އައްޑޫ ސިޓީއަށް ދިމާވެފައިވާ ކަރަންޓުގެ މައްސަލައަށް  ދާއިމީ ހައްލެއް ހޯދުމަށް ކުރަމުން އަންނަ މަސައްކަތުގެ ތެރެއިން، އެންމެ ފަހުން ފޮނުވުނު 1.8 މެގަވޮޓްގެ އާ ޖަނަރޭޓަރުގެ ޓެސްޓްރަން މާދަމާ ހެނދުނު ކުރެވޭނެ ކަމަށް ފެނަކައިން ބުނެފިއެވެ.

އެކްސްގައި ކުރި ޕޯސްޓެއްގައި ފެނަކައިން ބުނީ އައްޑޫ ސެންޓްރަލް ޕަވަރ ސްޓޭޝަންގެ ޖެނެރޭޝަން ކެޕޭސިޓީ އިތުރު ކުރުމަށް އެ ސިޓީއަށް ގެނެވުނު 1.8 މެގަވަޓް ގެ އައު އިންޖީނުން ހިދުމަތްދިނުމަށް، އެކުންފުނީގެ ޓެކްނިކަލް ޓީމުން ދަންފަޅި ބަހައިގެން ރެއާއި ދުވާލު މެދުނުކެނޑި މަަސައްްކަތް ކުރަމުންދާ ކަމުގައެވެ. އަދި މާދަމާ ހެނދުނު އިންސްޓޮލޭޝަން މަސައްކަތް ނިމި، ޓެސްޓް ރަން ކުރެވޭނެކަމަށް ލަފާކުރެވޭކަމުގައެވެ.

ޖަނަރޭޓަރު އިންސްޓޯލް ކުރުމުގެ މަސައްކަތުގައި ފެނަކައިގެ ޓެކްނިކަލް ޓީމު ހަރަކާތްތެރިވަނީ--ފޮޓޯ:ފެނަކަ

އައްޑޫ ސިޓީގައި ކަރަންޓު ކެނޑޭ މައްސަލަ ކުރިމަތިވާން ފެށީ، އެ ސިޓީގައި ބޭނުންކުރަމުންދިޔަ 19 ޖަނަރޭޓަރުގެ ތެރެއިން، ގިނަ ޖަނަރޭޓަރުތައް އޯވަހޯލް ނުކޮށް ދިގުލައިގެންދިއުމުން ހަލާކުވުމުގެ ސަބަބުންނެވެ. ފާއިތުވެ ދިޔަ ދައުރު ފެނަކަޔާ ހަވާލުވެތިބި ފަރާތްތަކުގެ އިހުމާލުން، މިސަރުކާރު ވެރިކަމާ ހަވާލުވިއިރު ރާއްޖޭގެ ގިނަ ރަށްރަށުގެ އިންޖީނުގެތަކުގެ ހާލަތު އޮތީ ވަރަށް ނިކަމެތިކޮށެވެ.

ސަރުކާރުން މަސައްކަތް ކުރަމުން ދަނީ އައްޑޫގެ ކަރަންޓްގެ މައްސަލަ ވަރަށް އަވަހަށް ހައްލުކޮށް ކުރިއަށް އޮތް ފަސް އަހަރަށް ކަރަންޓުގެ އެއްވެސް މައްސަލައެއް ދިމާނުވާނެ ފަދަ ގޮތަކަށް ކަންކަން ތަރުތީބު ކުރުމަށެވެ. އައްޑޫސިޓީއަށް ކަރަންޓުގެ ހިދުމަތް ފޯރުކޮށްދޭ ސަރުކާރުގެ ކުންފުނި ފެނަކައިން މައުލޫމާތުދޭ ގޮތުގައި، އައްޑޫ ސިޓީގެ ކަރަންޓުގެ މައްސަލަ ހައްލުކުރުމަކީ މި ވަގުތު އެ ކުންފުނިން އެންމެ އިސްކަމެއްދީގެން ކުރާ މަސައްކަތެވެ.

ރާއްޖޭގެ އެކި ކަންކޮޅުތަކުގައި ކަރަންޓު ފޯރުކޮށްދިނުމަށް ބޭނުންކުރަމުން އަންނަ ޖަނަރޭޓަރުތައް އެއްވެސްވަރަކަށް މަރާމާތު ނުވަތަ އޯވަރހޯލް ކޮށްފައިނުވުމުގެ ސަބަބަބުން، ސަރުކާރުން ފެނަކަޔާ ގުޅިގެން، އިންޖީނުތައް މަރާމާތުކުރަން ބޭނުންވާ ސްޕެއަރ ޕާޓްސް ރާއްޖެ ގެނެސް މަރާމާތުގެ މަސައްކަތް ވަނީ ފަށާފައެެވެ. ސަރުކާރުގެ އަމާޒަކީ ރާއްޖޭގެ ހުރިހާ ކަންކޮޅުތަކަށް މެދުނުކެޑި 24 ގަޑިއިރު ކަރަންޓްގެ ހިދުމަތް ފޯރުކޮށްދިނުމެވެ.