ރައީސުލްޖުމްހޫރިއްޔާގެ ރިޔާސީ ވަޢުދުފުޅާ އެއްގޮތަށް، ތިލަދުންމަތީ އުތުރުބުރީ ކެލާ ފަޅުގައި ދެ ރިޒޯޓު ތަރައްޤީކުރުމަށްޓަކައި، އެ ރަށުގެ ފަޅުތެރެއިން ޖުމުލަ 325.5 ހެކްޓަރު ކަނޑައެޅުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފި އެވެ.

އެ މަނިކުފާނު މިގޮތަށް ނިންމަވާފައިވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގައި ދިވެހިރާއްޖޭގެ އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިޚްތިޞާޞް ކަނޑައެޅުމަށް ރައީސުލްޖުމްހޫރިއްޔާއަށް މަތިކޮށްފައިވާ މަސްއޫލިއްޔަތުގެ ދަށުން، އެ މަނިކުފާނު މިއަދު ނެރުއްވި ޤަރާރުންނެވެ.

ތިލަދުންމަތީ އުތުރުބުރީ ކެލާގެ އިޚްތިޞާޞަށް ގެނައި ބަދަލު ދައްކުވައިދޭ ޗާޓު ޖަދުވަލުކޮށް، މި ޤަރާރު މިހާރު ވަނީ ދިވެހި ސަރުކާރުގެ ގެޒެޓުގައި ޝާއިޢުކުރައްވާފައެވެ.

ކައުންސިލަށް ކަނޑައަޅާފައިވާ އިޚްތިޞާޞްގެ ތެރޭގައި ރިޒޯޓެއް ނުވަތަ އިންޑަސްޓްރިއަލް ރަށެއް ހިމެނޭނަމަ އެ ކައުންސިލްގެ އިޚްތިޞާޞުން އެ ރިޒޯޓް ނުވަތަ އިންޑަސްޓްރިއަލް ރަށެއް ހިމެނޭ ބައި އުނިވެގެން ދާނެ އެވެ. އަދި ފަޅުރަށުގެ ބައެއް ދެ ކައުންސިލްގެ އިޚްތިޞާޞަށް ވަންނަނަމަ އެ ފަޅުރަށެއްގެ އިޚްތިޞާޞް ދެ ރަށުގެ ކައުންސިލުން ވަކިވެގެންދާނެ އެވެ.

ކެލާ ފަޅުގައި ރިސޯޓް ތަރައްޤީ ކުރުމަކީ އެ ރަށުގެ ރައްޔިތުންނާއި ކައިރީ ރަށްރަށުގެ ރައްޔިތުން އެދެމުން އަންނަ ކަމެކެވެ. އެކަން ފުރިހަމަ ކޮށް ދެއްވާނެ ކަމަށް ރައީސް މުޢިއްޒު އިޢުލާނު ކުރެއްވީ ފެބްރުއަރީ 25، 2024 ގައި ކެލައަށް ވަޑައިގެން އެ ރަށުގެ ރައްޔިތުންނާއި މުޚާތަބު ކުރައްވާ ދެއްކެވި ވާހަކަފުޅުގަ އެވެ.