ދިވެހި ފުލުހުންގެ ޚިދުމަތަށް 92 އަހަރު ފުރުމުގެ މުނާސަބުގައި ދިދަ ނެގުމުގެ ރަސްމިއްޔާތު ބާއްވައިފި އެވެ.

މިރޭ 12 ޖެހިއިރު ދިދަ ނެގުމުގެ ރަސްމިއްޔާތު މާލެއާއި އަތޮޅުތަކުގައި ޕޮލިސް ޕޯސްޓްތައް ހުރި ހުރިހާ ރަށެއްގައި ވަނީ ކުރިއަށް ގެންގޮސްފަ އެވެ.

ފުލުހުންގެ މައި އިދާރާ،ޝަހީދު ހުސައިން އާދަމް ބިލްޑިންގ ގައި ބޭއްވި ރަސްމިއްޔާތުގައި ހޯމް މިނިސްޓަރު އަލީ އިޙުސާން އާއި ކޮމިޝަނަރު އޮފް ޕޮލިސް ޢަލީ ޝުޖާޢު ބައިވެރިވެވަަޑައިގެންނެވި އެވެ.

އަދި ފުލުހުންގެ އިސްވެރީންނާއި ވަރަށް ގިނަ އަދަދެއްގެ ފުލުހުން ބައިވެރިވެފައިވެ އެވެ.

މި ރަސްމިއްޔާތުގައި ދިދަ ނެގުމާއި ފުލުހުންގެ ޢަޒުމް ކިޔުމާއި ޚާއްސަ ދުޢާއެއް ކުރުން އޮތެވެ.

ދިވެހި ފުލުހުުންގެ ޚިދުމަތް ފެށުނީ 1923 ވަނަ އަހަރު އެވެ. އޭގެ ފަހުން ފުލުހުންގެ ޚިދުމަތަށް އައި އެންމެ ބޮޑު ބަދަލަކީ ދިވެހި އަސްކަރިއްޔާއާ ފުލުހުންގެ ޚިދުމަތް ވަކި ދެ ޚިދުމަތެއްގެ ގޮތުގައި ހިންގަން ފެށުމެވެ.

މުޅި ރާއްޖެއަށް ފުލުހުންގެ ޚިދުމަތް ފުޅާކުރުމަށް ސަރުކާރުން ދަނީ ޚާއްސަ މަސައްކަތްތަކެއް ކުރަމުންނެވެ.

ދިވެހި ފުލުހުންގެ ޚިދުމަތުގެ އަަހަރީ ދުވަހަކީ މާޗް މަހުގެ 29 ވަނަ ދުވަހެވެ.