އަންނަ އޭޕްރީލް މަހުގެ ހަވަނަ ދުވަހު ފެށުމަށް ހަމަޖެހިފައިވާ ދިރާސީ އާ އަހަރުގެ ކުރިން ސްކޫލުތަކުން ބޭނުންވާ ހުރިހާ ޓެކްސްޓް ފޮތްތަކެއް ލިބޭނެ އިންތިޒާމު ހަމަޖެއްސުމަށް ސަރުކާރުން ނިންމައިފިއެވެ.

އެހެން އަހަރުތަކުގައި ތަކުރާރުކޮށް ދިމާވާ އެންމެ ބޮޑު އެއް މައްސަލައަކީ ކިޔެވުން ފެށޭއިރު ވެސް ބައެއް ދަރިވަރުންނަށް ފޮތްތައް ނުލިބުމެވެ. މިކަން ތަކުރާރުވިޔަ ނުދިނުމަށްޓަކައި އަންނަ ދިރާސީ އަހަރުގެ ފޮތްތައް ސަޕްލައި ކުރުމުގެ މަސައްކަތް ސަރުކާރުން ވަނީ މިދިޔަ ޑިސެމްބަރު މަހުގެ ކުރީކޮޅު ފަށާފައެވެ.

ފާއިތުވި އަހަރުތަކުގައި ބެލެނިވެރިން އެންމެ ބޮޑަށް ކަންބޮޑުވުން ފާޅުކޮށްފައި ވަނީ ޓެކްސްޓް ފޮތް ބެހުން ލަސްވާތީއެވެ. މީގެ ކުރިން، ދިރާސީ އަހަރުގެ ކިޔެވުން ފަށައި ހަފުތާތަކެއް ފަހުން ވެސް ބައެއް ސްކޫލުތަކަށް އެ ފޮތްތައް ލިބެއެވެ.

މި މައްސަލައަށް ހައްލު ހޯދައި ދިރާސީ އަހަރުގެ ކިޔެވުން ފެށުމުގެ ކުރިން ހުރިހާ ދަރިވަރުންނަށް ބޭނުންވާ ފޮތްތައް ލިބޭނެ ކަމުގެ ޔަގީންކަން ސަރުކާރުން ދީފައިވެއެވެ.

އެގޮތުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ ދިރާސީ އާ އަހަރުގެ ހުރިހާ ޓެކްސްޓް ފޮތްތަކެއް ޗާޕުކޮށް ނިމި، މިހާރު އެ ފޮތްތައް ހުރީ އެޑިއުކޭޝަން މިނިސްޓްރީގެ ބެލުމުގެ ދަށުގައި ކަމަށެވެ.

މިނިސްޓަރު ވިދާޅުވީ 81 އިންސައްތަ ފޮތް މިހާރު ވެސް ސްކޫލްތަކަށް ޑެލިވަރީ ކުރެވިފައިވާ ކަމަށާއި ބާކީ ހުރި ސްޓޮކް ކުރިއަށް އޮތް ހަފުތާގައި ބެހުމަށް ހަމަޖެހިފައިވާ ކަމަށެވެ. 

ޓެކްސްޓް ފޮތް ބެހުމުގެ އިތުރުން އެޑިއުކޭޝަން މިނިސްޓްރީން ވަނީ ދިރާސީ އަހަރުގެ ކިޔެވުން ފަސޭހަކަމާއެކު ފެށުމަށް ގިނަ ތައްޔާރީތަކެއް ވެފައެވެ.

އެގޮތުން ސްކޫލްތަކުގެ މަރާމާތާއި ބެލެހެއްޓުމަށް ޖުމްލަ 15 މިލިއަން ރުފިޔާ ހިމަނާފައިވާއިރު، މިނިސްޓަރު ޑރ. ޝަފީއު ވަނީ މުދައްރިސުންގެ ދަތިކަމެއް ކުރިމަތިނުވާނެކަމުގެ ޔަގީންކަން ބެލެނިވެރިންނަށާއި ދަރިވަރުންނަށް ދެއްވާފައެވެ.

މިދިޔަ ދިރާސީ އަހަރުގެ ކިޔެވުން ފެބްރުއަރީ މަހުގެ 25 ވަނަ ދުވަހު ނިންމާލާފައިވާއިރު، އަންނަ އޭޕްރީލް މަހުގެ ހަވަނަ ދުވަހު ދިރާސީ އަހަރުގެ ކިޔެވުން ފެށުމަށް ހަމަޖެހިފައިވެއެވެ. ކިޔެވުން ނިމޭނީ ޑިސެމްބަރު މަހުގެ 28 ވަނަ ދުވަހުއެވެ.