ޢީދަށް ދިއްލުމަށް ބޭނުންވާ ސާމާނު ރަށްތަކަށް ފޮނުވާ ނިމިއްޖެ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އާދަމް ޝަރީފު ޢުމަރު ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ ދައުލަތުގެ މީޑިއާއަށް ދެއްވި އިންޓަވިޔުއެއްގައެވެ.  

މިނިސްޓަރ ވިދާޅުވީ ފިޠުރު ޢީދުގައި ރާއްޖޭގެ ރަށްތައް ކުލަ ބޮކިތަކުން ޒީނަތްތެރިކުރުމަށް ބޭނުންވާ ސާމާނު، މި ޢީދުގައި، އަލަށް ދިއްލުމަށް ކަނޑައަޅައިފައިވާ 36 ރަށަށް ފޮނުވާ ނިމިފައިވާ ކަމަށެވެ. މިދިޔަ އަހަރު ދިއްލި ރަށްތަކާއެކު މި އަހަރު ޖުމްލަ 64 ރަށެއް ޢީދު އަލިން ދިއްލައިލުމަށް ވަނީ ހަމަޖެހިފައެވެ. 

މިހާރު ނުފޮނުވި ހުރި ގިޑިގެތައް ވެސް މިއަދު ރަށްތަކަށް ފޮނުވާ ނިމޭނެކަމަށް މިނިސްޓަރ ވިދާޅުވިއެވެ. އަދި މާލެ ސިޓީގައި ހުރިހާ ލައިޓެއް ހަރުކޮށް ނިމިފައިވާ ކަމަށާއި، މިހާރު ކުރެވެމުން ދަނީ ޓެސްޓްކުރުމުގެ މަސައްކަތް ކަމަށް މިނިސްޓަރ ވިދާޅުވިއެވެ. 

މި މަސައްކަތް ކުރުމުގައި ސަރުކާރުގެ އެކި މުއައްސަސާތަކުގެ އެހީތެރިކަން ލިބެމުންދާކަން މިނިސްޓަރ ވަނީ ފާހަގަ ކުރައްވާފައެވެ. 

މި އަހަރު އީދު އަލިން މުޅި ރާއްޖެ ދިއްލައިލުމަށް ބާއްވާ ބޮޑު އިވެންޓް ބެއްވުމަށް ހަމަޖެހިފައި ވަނީ މި މަހުގެ 29 ވަނަ ދުވަހުގެ ރޭ 9.30 ގައި ހުޅުމާލޭ ސެންޓްރަލް ޕާކުގައެވެ. މިއީ ގިނަ ބަޔަކަށް ބައިވެރިވެވޭ ގޮތަށް އިންތިޒާމު ކުރަމުން އަންނަ ޙަރަކާތެކެވެ.