އިނގިރޭސި ކުލަބު އާސެނަލްގެ ހުސްވެފައިވާ ސްޕޯޓިންގ ޑައިރެކްޓަރުގެ މަގާމަށް އިޓަލީގެ އަންދްރެއާ ބެރްޓާ ހަމަޖައްސައިފިއެވެ.

އާސެނަލްގެ ސްޕޯޓިންގ ޑައިރެކްޓަރުގެ މަގާމު ހުސްވީ، މިދިޔަ އަހަރުގައި އެޑޫ އެ މަގާމުން އިސްތިއުފާ ދިނުމުންނެވެ.

"ކުލަބުގެ ވަރަށް އުފާވެރި ދުވަސްވަރެއްގައި އާސެނަލްއާ ގުޅެވޭތީ ވަރަށް ހިތްހަމަޖެހިއްޖެ،" ބެރްޓާ ބުންޏެވެ.

ބެރްޓާ ބުނީ، ފަހަކަށްއައިސް މިދިޔަ އަހަރުތަކުގައި އާސެނަލް ހޯދަމުންއައި ކުރިއެރުންތައް ވަރަށް ގާތުން ޝައުގުވެރިކަމާއެކު ބަލަމުންއައިސްފައިވާ ކަމަށެވެ. އަދި، ޔޫރަޕްގެ ފުޓްބޯޅައިގައި އެ ކުލަބުގެ ކުރީގެ މަގާމަށް ގެންދިއުމަށް ކުރަމުންދާ މަސައްކަތްތަކަށް ތައުރީފުކުރާ ކަމަށް ވެސް ބެރްޓާ އިތުރު ބުންޏެވެ.

ބާރަ އަހަރަށް ފަހު އެތުލެޓިކޯ މެޑްރިޑްގެ ސްޕޯޓިންގ ޑައިރެކްޓަރުގެ މަގާމު ބެރްޓާ ދޫކޮށްލާފައިވާއިރު، އެ ކުލަބުގައި ހޭދަކުރި މުއްދަތުގައި އޭނާ ވަނީ އެ ޓީމަށް ތާރީޚީ ގިނަ ކާމިޔާބީތަކެއް ހޯދައިދިނުމުގައި މުހިއްމު ދައުރެއް އަދާކޮށްފައެވެ.

އެގޮތުން، އެތުލެޓިކޯ އިން ދެ ފަހަރެއްގެ މަތީން ސްޕެނިޝް ލީގު ކާމިޔާބުކޮށްދިނުމުގައި އިސް ދައުރެއް އަދާކޮށް، މިދިޔަ އަހަރުތަކުގައި އެ ކުލަބުގެ ސްކޮޑު ބިނާކޮށް، ވަރުގަދަކުރުމުގައި ވެސް ގިނަ މަސައްކަތްތަކެއް ކޮށްފައިވެއެވެ. އެ ޓީމުން ޔުއެފާ ޗެމްޕިއަންސް ލީގުގެ ފައިނަލަށް ދެ ފަހަރަށް ދަތުރުކޮށް، 2018 ވަނަ އަހަރުގެ ޔުއެފާ ޔުރޮޕާ ލީގުގެ ޗެމްޕިއަންކަން ހޯދިއެވެ.