ފިޠުރު ޢީދު ފާހަގަކުރުމަށް މާލޭގައި މިއަދު ބޭއްވި "ޢީދު ހަވީރު" ކުރިއަށް އޮތް ދެ ދުވަހު ވެސް ކުރިއަށް ގެންދަވާގޮތަށް ސަރުކާރުން ހަމަޖައްސަވައިފިއެވެ.

ހޯމަދުވަހާއި އަންގާރަ ދުވަހުވެސް "ޢީދު ހަވީރު" ބާއްވަން ނިންމެވީ، މިއަދު މިބޭއްވި ހަރަކާތަށް ރައްޔިތުންގެ ފަރާތުން ލިބުނު އާދަޔާ ޚިލާފު ތަރުހީބަށްފަހު، ގިނަ ބަޔަކު މިކަމަށް އެދުމުންނެވެ.

މިއަދެކޭ ވެސް އެއްގޮތަށް ކުރިޔަށް އޮތް ދެ ދުވަހުވެސް "ޢީދު ހަވީރު"ގެ ހަރަކާތްތައް ކުރިޔަށްދާނީ ސަލްޓަން ޕާކާއި، ޖުމްހޫރީ މައިދާނާއި، އިސްލާމީ މަރުކަޒު ހިމެނޭ ސަރަހައްދުގައެވެ. މިކަމުގައި ހަރަކާތްތެރިވަނީ ސިފައިންނާއި ފުލުހުން، އަދި މީގެ އިތުރުން ސަރުކާރު ހިއްސާވާ ބޮޑެތި ކުންފުނިތަކެވެ. ފިތުރު އީދުގެ މުނާސަބަތާ ގުޅުވައިގެން ބޭއްވުނު މި ހަވީރު ކުރިއަށް ގެންދަނީ ކުޑަކުދިންނަށް ޚާއްސަ ޝައުގުވެރިކުރުވަނިވި ހަރަކާތްތަކާއެކުގައެވެ. މި ހަވީރުގައި، ރާއްޖޭގެ ސަގާފަތާއި ތާރީޚު ވަރަށް ފުރިހަމައަށް ގެނެސްދީފައިވާއިރު، ކުޑަކުދިންނާގުޅޭ، ކުރީގެ އަދި ޒަމާނީ ކެރެކްޓާތައް ވެސް ވަނީ ދައްކާލާފައެވެ.

ރަޢީސްގެ ދެކަނބަލުން ކުޑަކުއްޖަކާ އެކު ފޮޓޯއެއް ނަންގަވަނީ--ފޮޓޯ:ރައީސް އޮފީސް

ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ދެކަނބަލުން ބައިވެރިވެވަޑައިގަތުން ވެގެންދިޔައީ މި ހަވީރަށް އިތުރު ފުރިހަމަ ކަމެއް ގެނެސްދިން ކަމެއްގެ ގޮތުގައެވެ. ރައީސްގެ ދެކަނބަލުން ވަނީ މި ހަވީރުގެ ވަކި ވަކި ސްޓޯލްތައް ބައްލަވާލައްވާ، ވަރަށް ގިނަ ފަރާތްތަކާ ޢީދު ސަލާން ކުރައްވާ، ފޮޓޯ ނަންގަވާ، އުފާވެރި ވަގުތުކޮޅެއް އާއްމު ރައްޔިތުންނާއެކު ހޭދަކުރައްވާފައެވެ. މިއިން ޒަމާނަކު ރާއްޖޭގެ ވެރިޔަކު، ރައްޔިތުންނާ މިހާގާތުން ފިތުރު ޢީދު ފާހަގަ ކުރުމުގައި ބައިވެރިވެ ވަޑައިގެންފައެއް ނުވެއެވެ.

ގިނަބަޔަކު ފާހާގަކުރާ ގޮތުގައި، މިއަހަރުގެ ފިތުރު ޢީދަކީ ފަހުގެ ތާރީޚެއްގައި، ޚާއްސަކޮށް މާލެ ސަރަހައްދުގައި ދިރިއުޅޭ ރައްޔިތުންނަށް، އާއިލާއާއެކު ހިތްހަމަޖެހިލައިގެން ފިތުރު އީދު ފާހަގަ ކުރުމުގެ ފުރުސަތު އެންމެ ފުރިހަމަޔަށް ލިބުނު ޢީދުކަމުގައެވެ.

 މިހަރަކާތާ ގުޅޭގޮތުން ރައީސް އޮފީހުން ބުނީ، ސަރުކާރުގެ އިސްނެގުމާއެކު މުސްލިމުން އުފާފާޅުކުރުމަށް މަގުފަހިކޮށްދިނުމަކީ ރައީސް ޚާއްޞަ އަހަންމިއްޔަތެއް ދެއްވާ ކަމެއްކަމުގައެވެ. އަދި އީދު ފަދަ އިސްލާމީ މުނާސަބަތުތައް ކުލަ ގަދަކޮށް ފާހަގަކުރުމުގެ ސަބަބުން ޚާއްޞަކޮށް، ކުޑަކުދިން އިސްލާމް ދީނަށް ލޯބިކުރުމަށް ބާރުއެޅި، ދީނަށް ލޯބިޖެހި، ދީނުގެ ކަންކަން އުނގެނުމަށްވެސް ބާރުއެޅޭނެ ކަމަށް ރައީސް ދެކެވަޑައިގަންނަވާ ކަމަށް އެ އޮފީހުން ފާހަގަކޮށްފައިވެއެވެ.