ޅ. ނައިފަރު ގުރުއާން ލާނިންގ ސެންޓަރު ތަރައްގީކުރުމަށް ވަޤުފު ފަންޑުން އެހީ ފޯރުކޮށްދިނުމަށް ނިންމާފައިވާކަމަށް އިސްލާމިކް މިނިސްޓަރ ޑރ. މުހައްމަދް ޝަހީމް އަލީ ސައީދު ވިދާޅުވެއްޖެއެވެ. 

މީޑިއާތަކާ ހިއްސާކުރެއްވި މެސެޖެއްގައި މިނިސްޓަރު ވިދާޅުވީ ގިނަ ކުދިންތަކެއް ގުރުއާން ހިތުދަސްކުރި، ނައިފަރުގެ ގުރުއާން ލާނިންގ ސެންޓަރު ތަރައްގީކުރުމަށް ބޭނުންވާ ވަސީލަތްތައް ހޯދުމަށް އެދިފައިވާ ކަމަށެވެ.

އެހެންކަމުން މިނިސްޓްރީގެ އިސްލާމީ ވަޤުފު ފަންޑުން އެހީ ފޯރުކޮށްދިނުމަށް ނިންމާފައިވާކަމަށް މިނިސްޓަރ ޝަހީމް ވިދާޅުވިއެވެ.

ކީރިތި ގުރުއާން ހިތުދަސްކޮށްފައިވާ ހާފިޒުން ދަސްވެނިވުން ފާހަގަކުރައްވައި ސަނަދު ދެއްވުމަށް ރާއްޖޭގައި ބޭއްވި ފުރަތަމަ ޖަލްސާގައި އެއް ރަށަކުން އެންމެ ގިނަ ކުދިން ހާފިޒު ކަމުގެ ސަނަދު ހޯދީ ނައިފަރުންނެވެ. އެރަށުގެ ހަ ކުއްޖަކު އެރޭ ވަނީ ހާފިޒުކަމުގެ ސަނަދު ހާސިލްކޮށްފައެވެ.

އެ ޖަލްސާގައި ވާހަކަދައްކަވަމުން މިނިސްޓަރު ޝަހީމް ވިދާޅުވެފައިވަނީ އިސްލާމީ މަރުކަޒެއް ގާއިމުވެފައިވާ ކޮންމެ ރަށެއްގައި ގުރުއާން ހިތުދަސްކުުރުމުގެ މަޝްރޫއު ފުޅާކޮށް ކުރިއަށް ގެންދަވާނެ ކަމަށާއި ހުރިހާ ރަށެއްގައި މިސްކިތްތަކުގައި އެ މަޝްރޫއު ކުރިއަށް ގެންދަވާނެ ކަމަށެވެ.

އޭގެ އިތުރުން ކީރިތި ގުރުއާން ކިޔަވައިދޭ ސެންޓަރުތަކާއި ކްލާސްތަކާއި ހިފްޒު ކްލާސްތަކަށް ސަރުކާރުން އެހީތެރިވެ ދެއްވާނެ ކަމަށެވެ.