މުއުމިނުންގެ ހެޔޮ ޢަމަލުތަކަކީ، ކުރެވޭ ފާފަތައް ފޮހެލާ ކައްފާރާއެއް ކަމަށާ އަދި ފުރިހަމަ މުއުމިނުންނަކީ މަރު ބައްދަލު ކޮށްފުމަށް ދާންދެން ހެޔޮ ޢަމަލުތައް ކުރުންމަތީ ދެމިތިބޭ މީހުން ކަމުގައި މިއަދުގެ ޚުތުބާގައި ބުނެފިއެވެ.

ބަރަކާތްތެރި ރަމަޟާން މަސް އަހަރެމެންނާއި އަލްވަދާޢު ކިޔަމުންދާއިރު، މިއަދުގެ ޚުތުބާ ޚާއްސާ ކޮށްފައިވަނީ، ރަމަޟާން މަހަށް ފަހުވެސް ހެޔޮ ޢަމަލުކުރުން މަތީ ދެމިތިބުމުގެ މުހިންމުކަމުގެ މަށްޗަށެވެ. އަޅުކަންކުރުމަކީ، الله سُبْحَانَهُ وَتَعَالَى އަހަރެމެން ޚަލްޤުކުރައްވައި، އަހަރެމެންގެ މައްޗަށް ވާޖިބުކުރައްވައިފައިވާ ކަމެއްކަން ބާޔާންކުރަމުން ޚުތުބާގައި ބުނެފައިވަނީ، އަޅުކަންކުރުމަކީ، ހަމައެކަނި ވަކި މޫސުމަކާ ގުޅިފައި އޮންނާންވާނޭ ކަމެއް ނޫންކަމުގައެވެ. އެހެން ކަމުން ރަމަޟާން މަސް ނިމުނު ކަމުގައިވިޔަސް ފުރިހަމަ މުސްލިމުންނަކީ އަޅުކަމުގައި ދެމިތިބޭނެ ބައެއްކަމުގައި ޚުތުބާގައިވަނީ ފާހަގަކޮށްފައެވެ.

ރަމަޟާންމަހުގެ އެންމެ ފަހު ދުވަސްތައް މިހާރު ގުނަމުންދާއިރު، ދީލަތިވަންތަ  الله سُبْحَانَهُ وَتَعَالَى މުއުމިނުންނަށްޓަކައި ލައްވަވާފައިވާ ޝައްވާލު މަހުގެ ހަ ރޯދައިގެ ނިޢުމަތް އެންމެ ފުރިހަމަ ގޮތުގައި ލިބިގަތުމަށް ވެސް މިއަދުގެ ޚުތުބާގައި ވަނީ ގޮވާލައިފައެވެ. ޝައްވާލު މަހުގެ ހަ ރޯދައިގެ މަތިވެރިކަން ބަޔާންކުރައްވާ މާތް ނަބިއްޔާ ޙަދީޘްކުރައްވާފައިވެއެވެ. (مَنْ صَامَ رَمَضَانَ ثُـمَّ أَتْبَعَهُ سِتًّا مِنْ شَوَّالٍ، كَانَ كَصِيَامِ الدَّهْرِ) މާނައީ: "ރަމަޟާންމަހު ރޯދަ ހިފައި އެއާ ވިދިގެން ޝައްވާލު މަހުން ހަ ދުވަހު ރޯދަ ހިފި މީހާ މުޅި އަހަރު ރޯދަހިފި ފަދައެވެ."

ޝައްވާލު މަހުގެ ހަ ރޯދަ އަކީ ނިމިގެން މިދާ ރަމަޟާން މަހު، އަޅުކަމުގައި ފަރުވާ ކުޑަކުރެވިފައިވާ ފަރާތްތަކަށް ހެޔޮއަމަލު ކުރުމަށް ލިބިގެންދާ ރަނުގެ ފުރުސަތެއްކަމުގައި ވެސް ޚުތުބާގައި ވަނީ ފާހަގަކޮށްފައެވެ.

