ދިވެހިރާއްޖެ އިސްލާމީ ޤައުމެއްގެ ގޮތުގައި ދެމެހެއްޓޭނީ، އަހަރެމެންގެ ދަރީންނަށް އިސްލާމީ ތަރުބިޔަތާއި ތަޢުލީމު ފޯރުކޮށްދީގެން ކަމަށާ އެކަމަށް ހުރިހާ ފަރާތްތަކުން ސަމާލުވުމަށް މިއަދުގެ ޢީދު ޚުތުބާގައި ބުނެފި އެވެ.

މިއަދުގެ ޢީދު ނަމާދަށް ފަހު މުޅި ރާއްޖޭގައި އިއްވި ޚުތުބާގައި ބުނެފައި ވަނީ އީދު ފަދަ އުފާވެރި ދުވަހެއްގައި، ހަނދާނަށް ގެންނާންޖެހޭ އެންމެ މުހިންމު އެއްކަމަކީ، ބަރަކާތްތެރި އެ ޖަމާޢަތަށް އަހަރެމެން ޙާޒިރުކުރުވީ މާތްވެގެންވާ އިސްލާމްދީންކަމެވެ.

އެހެންވެ އަހަރެމެންގެ ދީނާއި، ޢަޤީދާއަށް ރައްކައުތެރިވާން ޖެހޭނެ ކަމަަށް ޚުތުބާގައި ބުނެފައިވެ އެވެ. ޤައުމުގެ އިސްލާމީ ޝަޚުޞިއްޔަތަކީ، އިސްލާމް ދީނާއި، އެކުވެރިކަމާއި، މިނިވަންކަމާއި، އިސްތިޤުލާލު ކަން ފާހަގަކޮށް ޚުތުބާގައި ބުނެފައި ވަނީ ކުރިއަށް އޮތް ޖީލުތަކަށް މި މަތިވެރި ޢަޤީދާ ފޯރުކޮށްދީ، ޤައުމުގެ އިސްލާމީ ޝަޚުޞިއްޔަތު ރައްކައުތެރިކޮށް، ދަމަހައްޓާން މިއަދު ޢަޒުމު ކަނޑައަޅާންޖެހޭނެ ކަމަށެވެ.

“މި ލޮބުވެތި ވަޠަން، ސައްތައިން ސައްތަ އިސްލާމީ ޤައުމެއްގެ ގޮތުގައި ދެމެހެއްޓޭނީ، އަހަރެމެންގެ ދަރީންނަށް އިސްލާމީ ތަރުބިޔަތާއި ތަޢުލީމު ފޯރުކޮށްދީގެންނެވެ،”

އަހަރެމެން މިއަދު ޢީދު ނަމާދަށް ޓަކައި އެއްވެ ތިބި ތިބުން ހާމަކޮށްދެނީ އަހަރެމެންގެ އެއްބައިވަންތަކަން ކަމަށާ އަހަރެމެންގެ ކުޑަކުދީންނާއި ބޮޑެތި މީހުންގެ މެދުގައި، ފަޤީރުންނާއި މުއްސަނދީންގެ މެދުގައި، އޮތް ކުލުނުވެރިކަމާއި ލޯބިކަން ޚުތުބާގައި ވަނީ ފާހަގަ ކުރައްވާފަ އެވެ.

އަދި މިއަދު ހުރިހައިރުޅިވެރިކަމަކާއި، ޙަސަދަވެރިކަމަކުން އަހަރެމެންގެ ހިތްތައް ސާފުކުރުމަށާއި ބައިބައިނުވެ، އެއްގަލަކަށް އަރާ އަހުރެމެންގެ ތެރެއިން ކޮންމެ މީހަކު ވެސް އަނެކާގެ ޙައްޤު އަދާކުރަން ވަނީ ގޮވާލާފަ އެވެ.

އިސްލާމީ ޢީދުތަކަކީ، މާތް ﷲ ޝަރުޢުކުރައްވައިފައިވާ ޢީދުތަކެއް ކަން ފާހަގަކޮށް ޖާހިލީ ޒަމާނުގައި ފާހަގަކުރި ޢީދުތައް ކީރިތި ރަސޫލާ އުވައިލެއްވި ކަމަށާ އަދި އިސްލާމީ ދެ ޢީދު ފާހަގަކުރުމަށް އެންގެވިކަން ޚުތުބާގައި ވަނީ ފާހަގަ ކުރައްވާގަ އެވެ.

ޢީދު ދުވަހު އަހަރެމެންގެ އިންސާނިއްޔަތުކަން ފާޅުވާން ޖެހޭނެ ކަމަށާ މިއަދު އަހަރެމެން ޢީދުގެ އުފާފާޅުކުރަމުންދާ އިރު ދުނިޔޭގެ އެކި ކަންކޮޅުތަކުގައި ޙާލުގައި ޖެހިފައިވާ މުސްލިމު އަޚުންނާއި އުޚުތުންގެ މަތީން ހަނދާންކޮށް އެ މީހުންގެ ކެކުޅުންތަކުގައި ބައިވެރިވެ، އެ ކެކުޅުންތަކުން އެ މީހުން ސަލާމަތްކޮށްދެއްވުން އެދި ހެޔޮ ދުޢާކުރާން ޖެހޭ ކަމަަށް ވެސް ބުނެފައިވެ އެވެ.

ހަމައެހެންމެ، އަހަރެމެންގެ ދޭދޭ ފަރުދުންގެ މެދުގައި އެއްވެސް ކަހަލަ އަރައިރުމެއް، ދެކޮޅުވެރިކަމެއް އޮތް ނަމަ، އެކަން ނައްތައިލާ ބާރުގަދަ މީހާ ނިކަމެތި މީހާގެ އަތުގައި ހިފާ އެކަކު އަނެކަކުގެ ބޭނުންތައް ފުއްދައިދިނުމަށް ގޮވާލާފައިވެއެވެ.