ENGLISH
04 އޭޕްރީލު 2025
ފަތުރުވެރިކަމުގެ އެއްވަނަ މަންޒިލު ޕްރޮމޯޓު ކުރުމުގަ، ދުނިޔޭގެ އެންމެ ބޮޑު އެއް ކުލަބު
28 މާރިޗު 2025
|
ރާއްޖޭގެ ފަތުރުވެރިކަން ޕްރޮމޯޓު ކުރުމަށް، ލިވަރޕޫލް އެފްސީ އާއެކު އެމްއެމްޕީއާރުސީން ވަނީ އެއްބަސްވުމެއް ހަދާފަ--ފޮޓޯ: އެމްއެމްޕީއާރުސީ
އެންމެ މަޤްބޫލު
3 އޮކްޓޯބަރ 1972 ވަނަ އަހަރު 30 ކޮޓަރިއާއެކު މާލެ އަތޮޅު ވިހަމަނާފުށީގައި ، ކުރުނބާ ވިލެޖްގެ ނަމުގައި ދިވެހިރާއްޖޭގެ އެންމެ ފުރަތަމަ ޓޫރިސްޓު ރިޒޯޓް ހުޅުވިގެން ދިޔައެވެ. އޭގެ ފަހުން މިހާރު 52 އަހަރުވީއިރު، ރާއްޖޭގެ ފަތުރުވެރިކަން ވަނީ އެތައް ގޮތަކުން ކުރިއަރާފައެވެ. ވަރަށް އާދައިގެ ގޮތަކަށް ފެށުނު ދިވެހިރާއްޖޭގެ ޓޫރިޒަމަކީ މިއަދު ރާއްޖޭގެ އެއްވަނަ އިޤުތިޞާދީ ޞިނާޢަތެވެ. އަދި ރާއްޖެ އަށް ލިބޭ އާމްދާނީގެ އެންމެ ބޮޑު އިންސައްތައެއް ހިއްސާކުރަނީ ފަތުރުވެރިކަމުގެ ދާއިރާއެވެ. މިއަދު ދުނިޔޭގޭ ނަން މަޝްހޫރު ގިނަ ބްރޭންޑްތަކުގެ ރިޒޯޓްތައް މި ކުޑަ ކުޑަ ރާއްޖޭގައި އެބަހުއްޓެވެ. ރާއްޖެ ގުނައިލެވެނީ ދުނިޔޭގެ އެންމެ މަތީ ފަންތީގެ ފަތުރުވެރިކަމުގެ މަންޒިލުތަކުގެ ތެރޭގައެވެ.
ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެވޯޑް، ވޯލްޑް ލީޑިން ޓުއަރިޒަމް ޑެސްޓިނޭޝަން، ޖެހިޖެހިގެން 5 ފަހަރު ރާއްޖެއިންވަނީ ކާމިޔާބުކޮށްފައެވެ. މިކަހަލަ ކާމިޔާބީތައް ދެމެހެއްޓުމަށްޓަކާ، އަބަދުވެސް ރާއްޖޭގެ ޓޫރިޒަމް އިތުރަށް މާކެޓު ކުރުމަށް ބޮޑެތި ހަރަދުތަކާއެކު ގިނަ ހަރަކާތްތަކެއް ހިންގައެވެ. ނަމަވެސް މިފަހަކަށް އައިސް ރާއްޖޭގެ ޓޫރިޒަމް ޕްރޮމޯޓްކުރުމަށް އެމްއެމްޕީއާރުސީ އިން މިވަނީ ތާރީހުގައި ލިޔެވޭނެ ވަރުގެ އުއްމީދީ މަސައްކަތްތަކެއް ފަށާފައެވެ.
މިގޮތުން އެންމެ ފާހަގަކޮށްލެވޭ އެއް މަސައްކަތަކީ އިނގިރޭސިވިލާތުގެ އެންމެ ކާމިޔާބު ފުޓުބޯޅަ ކުލަބް، ލިވަރޕޫލް އެފްސީގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް ވިޒިޓް މޯލްޑިވްސް ހަމަޖެއްސުމެވެ. ޔޫރަޕުގެ ޗެމްޕިއަންކަން 6 ފަހަރު އަދި އިނގިރޭސި ފުރަތަމަ ޑިވިޝަންގެ ޗެމްޕިއަންކަން 19 ފަހަރު ހޯދާފައިވާ ލިވަރޕޫލަކީ ދުނިޔޭގެ ފުޓުބޯޅައިގެ ގަދަ ބާރެކެވެ. ދުނިޔޭގެ އެންމެ ވަރުގަދަ ފުޓުބޯޅަ ކުލަބުތަކުގެ ތެރޭގައި ގުނާލެވޭ، ލިވަރޕޫލްގެ މީސްމީޑިޔާ ފޮލޯވަރުންގެ އަދަދު 200 މިލިޔަނަށްވުރެ ގިނައެވެ. ނިމިދިޔަ ސީޒަނުގައިވެސް އެކި އެކި ޒަރިއްޔާ މެދުވެރިކޮށް 471 މިލިޔަން މީހުންވަނީ ލިވަރޕޫލްގެ މެޗުތައް ބަލާފައެވެ.