މާޔޫސްނުވެ ހެޔޮ ކަންކަންކުރުންމަތީ ދެމިތިބުމަށް ނަސޭހަތްތެރިވަމުން ޚުތުބާގައި ވަނީ ގިނަގިނައިން ތައުބާވެ، މާތް ﷲ އަށް އިސްތިޣުފާރުކުރުމަށް ނަސޭހަތްތެރިވެފައެވެ. އެކަލާނގެއީ ތައުބާވާ މީހުންގެ ތައުބާ ޤަބޫލުކުރައްވާ ފާފަފުއްސަވާ ރަސްކަލާނގެ ކަމަށާއި އަދި އެކަލާނގެއީ އެކަލާނގެ ކޯފާއަށް ވުރެ ރަޙުމަތް ތަނަވަސްވެގެންވާ ރަސްކަލާނގެ ކަމުގައިވެސް ޚުތުބާގައި ފާހަގަކޮށްފައިވެއެވެ. އެހެން ކަމުން ހެޔޮ ޢަމަލުކުރުންމަތީ ދެމިތިބެ، ވަންނަން ބޭނުން ކޮންމެ މީހަަކަށްވެސް ހުޅުވިފައިވާ މާތް ﷲ ގެ ރަހުމަތުގެ ދޮރުކޮޅަށް ވަނުމަށް އަވަސްވެގަތުމަށްވެސް ޚުތުބާގައިވަނީ ނަސޭހަތްތެރިވެފައެވެ.

ރަމަޟާން މަސް ނިމުމުންވެސް ފަރުޟު ފަސްް ނަމާދު ގަވާއިދުން ކުރުމަށާއި، ކޮންމެ ދުވަހަކުވެސް ކީރިތި ޤުރުއާނުގެ އެންމެ ސަފުހާއެއް ނަމަވެސް ކިޔަވާ، ކިތަންމެ މަދުން ކުރެވުނަސް ހެޔޮއަމަލު ކުރުމުގަައި ދެމިހުރުމުގެ މުހިންމުކަމަށް ހުތުބާގައިވަނީ އަލި އަޅުވާލާފައެވެ. ކީރިތި ރަސޫލާ ޙަދީޘްކުރައްވައިފައި ވެއެވެ. (أَحَبُّ الْأَعْمَالِ إِلَى اللهِ تَعَالَى أَدْوَمُهَا وَإِنْ قَلَّ)  މާނައީ: "މާތް ﷲ ގެ ހަޟުރަތުގައި އެންމެ ލޮބުވެތިކަން ބޮޑު ޢަމަލަކީ، ކިތަންމެ މަދުން ނަމަވެސް، އެ ޢަމަލެއްކުރުމުގައި ދެމިހުންނަ ޢަމަލެކެވެ."

ރަމަޟާން މަހާ ވިދިގެން އަދާކުރުމަށް އަމުރުކުރައްވައިފައިވާ ފިތުރު ޒަކާތަކީ، ރޯދަ މަހު ރޯދަހިފިއިރު ކުރެވިފައިވާ އުނި ކަންކަން ފޫބައްދައިދޭ އަޅުކަމެއްކަމުގައި ޚުތުބާގައިވަނީ ފާހަގަކޮށްފައެވެ. ޢީދުވިލޭރެއާއި ޢީދު ދުވަހު ކެއިންބުއިމަށް ފުދި އިތުރުވާ ކޮންމެ މީހެއްގެ މަތީން މި ޒަކާތް ނެރުން ވާޖިބުވެގެންވާނެ ކަމަށާއި އެހެން ކަމުން ހުރިހާ ފަރާާތްތަކުން ވެސް ފިރުތު ޒަކާތް ދެއްކުމަށް އަވަސްވެގަތުމަށް ޚުތުބާގައިވަނީ ގޮވާލައިފައެވެ.