ENGLISH
04 އޭޕްރީލު 2025
ޤައުމީ ޚިދުމަތަށް ސިފައިން ތައްޔާރު: އޮރެންޖު ހިޔާ ނިންމަން ސިފައިން މަސައްކަތް ފަށައިފި
28 މާރިޗު 2025
|
ސިފައިން އޮރެންޖު ހިޔާގެ މަސައްކަތް ފެށުން -- ފޮޓޯ: އެމްއެންޑީއެފް
އެންމެ މަޤްބޫލު
ހުޅުމާލޭގައި ތެލެސީމިއާ ޕޭޝަންޓުންނަށް ހާއްސަކޮށްގެން ގާއިމުކުރާ އޮރެންޖް ހިޔާގެ މަސައްކަތް ނިންމަން ޤައުމީ ދިފާޢީ ބާރުގެ ސިފައިން މަސައްކަތް ފަށައިފި އެވެ.
އެތަނުގެ މަސައްކަތަށް އަވަހަށް ނިންމަން ސިފައިންނާއި ހަވާލު ކުރައްވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ ވަނީ ވިދާޅުވެފަ އެވެ. "ރައްޔިތުންނާއެކު" މި ނަމުގައި އެމަނިކުފާނު ކުރިޔަށްގެންދަވާ ޕޮޑްކާސްޓްގެ ފުރަތަމަ އެޕިސޯޑްގައި ވާހަކަފުޅު ދައްކަވަމުން ރައީސް ވިދާޅުވީ އޮރެންޖު ހިޔާގައި އަދިވެސް ނުނިމި ވަރަށް ގިނަ މަސައްކަތް އެބަހުރި ކަމަށެވެ.
އެ މަސައްކަތް ހަވާލުކުރި ކޮންޓްރެކްޓަރަށް އެ މަސައްކަތް ނިންމާލެވިފައި ނުވާ ކަމަށާ އަދި ކޮންޓްރެކްޓަރަށް ދީފައިވާ މުއްދަތު މިހާރު ހަމަވެފައިވާ ކަމަށެވެ.
ސިފައިން މިއަދު ބުނީ ހުޅުމާލޭގަ ހުންނަ އޮރެންޖު ހިޔާ އަށް ތެލެސީމިއާ ސެންޓަރު އަވަހަށް ބަދަލުކުުރަން ރައީސުލްޖުމްހޫރިއްޔާ ނިންމެވުމުން ސިފައިން އެ މަސައްކަތް މިއަދު ފަށާފައިވާ ކަމަށެވެ.
ރައީސް ވިދާޅުވީ، އޮރެންޖް ހިޔާ ހުޅުވެންވާއިރަށް އެ ސަރަހައްދަށް ހާއްސަ ބަސް ސްޓޮޕެއް ގާއިމުކުރެވޭނެ ކަމަށެވެ. އަދި އެތަނަށް ދާ ޕޭޝަންޓާއި އޭނާގެ އެހީތެރިޔާއަށް އެމްޓީސީސީގެ ބަސްތަކުގައި ހިލޭ ދަތުރު ކުރެވޭނެ ގޮތް ހަމަޖެހޭނެކަމަށެވެ.
"އެތަނުގެ ހިދުމަތް ހޯދަން ހަމަ ވަރަށް ގިނަ މާލޭގައި ތިބި ތެލެސީމިއާ ކުދިން ވެސް ދާނެ. އަޅުގަނޑު މި ކަނޑައެޅީ، އެމްޓީސީސީގައި މި އޮންނަ ބަސް ސާވިސްގެ ތެރެއިން އެތަނަށް ހާއްސަ ބަސް ސްޓޮޕެއް ކަނޑައަޅަން، އެތަނަށް މަޑުކުރާ ގޮތަށް. އެތަން ހުޅުވެން ވާއިރަށް، އޮރެންޖް ހިޔާ ހުޅުވެން ވާއިރަށް ހުންނާނީ ހަމަޖެހިފައި " - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ތެެލަސީމިއާ ސެންޓަރުގެ ހާލަތު ދަށްކަމަށް ބުނެ އިހުތިޖާޖުކުރުމާއެކު ރައީސް ވަނީ މި މަހުގެ 23 ވަނަ ދުވަހު ތެލެސީމިއާ ސެންޓަރަށް ޒިޔާރަތްކުރައްވާ އެތަނުގެ ހާލަތު ގާތުން ބައްލަވައި އެތަނުގައި، ރައީސް އަބްދުﷲ ޔާމީނުގެ ވެރިކަމުން ފެށިގެން އެ ސެންޓަރުގައި ޑިރެކްޓާ ޖެނެރަލެއް ނެތުމުން އެ މަގާމަށް އަޙްމަދު މަޢުޞޫމު އައްޔަންކުރައްވާފައިވެއެވެ.
މީގެއިތުރުން، ޑެޕިއުޓީ ޑިރެކްޓާ ޖެނެރަލަކާއި، ޑިރެކްޓާއެއްގެ މަގާމަށް ދެ ބޭފުޅަކު ކުރިއަށް އޮތް ދުވަސްތަކުގައި ހަމަޖެހިގެންދާނެކަމުގެ ޔަގީންކަން ވެސް ރައީސް ދެއްވާފައިވެއެވެ. ތެލެސީމިއާ ސެންޓަރުގައި މަސައްކަތް ކުރާ ނަރުހުން މަދުވުމުން، އެކަން ހައްލު ކުރުމަށްޓަކައި، ރައީސް ވަނީ ފިނޭންސް މިނިސްޓްރީ އިން ބަޖެޓް ހަމަޖައްސަވައިދެއްވާފައެވެ. ހެލްތު މިނިސްޓްރީންވަނީ އެތަނަށް ފަސް ނަރުހުން ހޯދުމަށް އިއުލާނު ކޮށްފައެވެ.
ޕޮޑްކާސްޓްގައި ތެލެސީމިއާ ސެންޓަރުގެ ވާހަކަތައް ފާހަގަކުރައްވާ ރައީސް ވިދާޅުވީ، އެތަނުގެ ހާލަތު ރަނގަޅު ކުރުމުގެ މަސައްކަތް މިހާރު ކުރިޔަށްދާކަމަށެވެ. އަދި އެ މަސައްކަތްތަށް އެމަނިކުފާނު ވަރަށް ގާތުން ބައްލަވަމުންދާކަން ފާހަގަކުރެއްވިއެވެ.