މާދަމާއަކީ މި އަހަރުގެ ފިޠުރު ޢީދު ދުވަސްކަމަށް އިސްލާމިކް މިނިސްޓްރީން ކަނޑައަޅައި އިއުލާނުކޮށްފިއެވެ. 

ފިޠުރު ޢީދާމެދު ގޮތެއް ނިންމުމެއް މިރޭ އިސްލާމީ މަރުކަޒުގައި ހަނދާ ބެހޭ ކޮމިޓީގެ ބައްދަލުވުމެއް ބާއްވާފައިވެއެވެ. އެ ބައްދަލުވުމަށްފަހު ހަނދާ ބެހޭ ޤަރާރު އިއްވަވައިދެއްވީ އިސްލާމިކް އެފެއާޒް މިނިސްޓްރީގެ ޑެޕިއުޓީ މިނިސްޓަރު އައްޝައިޚް މުޙައްމަދު އިމްޠިޠާޢު ޢައްބާސްއެވެ.  

އެ ބަޔާނުގައި ބުނެފައިވަނީ ރާއްޖޭގެ އެއްވެސް ރަށަކަށް މިއަދު ހަނދު ނުފެންނަ ކަމަށެވެ. ރާއްޖޭގެ އެއްވެސް ރަށަކަށް ހަނދު ނުފެނުނު ނަމަވެސް އިސްލާމީ ބައެއް ޤައުމުތަަކަށް ހަނދު ފެނިފައިވާކަން އެނގިފައިވާތީ ރާއްޖޭގައި ހަނދާމެދު ގޮތް ނިންމުމުގައި އަމަލުކުރާ އުސޫލުގެ ދަށުން މިއަދަކީ ރަމަޟާން މަހުގެ ފަހު ދުވަސްކަމަށާއި އާދީއްތަ ދުވަހަކީ މި އަހަރުގެ ޝައްވާލު މަހުގެ އެއްވަނަ ދުވަސް ކަމަށެވެ. 

މާދަމާއަކީ ފިޠުރު ޢީދު ދުވަސްކަމަށް ކަނޑައަޅާފައިވާއިރު މި އަހަރުގެ ފިޠުރު ޢީދު ކުލަގަދަކޮށް ފާހަގަކުރުމަށް ސަރުކާރުންވަނީ ބޮޑެތި ތައްޔާރީތަކެއް ވެފައެވެ. އެގޮތުން މާލޭ ސަރަހައްދާއި ރާއްޖޭގެ ހުރިހާ ސިޓީތަކާއި އަތޮޅުތަކުގެ ވެރިކަންކުރާ ރަށްތަކާއެކު 60 އެތައް ރަށެއް ޒީނަތްތެރިކޮށް ދިއްލުމަށް ވާންޖެހޭ ހުރިހާ ތައްޔާރީތަކެއްވަނީ ވެފައެވެ. 

އެއާއެކު މީގެ ކުރިން މާލޭ ސަރަހައްދުގައި އީދު ފާހަގަކޮށްފައިނުވާ މިންވަރަަށް ކުލަގަދަކޮށް މާލޭ ސަރަހައްދުގައި އީދު ފާހަގަކުރުމަށް އެކި ހަރަަކާތްތައް ސަރުކާރުން އިންތިޒާމުކޮށްފައިވެއެވެ.