ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ ޝަރީއާ ކޮމްޕްލަޔަންޓް ލޯނުތަކަށް ހެއްދެވުމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ރޭ އެދިވަޑައިގެންނެވުމާއި ގުޅިގެން އެކަން މިއަދުން ފެށިގެން ތަންފީޒުކުރަން ފަށައިފި އެވެ. 

ހަޔާ އެޑިއުކޭޝަން މިނިސްޓްރީން މިއަދު ނެރުނު ބަޔާނުގައި ބުނެފައިވަނީ އެ ވުޒާރާއިން ކުރިއަށް އޮތްތަނުގައި ދޫކުރާ އެންމެހައި ސްޓޫޑަންޓް ލޯނުތައް އަނބުރާ ދައްކާއިރު ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް ފައިސާއެއް އިތުރަށް ނުނެގުމަށް ނިންމާފައިވާ ކަމަށެވެ.

އަދި މިހާރު ދޫކޮށްފައިވާ ސްޓޫޑަންޓް ލޯނުތަކަށް އެޑްމިނިސްޓްރޭޝަން ފީ ނުނެގުމަށާއި އެ ނިންމުން ތަންފީޒުކުރުމަށްޓަކައި މިހާރު ދޫކޮށްފައިވާ ލޯނުތަކަށް އެޑްމިނިސްޓްރޭޝަން ފީގެ ގޮތުގައި ނަގާފައިވާ އެއް ޕަަސަންޓްގެ އެޑްމިނިސްޓްރޭޝަން ފީ ކަނޑާލުމަށްފަހު ލޯނު އަނބުރާ ދައްކާ ގޮތަށް ހަމަޖައްސާފައިވާ ކަމަށް ވެސް އެ ވުޒާރާއިން ވަނީ ބުނެފަ އެވެ.

ހަޔާ އެޑިއުކޭޝަންގެ ބަޔާނުގައި، ރައީސުލްޖުމްހޫރިއްޔާގެ އެ ނިންމެވުމުން ދައްކައިދެނީ ސައްތައިން ސައްްތަ މުސްލިމު މި ޤައުމުގައި ފައިސާއާ ގުޅޭ ކަންތައްތައް އިސްލާމް ދީނުގައި ކަނޑައަޅާފައިވާ އިންތަކާއި މިންތަކުގައި ބެހެއްޓެވުމަށް ރައީސުލް ޖުމްހޫރިއްޔާ ދެއްވާ އިސްކަންކަމުގައި ފާހަގަކޮށްފައިވެ އެވެ. އެހެންވެ އެ މުހިންމު އަދި ބޭނުންތެރި އެ ނިންމުމަށް ރައީސަށް މިނިސްޓްރީން ޝުކުރު އަދާކުރިއެވެ. 

ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ، އިސްލާމީ ހަމަތަކަށް ފެތޭ، "ޝަރީޢާ ކޮމްޕްލަޔަންޓް" ލޯނުތަކަކަށް ހެދުމަށްޓަކައި ކަމާ ބެހޭ ފަރާތްތަކަށް އިރުޝާދުތަކެއް ދެއްވައި އެކަންކަން ތަންފީޒު ކުރެއްވުމަށް އެންގެވިކަން ރައީސް ހާމަކުރެއްވީ ރޭގަ އެވެ.

އެމަނިކުފާނު އިރުޝާދު ދެއްވި ކަންކަމުގެ ތެރޭގައި، ކުރިން ލޯނު ނަގާއިފައިވާ ފަރާތްތަކުން ދައްކަން ހުންނަ ފައިސާއިން އެޑްމިނިސްޓްރޭޓިވް ފީ އުނިކޮށް ދަރިވަރުންގެ ލޯނު އަދަދުތައް އަލުން އެޖަސްޓްކުރުން ހިމެނެ އެވެ.

މީގެއިތުރުން ލޯނާއެކު ހިމެނިފައިވާ %1 އެޑްމިނިސްޓްރޭޓިވް ފީ ގެ ގޮތުގައި ނަގަމުންދާ އަދަދު އެއްކޮށް އުނިކުރުމަށް އަންގަވާފައިވާއިރު ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ޗާޖް ނުކުރުމަށް އެމަނިކުފާނު އިރުޝާދު ދެއްވި އެވެ.