މި އަހަރުގެ ފިޠުރު ޢީދު ދުވަހު މާލޭގައި ބާއްވާ ޢީދު ހަވީރަކީ މިފަހުގެ ތާރީޚުގައި މިފަދަ މުނާސަބަތެއްގައި މާލޭގައި ބާއްވާނެ އެންމެ ބޮޑު ހަވީރަށްވާނެއެވެ. މި ހަވީރު އިންތިޒާމުކުރަނީ ދިވެހި ޤަައުމީ ދިފާއީ ބާރާއި ފުލުހުންގެ ޚިދުމަތާއި ސަރުކާރު ކުންފުނިތައް ގުޅިގެންނެވެ. 

މި ހަވީރުގައި ބައިވެރިވާ ކުންފުނިތަކުން އަންނަނީ އެ ހަވީރުގައި އެކި ސަރަހައްދުތަކުގައި ޚާއްސަ ސްޓޯލުތައް ބެހެއްޓުމަށް ތައްޔާރުވަމުންނެވެ. އަދި ކޮންމެ ކުންފުންޏަކުންވެސް މަސައްކަތްކުރަމުން އަންނަނީ ތަފާތު އުފެއްދުންތެރި އީޖާދީ ކަމެއް އެ ކުންފުންޏެއްގެ ސްޓޯލުން ގެނެސްދިނުމަށެވެ. 

ދިވެހިވަންތަ ނަންތައް ދީފައިވާ ތަފާތު އައު ހަރަކާތްތަކެއް ސްޓެލްކޯއިން ޖުމްހޫރީ މައިދާނުގައި ބަހައްޓާ ސްޓޯލުގައި ހިމެނޭނެކަމަށް އެ ކުންފުނިން ބުނެއެވެ. އެގޮތުން ދަންޑަހެލު ފައިޓާއި، ރަންނަމާރި ރައިޑާއި، ބަބްލް ބެލޫން ހައުސް ފަދަ ހަރަކާތްތަައްވާނީ އެ ސްޓޯލަށް ދާ ކުޑަކުދިންނަށް ތަފާތު އުފާވެރިކަމެއް ގެނުވާނެ ކަންތައްތަކަަކަށެވެ. 

ސްްޓެލްކޯގެ ސްޓޯލުން ލުއިކާނާގެ ތަފާތު ބާވަތްތައް ލިބެން ހުންނާނެކަމަށާއި، އެ ސްޓޯލުގައި ގެނެސްދޭ ހަރަކާތްތަކުގައި ބައިވެރިވާ ކޮންމެ މީހަކަށްވެސް ހަދިޔާއެއް ލިބޭނެކަމަށް އެ ކުންފުނިން ބުނެފައިވެއެވެ. 

ސަލްޓަން ޕާކުގެ ހަތަރު ސަރަހައްދެއްގައި ތަފާތު ހަަރަކާތްތައް ރާވައި އިންތިޒާމުކުރަނީ އެސްޓީއޯއިންނެވެ. އެސްޓީއޯއިން ހުރިހާ ހަރަކާތެއްވެސް އިންތިޒާމުކުރަނީ އެ ހަވީރުގައި ބައިވެރިވާ ކުޑަކުދިންނަށް އުފާވެރިކަން ލިބޭނެ ގޮތަށް ސަމާލުކަން ދީގެންނެވެ. ހަަރަކާތްތައް ފަރުމާކޮށްފައިވަނީ ކުޑަކުދިންނަށް މަޖާ އުފާވެރި ހިތްހަމަޖެހުން އިހުސާސްވާނެ މާހައުލެއް އެ ހަވީރުގައި އޮންނާނެ ހެނެވެ. 

އެސްޓީއޯއިން ސަލްޓަން ޕާކުގެ ހަތަރު ސަރަހައްދުގައި ހިންގާ ހަރަކާތްތަކުގެ ތެރެއިން ކަމެއްގައި ބައިވެރިވާ ކޮންމެ ކުއްޖަކަށްވެސް ހަދިޔާއެއް ލިބޭނެއެވެ. 

އީދު ކޯޑީގެ ނަމުގައި އެމްޓީސީސީން ބަހައްޓާ ސްޓޯލުން ދިރުވައިދެނީ އީދުގެ ކުރީގެ ހަނދާންތަކެވެ. އެ ސްޓޯލު ބައްޓަންކޮށްފައިވަނީ އިހުގައި ދިވެހިން އީދު ފާހަގަކުރުމަށް ކުޅެއުޅުނު ކުޅިވަރުތަކާއި ހިންގައި އުޅުނު ހަރަކާތްތައް ފެންނާނެ ގޮތަށެވެ. 

ރުކުގެ ފަން ބޭނުންކޮށްގެން އެކި ބާވަތުގެ ކުޅޭ ތަކެތި ތައްޔާރުކުރާނެ ގޮތް ކުޑަކުދިންނަށް ދަސްކޮށްދިނުމުގެ ހަރަކާތްތަކެއް އެ ސްޓޯލުގައި ކުރިއަށްދާއިރު، އެތަނުގައި ކުޑަކުދިން ފެނާ ކުޅެލައި ސަކަރާތް ޖަހައިލުމަށް ފެންއަރުވާ ވަޑާމެއް ބަހައްޓާނެއެވެ. 

މި ކުންފުނިތަކުގެ އިތުރަށް އެޗްޑީސީއާއި، އެމްއޭސީއެލްއާއި، އެމްޑަބްލިއުއެސްސީންވެސް މި ހަވީރުގައި ސްޓޯލުތައް ބަހައްޓާނެއެވެ. ކޮންމެ ކުންފުންޏެއްގެ ސްޓޯލުވެސް ތަފާތުވާނެއެވެ. ނަމަވެސް  މިހުރިހާ ސްޓޯލަކުންވެސް  ކުޑަކުދިން ޝައުގުވެރިވާނެ އެ ކުދިންނަށް އުފާވެރިކަން ގެނުވާނެ ހަރަކާތްތައް ފެނިގެން ދާނެއެވެ. އަދި މިހުރިހާ ކުންފުނުތަކުގެ ސްޓޯލުތަކުންވެސް ކުދީންނަށް ހަދިޔާ ލިބޭނެއެވެ. 

މާލޭގައި އީދު ފާހަގަކުރުމަށް މާ ބޮޑު ހަރަކާތެއް ނުބާއްވާތާ އެތައް ދުވަހެއްވުމަށްފަހު މި އަހަރުގެ ފިތުރު އީދު މި ފާހަގަކުރަނީ ވަރަށް ކުލަގަަދަކޮށެވެ. ޚާއްސަކޮށް އާއިލާތައް އެކުއެކީ ވަގުތު ހޭދަކޮށް، ކުޑަކުދިން ހިތްހަމަޖައްސައިލާ މަޖާކޮށްލެވޭނެ ތަނަވަސް މާހައުލެއް ފުރަމާލެއިން ފަހިވެގެންމިދަނީ އެތައް ޒަމާނަކަށްފަހުއެވެ.