމެ ޚާއްސަ އެއް ކަމަކީ، އަބަދުވެސް ލަނޑުޖަހަން ބޭނުންވެ، އެކަމަށް ގަދައަޅައި މަސައްކަތްކުރުން ކަމަށް ވެސް ފްލިކް ބުނެފައިވެއެވެ.

ފްލިކް ވަނީ، ބާސެލޯނާގެ ފޯވާޑް، ލެވަންޑޯސްކީ އަށް ތައުރީފުކޮށްފައެވެ. އެގޮތުން، ފްލިކް ބުނީ، ލެވަންޑޯސްކީ އަކީ ޕެނަލްޓީ އޭރިޔާގެ ބޮކްސް ތެރޭގައި ވަރަށް ޚާއްސަ ކުޅުންތެރިއެއް ކަމަށެވެ.

މި ފަހަރުގެ ސީޒަނުގައި ރަނގަޅު ކުޅުމެއް ދައްކަމުން އަންނަ ބާސެލޯނާ ވަނީ މިހާތަނަށް ކުޅުނު 45 މެޗުގެ ތެރެއިން 20 މެޗުގައި ހަތަރު ގޯލަށްވުރެ ގިނައިން ލަނޑު ޖަހައިފައެވެ.

ބާސެލޯނާ އަށް ދެން އޮތީ ކޮޕަ ޑެލް ރޭގެ ސެމީ ފައިނަލުގެ ދެވަނަ ލެގުގައި އަންނަ ބުރާސްފަތި ދުވަހު އެތުލެޓިކޯ މެޑްރިޑާ ދެކޮޅަށް ކުޅެން ޖެހޭ މެޗެވެ.

ކިޔުންތެރިންގެ ހިޔާލު