މިއަދު، ތައިލެންޑާއި މިޔަންމާއަށް އައި ބާރުގަދަ ބިންހެލުމާ ގުޅިގެން، ގިނަ އަދަދެއްގެ ދިވެހިން ދިރިއުޅޭ ބެންކޮކަށް ބޮޑެތި ގެއްލުންތަކެއް ލިބިފައިވާއިރު މިހާތަނަށް އެއްވެސް ދިވެއްސަކަށް އަނިޔާ ލިބިފައިވާކަމުގެ ރިޕޯޓެއް ލިބިފައި ނުވާ ކަމަށް ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު ފުއާދު ތައުފީގު ވިދާޅުވެއްޖެއެވެ. 

“އެމްއެމްޓީވީ” އަށް މައުލޫމާތު ދެއްވަމުން ފުއާދު ވިދާޅުވީ ބިންހެލުމުގައި އެއްވެސް ދިވެއްސަކަށް އަނިޔާއެއްވެފައިވޭތޯ ބަލަމުން އަންނަ ކަމަށާއި މިހާތަނަށް ބެލި ބެލުމުން އެއްވެސް ދިވެއްސަކަށް ގެއްލުމެއް ވެގެން ރިޕޯޓް ކޮށްފައި ނުވާ ކަމަށެވެ.

ސަފީރު ވިދާޅުވީ އެންބަސީން އަންނަނީ ދިވެހިންގެ ހާލު ވަރަށް ގާތުން ބަލަމުން ކަމަށާ އެމްބަސީގެ ދަފްތަރުގައި ހުރި ނަންބަރުތަކަށް ގުޅައި އެންމެންގެ ހާލު ބަލަމުން އަންނަ ކަމަށެވެ. އަދި ގާއިމުކޮށްފައިވާ ވައިބާ ކޮމިއުނިޓީ ގްރޫޕާ ހޮސްޕިޓަލްތައް މެދުވެރިކޮށް ވެސް ޚަބަރު ބަލަމުންދާ ކަމަށެވެ. 

މިކަމާ ގުޅިގެން ފޮރިން މިނިސްޓްރީން ނެރުނު ބަޔާނެއްގައި ބުނީ މިއަދު، ތައިލެންޑާއި މިޔަންމާއަށް އައި ބާރުގަދަ ބިންހެލުމާ ގުޅިގެން، އެ މިނިސްޓްރީން އަންނަނީ އެ ދެ ގައުމުގެ ހާލަތު މޮނިޓަރ ކުރަމުން ކަމަށެވެ.

އެގޮތުން، ތައިލެންޑްގައި ދިރިއުޅޭ ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ތައިލެންޑްގައި ހުންނަ ދިވެހިރާއްޖޭގެ އެމްބަސީ މެދުވެރިކޮށް މިނިސްޓްރީ އިން މަސައްކަތް ކުރަމުން އަންނަ ކަން ބަޔާނުގައި ފާހަގަކޮށްފައިވެއެވެ.

ބަޔާނުގައި ބުނީ 
މިހާތަނަށް ބެލިބެލުމުން އެ ގައުމުގައި ދިރިއުޅޭ ދިވެހިންގެ ހާލު ރަނގަޅުކަމަށް މައުލޫމާތު ލިބިފައިވާ ކަމަށެވެ. އަދި މިޔަންމާގައި އެއްވެސް ދިވެހި ރައްޔިތަކު މިވަގުތު ހުރިތޯބެލުމަށް ޑިޕްލޮމެޓިކް ޗެނަލްތައް މެދުވެރިކޮށް މަސައްކަތް ކުރަމުންދާ ކަމަށެވެ. 

މި ކާރިސާއާ ގުޅިގެން ތައިލެންޑާއި މިޔަންމާއިން ވަނީ ކުއްލި ހާލަތު އިއުލާނު ކޮށްފައެވެ. ވުމާއެކު، އެ ދެ ގައުމުގެ ކަމާބެހޭ އިދާރާތަކުން މިކަމާ ގުޅިގެން އަންގާ އެންގުންތަކަށް ސަމާލުވެ އެއާ އެއްގޮތަށް އަމަލު ކުރުމަށް، އެ ދެ ގައުމުގައި ތިބި ދިވެހި ރައްޔިތުންނަށް މިނިސްޓްރީން އިލްތިމާސް ކޮށްފައިވެއެވެ. 

މިނިސްޓްރީން ބުނީ މި ކާރިސާއާގުޅިގެން، ތައިލެންޑްގައި ތިބި ދިވެހި ރައްޔިތުންގެ ތެރެއިން އެއްވެސް ބޭފުޅަކު އެހީތެރިކަމެއް ބޭނުންފުޅުވާނަމަ، ނުވަތަ އިތުރު މައުލޫމާތު ސާފުކުރައްވަން ބޭނުންފުޅުވާނަމަ، ތައިލެންޑްގައި ހުންނަ ދިވެހިރާއްޖޭގެ އެމްބަސީގެ ހޮޓްލައިން ނަންބަރަށް ނުވަތަ މިނިސްޓްރީގެ ހޮޓްލައިން ނަންބަރަށް ގުޅުއްވުމަށް އެދޭކަމަށެވެ.