އަލަށް އަޅާ ހަތަރު ހޮސްޕިޓަލަކާއެކު ސިއްހީ ހިދުމަތްދޭ ތަންތަނުގެ މަސައްކަތް ކުރުމަށް ކޮންޓްރެކްޓަރުންނާ ހެލްތް މިނިސްޓްރީ މިރޭ ހަވާލުކޮށްފި އެވެ.

އަލަށް އަޅާ ހަތަރު ހޮސްޕިޓަލާއެކު ހެލްތް މިނިސްޓްރީން 10 ރަށެއްގެ ސިއްހީ ހިދުމަތްދޭ އާ އިމާރާތުގެ މަސައްކަތް ކޮންޓްރެކްޓަރުންނާ ހަވާލުކުރިއެވެ.

އަލަށް އަޅާ ހޮސްޕިޓަލްތަކުގެ ގޮތުގައި ހިމެނެނީ ނ.ވެލިދޫ ހޮސްޕިޓަލް، ށ.މިލަންދޫ ހޮސްޕިޓަލް، ކ.ތުލުސްދޫ ހޮސްޕިޓަލް، އއ.ރަސްދޫ ހޮސްޕިޓަލެވެ.  އަދި ގއ. ވިލިނގިލީގައި މިހާރު ހުރި ހޮސްޕިޓަލު އިމާރާތުގެ ބަދަލުގައި  ހޮސްޕިޓަލުގެ އާ އިމާރާތެއް އެޅުމަށް ވެސް ރޭގައި ހަވާލުކުރިއެވެ.

މީގެ އިތުރުން މިހާރު ހުރި ސިއްހީ މަރުކަޒުގެ ބަދަލުގައި އދ.ފެންފުށި އަލަށް އާ ސިއްހީ މަރުކަޒު އިމާރާތެއް އެޅުމަށް ވަނީ ހަވާލުކޮށްފަ އެވެ.

ހަމަމިއާއެކު މިހާރު ހުރި ސިއްހީ މަރުކަޒުތައް ތަރައްގީކުރުމަށްޓަކައި އެކްޕެންޝަން މަސައްކަތްތަކެއް ކުރުމަށްވެސް ވަނީ ހަވާލުކޮށްފަ އެވެ. އޭގެ ތެރޭގައި ހިމެނެނީ ބ.ކުޑަރިކިލު، ގއ.ކޮނޑޭ، ގދ.ނަޑެއްލާ، ހދ.ނެއްލައިދޫ ސިއްހީ މަރުކަޒުގެ އެކްޕެންޝަންގެ މަސައްކަތެވެ.

ދައުލަތުގެ ބަޖެޓުން 760 މިލިޔަނަށްވުރެ ގިނަ ރުފިޔާ ހަރަދުކޮށްގެން، އަލަށް ހަދާ ސިއްހީ ހިދުމަތްދޭ ތަންތަނުގެ މަސައްކަތްތައް ހަވާލުކޮށްފައިވަނީ އެމްޓީސީސީ، ފެނަކަ އަދި އާރުޑީސީ އާއެވެ.

އެމްޓީސީސީއާ ހަވާލުކޮށްފައިވަނީ ށ. މިލަންދޫ، ކ. ތުލުސްދޫ، އއ. ރަސްދޫ އަދި ގއ. ވިލިނގިލީގެ ހޮސްޕިޓަލުގެ މަސައްކަތާއި ހދ. ނެއްލައިދޫ ސިއްޙީމަރުކަޒުގެ އާ އިމާރާތުގެ މަސައްކަތެވެ.

ހެލްތު މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އަހުމަދު ގާސިމް އެވެ. އަދި އެމްޓީސީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، ޑެޕިއުޓީ ކޮމިޝަނަރ އޮފް ޕޮލިސް ރިޓަޔަރޑް އަޙްމަދު ސަޢުދީ އެވެ.

ފެނަކަޔާ ހަވާލުކޮށްފައި ވަނީ ބ. ކުޑަރިކިލު، ގއ. ކޮނޑޭ އަދި ގދ. ނަޑެއްލާ ސިއްހީ މަރުކަޒުގެ މަސައްކަތެވެ.

މި އެއްބަސް ވުމުގައި ހެލްތު މިނިސްޓްރީގެ ފަރާތުން މިނިސްޓަރ އޮފް ސްޓޭޓް ފޯ ހެލްތު އިސްމާޢިލް ޢަބްދުﷲ ސޮއި ކުރެއްވިއިރު، ފެނަކައިގެ ފަރާތުން ސޮއެ ކުރެއްވީ މެނޭޖިންގ ޑިރެކްޓަރ، މޭޖަރ ރިޓަޔާޑް މުޙައްމަދު ނަޖާހު އެވެ.

ނ. ވެލިދޫ ހޮސްޕިޓަލުގެ އާ އިމާރާތުގެ މަސައްކަތާ، އދ. ފެންފުށީ ސިއްހީ މަރުކަޒުގެ އާ އިމާރާތުގެ މަސައްކަތް ހަވާލު ކޮށްފައިވަނީ އާރުޑީސީ އާއެވެ. އާރްޑީސީގެ ފަރާތުން މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް ރިޓަޔާޑް ޢަލީ ޒުހެއިރު އެއްބަސްވުމުގައި ސޮއިކުރެއްވިއިރު، ހެލްތު މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އިސްމާޢިލް ޢަބްދުﷲ އެވެ.

މިއަހަރުގެ ދައުލަތުގެ ބަޖެޓުގައި ރާއްޖޭގެ ސިއްހީ ނިޒާމު ހަރުދަނާ ކުރުމަށް ގިނަ މަޝްރޫއުތަކެއް ހިމަނާފައިވެއެވެ.