މި އަހަރުގެ ފިތުރު އީދުދުވަހާ ގުޅޭ ގޮތުން މީގެ ކުރިން ވިދާޅުވެފައިވާ ވިސްނުންފުޅު ބަދަލުކުރައްވައި އަންނަ ހޯމަދުވަހަކީ އީދު ދުވަސްކަމަށް ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް ވިދާޅުވެއްޖެއެވެ. 

ރައީސް މައުމޫން ވިދާޅުވި ގޮތުގައި މާރިޗު 30 ވާ އާދީއްތަ ދުވަހަކީ މިއަހަރުގެ ފިޠުރު ޢީދު ދުވަހަށް ވާނެކަމަށް ވަރަށް ބޮޑަށް ޔަޤީން ކުރެވެ އެވެ.

އެހެން ވިދާޅުވާ ސަބަބު ވެސް ސާފުކޮށް ދެއްވި އެވެ. ވިދާޅުވީ ސަޢޫދީ ޢަރަބިއްޔާ އާއި، މިޞްރާއި، ތުރުކީ އާއި، މޮރޮކޯ ފަދަ އިސްލާމީ ޤައުމުތަކަށް މި ހިނގާ މާރިޗު މަހުގެ 29 ވަނަ ދުވަހު އިރުއޮއްސުމަށްފަހު، ހަނދު ނޯއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެ ކަމަށް ފަލަކީ ހިސާބުން ދައްކާ ކަމަށެވެ. އެހެން ކަމުން ޖެހިގެން އަންނަ ދުވަހަކީ (މާރިޗު 30 ވާ އާދީއްތަ ދުވަހަކީ) މިއަހަރުގެ ފިޠުރު ޢީދު ދުވަހަށް ވާނެކަމަށް ވަރަށް ބޮޑަށް ޔަޤީން ކުރެވޭ ކަމަށް ލިޔުއްވުމުގައިވެއެވެ.

މާރިޗު މަހުގެ 29 ވަނަ ދުވަހަކީ ރަމަޟާން މަހުގެ ވެސް 29 ވަނަ ދުވަހެވެ. އެދުވަހު ދިވެހިރާއްޖެއަށް އިރުއޮއްސެނީ 6 ގަޑި 14 މިނެޓުގަ އެވެ. ހަނދު އޮއްސެނީ ވެސް، ހަމަ އެގަޑީގައެވެ. އެހެންކަމުން، ވިދިގެން އަންނަ ދުވަހަކީ ދިވެހިރާއްޖެއަށް ފަލަކީގޮތުން ޝައްވާލު މަހުގެ 1 ވަނަ ދުވަސް ކަމަށް ވުމާއި ނުވުމާ މެދު ބަހުސެއް އޮތް ނަމަވެސް، ވަރަށް ގިނަ އިސްލާމީ ޤައުމުތަކަށް އެދުވަހަކީ ޝައްވާލު މަހުގެ 1 ވަނަ ދުވަސް ކަމަށް ވާނެތީ، މާރިޗު މަހުގެ 30 ވަނަ ދުވަހަކީ، ރާއްޖެއަށް ވެސް ޝައްވާލު މަހުގެ 1 ވަނަ ދުވަސް ކަމުގައި ވާނެ ކަމަށް ލަފާކުރެވޭ ކަމަށް މައުމޫން ވިދާޅުވި އެވެ.

މިފަދައިން ކުރިން ވިދާޅުވި ނަމަވެސް މިއަދު އެކްސްގައި ކުރެއްވި ޕޯސްޓެއްގައި ރައީސް މައުމޫނުވަަނީ އެމަނިކުފާނުގެ ވިސްނުންފުޅު ބަދަލުކުރައްވާފައެވެ. ބަރާބަރު ފަލަކީހިސާބުން ދައްކާ ގޮތުގައި ރާއްޖެއަށް މިރޭ އެއްވަގުތެއްގައި އިރާއި ހަނދު އޮއްސޭނެއެވެ. އެއީ 18:14 ގައިކަމަށްވެސް އެމަނިކުފާނު ވިދާޅުވިއެވެ. 

އިތުރަށް ރައީސް މައުމޫނު ވިދާޅުވީ އިރު އޮއްސުމަށްފަހު އުދަރެހުގައި ހަނދެއް ނުހުންނާނެއެވެ. މާދަމާއަކީ ރާއްޖެއަށް ރަމަޟާން މަހުގެ 30 ވަނަ ދުވަސްކަމުގައި ވިދާޅުވުމާއެކު، ރައީސް މައުމޫން ފާހަގަކުރެއްވީ އިސްލާމީ އެހެން ގައުމަކަށް މިރޭ ހަނދު ސާބިތުވެގެން ރާއްޖެއަށް ހަނދުލައްވައިފިނަމަ މާދަމާ އީދަށްވާނެ ކަމަށެވެ.