ދިވެހީންނަކީ ކިޔަމަންތެރި، އެއް ސަފެއްގައި އެއް އަމާޒަކަށް އެކުގައި ކުރިޔަށް ދިޔަ ބައެއްކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ރޭ ބޭއްވި ހިއްޗަށް ވަޑައިގަތުމުގެ ދަރުބާރުގެ ތެރެއިން ޕީއެސްއެމަށް ދެއްވި ބަސްދީގަތުމެއްގައެވެ.

ދިވެހީންގެ ސަގާފަތާއި މިފަދަ ތަރިކަތަކުން އަދުގެ ޒުވާން ޖީލަށް ދަސްކޮށްދޭ ކަންކަމަކީ ކޮބާތޯ ކުރި ސުވާލަށް ޖަވާބު ދެއްވަމުން ވަޒީރު ވިދާޅުވީ، ދިވެހިންނަކީ ވަކި ގޮތަކަށް ތަރުތީބުވެގެން، ވަކި ގޮތަކަށް އުސޫލުތަކެއްގައި ހިފަހައްޓައިގެން ތިބި ބައެއް ކަމެވެ. ހަމައެހެންމެ ސަގާފަތާއި، އާދަކާދައާއި ތަރިކައިން ނެރެދޭ މާނަތަކަކީ އެބައެއްގެ ދިރިއުޅުމުގައި އެކުލެވިގެންވާ ސިފަތަކާއި ގޮތްތައް ކަމަށް ވެސް ވަޒީރު ވިދާޅުވިއެވެ.

މި ހުރިހާ މާނައެއް މި ކުޅިވަރުގެ ތެރެއިން ދައްކައިދޭ ކަމަށާއި މީގެ އިތުރަށް ތަހުޒީބު ޙަޟާރަތެއްގެ ސަގާފަތާއި، އާދަކާދައާއި ތަރިކައިން ނެރެދޭ މާނަތަކަކީ އެބައެއްގެ ދިރިއުޅުމުގައި ހުންނަ އެފަދަ ހަރުދަނާ ގޮތްތަކާއި ސިފަތައްކަން ވަޒީރުގެ އިންޓަވިއުގައި ފާހަގަކުރެއްވިއެވެ.

ހިއްޗާ ބެހޭގޮތުން މަޢުލޫމާތު ދެއްވަމުން ވަޒީރު ވިދާޅުވީ، ހިއްޗަށް ވަޑައިގަތުމަކީ ރަސްކަމުގެތެރޭގައި ބޭއްވޭ އަދި ރަސްގެފާނު ބައިވެރިވެވަޑައިގަންނަވާ ވަރަށް ހައިބަތު ހުރި ރަސްމިއްޔާތެއް ކަމަށެވެ. ނަމަވެސް ރޭ ބޭއްވުނީ ހަމައެކަނި އަދުގެ ޖީލުތަކަށް އޭގެ ތަމްސީލީ ދައްކާލުމެއްކަމަށް ވިދާޅުވިއެވެ. އެއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތެއް ކަމަށާއި، ރާއްޖޭގެ ތަރިކަ އަދުގެ ޒުވާނުންނަށް ތައުލީމެއްގެ ގޮތުގައި ފޯރުވައިދިނުމުގެ ވިސްނުންފުޅަށް ބައްޓަން ކުރެވިގެން، ހިއްޗަށް ވަޑައިގަތުމުގެ ދަރުބާރު އަދުގެ ޒުވާން ޖީލާ ހަމަޔަށް ފޯރުވައިދިނުން ކަމަށް ވިދާޅުވިއެވެ.

ވަޒީރު އިތުރަށް ފާހަގަކުރެއްވީ ތާރީޚުގައި މި ހަރަކާތަކީ ރަމަޟާން މަހުގެ ފަހު ދިހައިގެ ވަކި ދުވަސްތަކެއްގައި، ނުވަތަ ރޭތަކެއްގައި އޮންނަ ހަރަކާތެއް ކަމަށެވެ. މިކަމާ ގުޅިގެން ތަފާތު ކެއްކުންތައް ކައްކާ، ހިތި ގެއެއް ވެސް އޭރު ތައްޔާރު ކުރާކަން ވަޒީރު ފާހަގަކުރެއްވިއެވެ. އަދި ބަތް ފިޔަފާޅި ކިޔާ ތަނެއް އޭރު ތައްޔާރު ކުރާ ކަމަށާއި މިނޫންވެސް ބައެއް ރަސްމުތައް ހިމެނޭކަން ތާރީޚުން އެނގޭކަމަށް ވިދާޅުވިއެވެ.

މި ތަމްސީލު ގެނެސްދީފައިވަނީ ގިނަ މުއައްސަސާތަކަކުން ގުޅިގެން ވުޒާރާގެ އިސްނެންގެވުމުގެ މަތީންނެވެ.

މީގެ އިތުރުން މިކަންކަން އުފެދިގެން އައިގޮތަކާއި އޭރު މިކަންކަމުން ނެގުނު މާނަތަކަކާ ދިވެހިންގެ ދިރިއުޅުމުގެ ހަޔާތުގައި މިކަންކަން އަދާކުރި ދައުރު އެއީ ދިރާސާކޮށް ބަލަން ޖެހޭ ކަންކަން ކަމަށާއި ހިއްޗަށް ވަޑައިގަތުމުގައި އިހުޒަމާނުގައި ދީނީ ބައެއްވެސް ހިމެނޭ ކަމަށާއި މިހާރު މިގެނެވެނީ ހަމައެކަނި ތާރީޚީ ދައްކާލުމެއްގެ ގޮތުގައިކަން ވަޒީރު ފާހަގަކުރެއްވިއެވެ. ހަމައެހެންމެ އެކި ޒަމާނުގައި އެކި ތަފާތާއެކު ހިއްޗަށް ވަޑައިގަތުން ކުރިޔަށް ގެންދެވިފައިވާކަން ވެސް ފާހަގަކުރެއްވިއެވެ.