ލިވަަރޕޫލްގެ ސްޓޭޑުއަމް، އެންފީލްޑްގައި ޓޫރިޒަމް މިނިސަޓަރ އަދި އެމްއެމްޕީއާރުސީގެ ބައެއް އިސްފަރާތްތައް--ފޮޓޯ:އެމްއެމްޕީއާރުސީ
އެމްއެމްޕީއާރުސީއާ ލިވަޕޫލް އެފްސީއާ ދެމެގު ގާއިމުކުރެވުނު ހައި އިމްޕެކްޓް ސްޓްރެޓެޖިކް ޕާޓްނާޝިޕް ރަސްމީކޮށް އިފްތިތާހުކުރާނީ އަންނަ އޭޕްރީލްމަހުގެ 2 ވަނަ ދުވަހު ލިވަޕޫލް އެފްސީ އެވަޓަންއާ ދެކޮޅަށް ކުޅޭ ފޯރިގަދަ މެޗުގައެވެ. މާސޭސައިޑް ޑާބީގެ ނަމުން މަޝްހޫރުވެފައިވާ މި މެޗަކީ ދުނިޔޭގެ ކްލަބް ފުޓުބޯޅައިގަ ކުޅެވޭ އެންމެ ފޯރިގަދަ މެޗު ތަކުގެ ތެރޭގައި ހިމެނޭ މެޗެކެވެ. ގިނަ ބައެއްގެ ސަމާލުކަން ލިބިގެންދާ މި ފޯރިގަދަ މެޗުގައި އެންފީލްޑް ސްޓޭޑިއަމްގެ ލެޑް ބޯޑުތަކުގައި މި ޕާރޓްނާޝިޕާއި ދިވެހިރާއްޖޭގެ މަންޒަރުތައް ދައްކާލުމަށް ވަނީ ހަމަޖެހިފައެވެ.
ލިވަރޕޫލްގެ ސްޓޭޑިއަމްގެ އެކި ސަރަހައްދުތަކުގައި ރާއްޖެ އިސްތިހާރު ކުރުމުގެ އިތުރުން، މި ޕާޓްނާޝިޕްގެ ދަށުން، ޔޫރަޕުގެ އެކި ހިސާބުތަކުގައިވެސް ލިވަޕޫލް އެފްސީ އާ ގުޅިގެން ރާއްޖެ ޕްރޮމޯޓު ކުރުމުގެ ތަފާތު ހަރަކާތްތައް ހިންގުމަށް ހަމަޖެހިފައިވެއެވެ. މީގެ އިތުރުން ރާއްޖޭގައި ލިވަޕޫލް އެކަޑަމީއެއް ގާއިމުކުރުމާ ސްޕޯޓްސް ޓޫރިޒަމް ހަރުދަނާ ކުރުމާއި ޑެސްޓިނޭޝަން ބްރޭންޑިން އިތުރުކުރުން ފަދަ ބޮޑެތި މަންފާތަކެއް ލިބޭނެ އަގުހުރި އެތައް ހަރަކާތެއްވެސް މި ޕާޓްނާޝިޕްގެ ތެރޭގައި ހިމެނެއެވެ.
އެމްއެމްޕީއާރުސީ އިން ވަނީ ، ލިވަޕޫލް އާއެކު ގާއިމުކުރެވުނު ޕާޓްނާޝިޕް އިޝްތިހާރު ކުރުމަށް އިނގިރޭސިވިލާތުގައި އަންނަ މަހުން ފެށިގެން 3 މަސް ދުވަހުގެ ނިޔަލަށް އައުޓްޑޯ ހަރަކާތްތަކެއް ކުރިޔަށް ގެންދިޔުމަށް ނިންމާފައެވެ. މިހަރަކާތުގެ ދަށުން 100 އަށްވުރެ ގިނަ ޓެކްސީގެ އިތުރުން ބަސްތަކުގައިވެސް ރާއްޖޭގެ ރީތި މަންޒަރުތައް ދައްކާލުމަށް ހަމަޖެހިފައިވެއެވެ. އަދި ބޮޑެތި އެއާޕޯޓުތަކާއި ބިޒްނަސް ކްލާސް ލައުންޖުތަކުގައިވެސް ރާއްޖޭގެ ރީތިކަން ދައްކާލުމަށް އިޝްތިހާރުތައް ހަރުކުރެވިގެންދާނެއެވެ. އިނގިރޭސިވިލާތުގެ އިތުރުން ވިޒިޓް މޯލްޑިވްސިއިން އަންނަނީ ޔޫރަޕާއި މެދުއިރުމައްޗާއި އިންޑިއާ އަދި ޗައިނާ ފަދަ މުހިންމު ގައުމުތަކުގައި އޮފިޝަލް ލިވަޕޫލް އެފްސީ ސަޕޯޓާސް ކްލަބްތަކާއެކު ޓާގެޓްޑް ކެމްޕޭންތަކެއް ހިންގުމަށް ރާވަމުންނެވެ. ދުނިޔޭގެ 100 އަށްވުރެ ގައުމުގައި ، 316 އޮފިޝަލް ލިވަޕޫލް ސަޕޯޓާސް ކްލަބް ހިމެނޭއިރު، ލިވަޕޫލާއެކު ހަދައިފައިވާ އެއްބަސްވުމުގެ ސަބަބުން ރާއްޖެއަށް ދުނިޔޭގެ ފެންވަރުގެ ބޮޑު އެކްސްޕޯޝާއެއް ލިބޭނެކަން ކަށަވަރެެވެ.
