ENGLISH
04 އޭޕްރީލު 2025
ފިޠުރު ޒަކާތުގެ ރެކޯޑެއް؛ 13.2 މިލިއަން ރުފިޔާ ޒަކާތުގެ ގޮތުގައި ލިބުނު
30 މާރިޗު 2025
|
ފިތުރު ޒަކާތް ބަލަައިގަންނަނީ، ފޮޓޯ: އިސްލާމިކް މިނިސްޓްރީ
އެންމެ މަޤްބޫލު
މި އަހަރު ފިޠުރު ޒަކާތުގެ ގޮތުގައި ރެކޯޑު އަދަދަކަށް ފައިސާ ލިބުނުކަން މޯލްޑިވްސް ޒަކާތު ހައުސްއިން ހާމަކޮށްފިއެވެ.
ޒަަކާތު ހައުސްއިން އާއްމުކޮށްފައިވާ ހިސާބުތަކަށް ބަލާއިރު ފާއިތުވި ތިން އަހަރުގެ ތެރެއިން 2024 ފިޔަވައި ކޮންމެ އަހަރަކުވެސް އަހަރުން އަހަރަށް ފިޠުރު ޒަކާތުގެ ގޮތުގައި ލިބުނު ފައިސާ އިތުރުވެފަައިވެއެވެ. އެގޮތުން 2022 ވަނަ އަހަރު 11.6 މިލިއަން ރުފިޔާ ފިޠުރު ޒަކާތުގެ ގޮތުގައި ލިބުނުއިރު ޖެހިގެންއައި 2023 ވަނަ އަހަރު 12.6 މިލިއަން ރުފިޔާ ލިބުނެވެ. އެއީ 8.7 އިންސައްތައިގެ އިތުރުވުމެކެވެ.
ނަމަވެސް 2024 ވަނަ އަހަރު ފިޠުރު ޒަކާތުގެ ގޮތުގައި ލިބުނީ 2023 ވަނަ އަހަރާ އަޅާބަލާއިރު 0.7 އިންސައްތަ މަދުންނެވެ. އެ އަހަރު ލިބުނީ 12.5 މިލިއަން ރުފިޔާއެވެ.
މި އަހަރު ފިޠުރު ޒަކާތުގެ ގޮތުގައި ލިބުނު ފައިސާގެ އަދަދު 2024 ވަނަ އަހަރަށްވުރެ 5.3 އިންސައްތަ އިތުރުވެފައިވެއެވެ. މި އަހަރު 13.2 މިލިއަން ރުފިޔާ ފިޠުރު ޒަކާތުގެ ގޮތުގައި ލިބިފައިވާކަން ޒަކާތު ހައުސްއިން އާއްމުކުރި ހިސާބުތަަކުން ދައްކައެވެ.
ޒަކާތު ހައުސްގެ ހިސާބުތައް ދައްކާ ގޮތުން އެންމެ ގިނައިން ފިޠުރު ޒަކާތުގެ ގޮތުގައި ފައިސާ ލިބުނީ ބޭންކް އޮފް މޯލްޑިވްސް މެދުވެރިކޮށެވެ. ބީއެމްއެލް މެދުވެރިކޮށް 7.3 މިލިއަން ރުފިޔާ ލިބުނެވެ. މޯލްޑިވްސް އިސްލާމިކް ބޭންކު މެދުވެރިކޮށް 1.2 މިލިއަން ރުފިޔާ އަދި ފަހިޕޭ މެދުވެރިކޮށް 997،764 ރުފިޔާއާއި ބަނޑޭރިޕޭ މެދުވެރިކޮށް 809،856 ރުފިޔާ އަދި ކައުންސިލުތަކުން 1.8 މިލިއަން ރުފިޔާ އަދި ޒަކާތު ހައުސްގެ ކައުންޓަރުތަކުން 488،681 ރުފިޔާ ލިބިފައިވެއެވެ.
އޭގެ އިތުރަށް ދިރާގު މެދުވެރިކޮށް 392،802 ރުފިޔާއާއި އުރީދޫ މެދުވެރިކޮށް 136،980 ރުފިޔާ ފިޠުރު ޒަކާތުގެ ގޮތުގައި މި އަހަރު ލިބުނެވެ.
ފިޠުރު ޒަަކާތުގެ ގޮތުގައި ރެކޯޑު އަދަދަކަށް މި އަހަރު ފައިސާ ލިބުނުއިރު، ޒަކާތާމެދު ހޭލުންތެރިކަން އިތުރުކޮށް ޒަކާތުގެ ނިޒާމު ހަރުދަނާކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ޒަަކާތުގެ ކަންކަމަށް ހާއްސަކޮށް މޯލްޑިވްސް ޒަކާތު ހައުސްގެ ގޮތުގައި އިދާރާއެއް އުފައްދާފައިވެއެވެ.
ޒަކާތު ހައުސް އުފެއްދެވުމާއެކު، މި އަހަރަކީ ފިޠުރު ޒަކާތުގެ ފައިސާ ފަޤީރުންގެ ދަފުތަރުގައި ހިމެނޭ މީހުންގެ މެދުގއި އެއްހަމައަކުން ބެހި ފުރަތަމަ އަހަރެވެ. އެގޮތުން ފަޤީރުންގެ ދަފުތަރުގައި ހިމެނޭ އެންމެނަށް މީހަކަށް 4،500 ރުފިޔާގެ މަގުން ޒަކާތުގެ ފައިސާ މިހާރުވަނީ ޖަމާކޮށްދީފައެވެ.