އެއްވެސް ފަރާތަކުން އަމިއްލަ އަމިއްލައަށް ރޯދަ އިއުލާންކުރުމާއި އީދު އިއުލާންކުރުމަކީ މަސްލަހަތު ގެއްލިދާނެ ކަމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ. މީޑިއާތަކާ ހިއްސާކުރެއްވި މެސެޖެއްގައި މިނިސްޓަރު ވިދާޅުވީ ތަރިއިރުހަނދާއި ގުޅިގެން ފަލަކީ އިލްމުގެ ދާއިރާގައި އިލްމީ ބަހުސްކުރުމަކީ މައްސަލައެއްނޫން ކަމަށެވެ.

ނަމަވެސް މިކަން ކުރަންވާނީ އާއްމު މަސްލަހަތަށް އަސަރު ނުކުރާ ގޮތަށް ކަމަށާ، ޚާއްސަކޮށް ރަމަޟާން މަހާއި ޝައްވާލު މަހުގެ ހަނދުގެ ކަންކަމަކީ އޭގެ މައްޗަށް ޝަރުޢީ ޙުކުމްތައް ތަރުތީބުވާ ކަންތައްތަކެއް ކަމުން، މިކަމުގައި ރައްޔިތުންނަށް އޮޅުން އަރައި ޝައްކު އުފެދޭގޮތަށް ކަމާ ނުގުޅޭ ފަރާތްތަކުން ވާހަކަ ދެއްކުމަކީ މަސްލަހަތު ގެއްލިދާނެ ކަމެއް ކަމަށް މިނިސްޓަރު ވިދާޅުވިއެވެ.

މިނިސްޓަރު ޝަހީމް ވިދާޅުވީ ރަމަޟާން މަހުގެ ހަނދު ސާބިތުކުރުމާއި ޝައްވާލުމަހުގެ ހަނދު ސާބިތުކުރުމުގެ ކަންކަން، ޝަރުޢީ ހަމަތަކާއި، ރާއްޖޭގައި އަމަލުކުރުމަށް ކަނޑައެޅިފައިވާ ހަރުދަނާ އުސޫލުތަކުގެ މަތިން އެ ވުޒާރާއިން ކުރިއަށް ގެންދާނެ ކަމަށެވެ.

އަދި އެއްވެސް ފަރާތަކުން އަމިއްލަ އަމިއްލައަށް ރޯދަ އިއުލާންކުރުމާއި އީދު އިއުލާންކުރުމަކީ މަސްލަހަތު ގެއްލިދާނެކަމެއް ކަމަށް ވުމާއެކު މިކަމަށް ސަމާލުވުމަށް މިނިސްޓަރު އިލްތިމާސްކުރެއްވިއެވެ. 

މިނިސްޓަރު މިހެން ވިދާޅުވެފައި މިވަނީ އަންނަ ފިޠުރު ޢީދު ވާނެ ދުވަހަކާ މެދު ޢިލްމުވެރިން  ބަހުސް ކުރަމުންދާ ވަގުތެއްގައެވެ.

ކަލަންޑަރު ބުނާގޮތުން ހިނގަމުންމިދާ ބަރަކާތްތެރި ރަމަޟާން މަހުގެ އެންމެ ފަހު ދުވަހަކީ އަންނަ އާދިއްތަ ދުވަހެވެ. އެއީ މި ހިނގާ މާރިޗު މަހުގެ 30 ވަނަ ދުވަހެވެ. އެހެން ކަމުން މި އަހަރުގެ ބަރަކާތްތެރި ފިޠުރު ޢީދު ދުވަހަކީ ޖެހިގެން އަންނަ ހޯމަ ދުވަސް (މާރިޗް މަހުގެ 31) ކަމަށް ކަލަންޑަރުގައި ކަނޑައަޅާފައިވެއެވެ.