ރާއްޖޭގެ ފަތުރުވެރިކަން އިޝްތިހާރު ކުރުމަށް ކޮށްފައިވާ އެހެނިހެން މުހިންމު މަސައްކަތްތަކަށް ބަލާލާއިރު، ދުނިޔޭގެ އެންމެ އާބާދީ ބޮޑު ގައުމުކަމަށްވާ، އަވައްޓެރި އިންޑިޔާގެ، މަޝްހޫރު ކުރިކެޓް ކްލަބް ކަމަށްވާ މުމްބާއީ އިންޑިއަންސްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް އެމްއެމްޕީއާރުސީ ހަމަޖެއްސުން ހިމެނެއެވެ. ދުނިޔޭގެ އެންމެ އަގުބޮޑު ކުޅިވަރު ލީގުތަކުގެ ތެރޭގަ ހިމެނޭ އައިޕީއެލް ގެ އެންމެ ކާމިޔާބު ކުލަބު، މުމްބާއީ އިންޑިއަންސްއާ އެކު ވެވުނު އެއްބަސްވުމުގެ ސަބަބުން، އިންޑިޔާގެ އިތުރުން ކްރިކެޓަށް ލޯބިކުރާ ގިނަ ބަޔަކު ދިރިއުޅޭ ސައުތު އޭޝިޔާ ސަރަހައްދުގައިވެސް ރާއްޖޭގެ ޓޫރިޒަމް އިޝްތިހާރުކުރާނެއެވެ. މި ޕާޓްނަޝިޕްގެ ތެރެއިން މުމްބާއީ އިންޑިއަންސްއާއެކު ޑިޖިޓަލް ޕްރޮމޯޝަންތަކާއި، އޮން ގްރައުންޑް އެކްޓިވޭޝަންތަކާއި، ދިވެހިރާއްޖެ އަކީ އެންމެ މަޤްބޫލް ލަގްޒަރީ ޓްރެވަލް މަންޒިލުކަން ދައްކުވައިދޭ ގޮތަށް، ރާއްޖެއަށް ހާއްސަ އެކްސްކްލޫސިވް ތަޖުރިބާތައް ދައްކުވައިދޭ ގޮތަށް ޝައުގުވެރި ކެމްޕޭންތަކެއް ކުރިއަށްގެންދިއުމަށް ހަމަޖެހިފައިވެއެވެ. މިކަމުގެ ސަބަބުން މިއަހަރު 200،000 ފަތުރުވެރިން އިންޑިއާއިން ރާއްޖެ ގެނައުމަށް ކަނޑައަޅައިފައިވާ އަމާޒަށް ވާސިލްވުމަށްވެސް ފަސޭހަވެގެންދާނެކަމަށް އެމްއެމްޕީއާރުސީން މައުލޫމާތުދެއެވެ.
މުމްބާއީ އިންޑިއަންސްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް އެމްއެމްޕީއާރުސީ ވަނީ ހަމަޖައްސާފަ--ފޮޓޯ:އެމްއެމްޕީއާރުސީ
ދިވެހިރާއްޖޭއަކީ ދުނިޔޭގެ އެއް ނަމްބަރު ފަތުރުވެރިކަމުގެ މަންޒިލުގެ ގޮތުގައި ދެމެހެއްޓުމަށް، ދުނިޔޭގެ އެންމެ މަތީ ފަންތީގެ ކުޅިވަރު ކުލަބުތަކާއެކު، ހިންގާ މާކެޓިންގް ހަރަކާތްތަކުގެ ސަބަބުން، ދިވެހިރާއްޖޭގެ ޓޫރިޒަމް މުޅިން އެހެން ހަރުފަތަކަށް ޖެހިލާނެ ކަމަށް ފަތުރުވެރިކަމުގެ ދާއިރާ ދިރާސާ ކުރާ ފަރާތްތަކުން ބުނެއެވެ. ޝައްކެއްވެސް ނެތް ގޮތުގަ ދުނިޔޭގެ އެއްވަނަ ފަތުރުވެރިކަމުގެ މަންޒިލު އިޝްތިހާރުކުރުމަށް ދުނިޔޭގެ އެއްނަމްބަރު ކުލަބުތަކާއެކު މިކުރާ މަސައްކަތުން، ދިވެހިރާއްޖެއަށް ޒިޔާރަތްކުރާ ފަތުރުވެރިން އެތައްގުނައެއް އިތުރުވެގެންދާނެއެވެ.