އއ. ރަސްދޫގައި ހިނގި އަލިފާނުގެ ހާދިސާގައި ފިހުނު މީހުންނަށް ފަރުވާ ދިނުމަށް ރާއްޖެއިން ބޭރުގެ ޓީމެއް އައިސްފައިވާ ކަމަށް އައިޖީއެމްއެޗް އިން ބުނެފިއެވެ. 

'އެމްއެމްޓީވީ' އާ ވާހަކަދައްކަވަމުން އެ ހޮސްޕިޓަލުގެ މީޑިއާ އޮފިޝަލް ވިދާޅުވީ މި ހާދިސާގައި ފިހުނު ދެ މީހުންނަށް ފަރުވާ ދިނުމަށް އައިސްފައިވަނީ ރާއްޖެއިން ބޭރުގެ ބަރން އެކްސްޕަރޓުން ކަމަށެވެ. އަދި އެ މީހުން މިހާރު އަނިޔާވި ދެ މީހުންނަށް ފަރުވާދޭން ފަށާފައިވާ ކަމަށް ވެސް އޮފިޝަލް ވިދާޅުވިއެވެ. 

ރަސްދޫގައި ހިނގި އަލިފާނުގެ ހާދިސާގައި ފިހިފައިވަނީ އުމުރުން 31 އަހަރުގެ އަންހެނަކާ ފިރިހެނެކެވެ. މައުލޫމާތު ލިބިފައިވާ ގޮތުގައި އެ ދެ މީހުންގެ ވެސް ހަށިގަނޑުގެ ބޮޑު ބައެއް ވަނީ ފިހިފައެވެ. އެގޮތުން، އަންހެން މީހާގެ ހަށިގަނޑުގެ 83 އިންސައްތަ ފިހިފައިވާއިރު ފިރިހެން މީހާގެ ހަށީގަނޑުގެ 78 އިންސައްތަ ވަނީ ފިހިފައެވެ. 

އެ ދެމީހުންނަށް ފަރުވާ ދެމުންދަނީ ވެންޓިލޭޓަރުގައެވެ. 

އަލިފާނުގެ ހާދިސާ ހިނގަން މެދުވެރިވި ސަބަބު އަދި އެއްވެސް ފަރާތަކުން ހާމަކޮށްފައެއް ނުވެއެވެ. މި ހާދިސާއާ ގުޅިގެން ފުލުހުން ބުނީ އަލިފާނުގެ ހާދިސާގެ ރިޕޯޓް ފުލުހަށް ލިބުނީ މިދިޔަ ހޯމަ ދުވަހުގެ ރޭ 11:15 ހާއިރު ކަމަށެވެ. އަދި މި މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.