މިއަދު ހަވީރު މާލޭގެ ތިން ސަރަހައްދެއްގަައި ދިފާއީ ވުޒާރާއާއި، ގައުމީ ދިފާއީ ބާރާއި، ދިވެހި ފުލުހުންގެ ޚިދުމަތާ ދައުލަތުގެ ބައެއް ކުންފުނިތައް ގުޅިގެން މާލޭގައި މިއަދު ހަވީރު ކުރިއަށްގެންދިޔަަ އީދު ހަވީރު ބައްލަވައިލައްވައި އެތަނަށް ޒިޔާރަތްކުރި އާއިލާތަކާ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައްދަލުކުރައްވައި ސަލާމްކުރައްވައިފިއެވެ. 

ސަލްޓަން ޕާކާއި އިސްލާމީ މަރުކަޒު ބޭރުގައި ޝަހީދުންގެ ބިނާ ކުރިމަތީ އޮންނަ މައިދާނާއި ޖުމްހޫރީ މައިދާން ސަރަހައްދުގައި ބޭއްވި މި ހަވީރުގައި ސަރުކާރު ކުންފުނިތަކުން ތަފާތު ސްޓޯލުތައް ތައްޔާރުކޮށްފައި ހުއްޓެވެ. ކޮންމެ ސްޓޯލެއްގައިވެސް ކުޑަކުދިން ޝައުގުވެރިވާ ތަފާތު ހަރަކާތްތައް އިންތިޒާމުކޮށްފައިވެއެވެ. 

އެ ހަރަަކާތްތަކުގެ ތެރޭގައި އިހުގެ އާދަކާދަތަކާއި ސަގާފަތްތައް ދައްކުވައިލުމާއި، އިހުގެ ދިވެހިވަންތަ ކުޅިވަރުތަކާއި، ކުޑަކުދިންގެ މެދުގައި މަގުބޫލު ޒަމާނީ ކެރެކްޓާސްވެސް ފެނިގެންދިޔައެވެ. 

އޭގެ އިތުރަށް އެމްއެންޑީއެފާއި ފުލުހުން ކުރިއަށްގެންދިޔަ ހަަރަކާތްތަކުގެ ތެރޭގައި ފުލުހުންގެ އުޅަނދުތައް ކުޑަކުދިންނަށް ދައްކައިލުމާއި އެ އުޅަނދުތަކަށް އެރުމުގެ ފުރުސަތު ކުޑަކުދިންނަށް ދިނުމާއި، ފޮޓޯ ނެގުމުގެ މިނިވަންކަން ދިނުން ފަދަ ކަންކަން ހިމެނެއެވެ. 

ކުޅިވަރާ ބެހޭ ވުޒާރާއިން ބޭއްވި ހަރަކާތްތަކުގެ ތެރޭގައި ގޭމިން ސްޓޯލުތަކާއި ފިއުޝަން ޝޯއެއް ދައްކައިލިއެވެ. ޖުމްހޫރީ މައިދާނުގައި ފެނުގެ އެކި ކުޅިވަރުތައްވެސް އިންތިޒާމުކޮށްފައި ހުއްޓެވެ. 

މި ހަރަކާތްތަކުގައި ބައިވެރިވުމަށް ގިނަ ބަޔަކު ކުޑަކުދިން ގޮވައިގެން އެ ސަރަހައްދަށް ގޮސްފައި ތިއްބެވެ. ރައީސްވަނީ އެ ތަނުގައި ތިބި ކުޑަކުދިންނާއި އެކުދިންގެ މައިންބަފައިންނާ ބައްދަލުކުރައްވައި ވާހަކަދައްކަވާފައެވެ. އަދި އެތަނުގައި ތިބި އާއްމުންނާ ސަަލާންކުރައްވައި އީދުގެ ތަހުނިޔާ ވިދާޅުވިއެވެ. 

އެމްއެމްޓީވީއަށް ދެއްވި ބަސްދީގަތުމެއްގައި ރައީސް ވިދާޅުވީ މި ހަވީރަކީ ވަރަަށް އުފާވެރި ހަވީރެއް ކަމަށެވެ. އެމަނިކުފާނުގެ އަނބިކަނބަލުން ސާޖިދާ މުހައްމަދުވެސް އެ ހަރަކާތާމެދު ހިތްޕުޅު ހަމަޖެހިވަަޑައިގަންނަވާކަން ހާމަކުރައްވައި އެ މާހައުލުން ފެނުނު އުފާވެރިކަން ފާހަގަކުރެއްވިއެވެ. 

ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަތީފުވެސް މިއަދުގެ ހަވީރަށް ވަޑައިގެން އެތަނުގައި ތިބި މީހުންނާއެކު ބައެއް ހަރަކާތްތަކުގައި ބައިވެރިވެވަޑައިގެން އާއިލާތަކާއެކު ވަގުތު ހޭދަކުރެއްވިއެވެ.