ENGLISH

04 އޭޕްރީލު 2025

Advertisement

އިދިކޮޅު ސިޔާސީ ޕާޓީތަކުގެ ހަމައެކަނި ޒިންމާއަކީ ސަރުކާރުން ކުރާ ކޮންމެ ކަމަކަށް ފާޑު ކިޔައި، ހަޖޫ ޖެހުންތޯ؟

28 މާރިޗު 2025

|

އަލްޤާޤާޢު

އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލާއި އެ ޕާޓީގެ މުސްތަޝާރު ކުރީގެ ރައީސް އިބްރާހީމް މުހައްމަދު ސޯލިހު، ފޮޓޯ: ސަން

ސަރުކާރުން ކުރާ ކަންކަމަށް އިދިކޮޅު ފަރާތްތަކުންނާއި އެ ފަރާތްތަކަށް ތާއީދުކުރާ އެކިއެކި ޒާތުގެ މީޑީއާތަކުން އަމާޒުކުރާ ފާޑުކިޔުންތައް ފަހަކަށް އައިސް ދަނީ އިތުރުވަމުންނެވެ. ސަރުކާރުން ކުރާ އެއްވެސް ކަމަކީ ރަނގަޅު ކަމެއްގެ ގޮތުގައި ބަލައިނުގަންނައިރު މުޅިންވެސް ފެންނަނީ ފާޑު ކިޔާ މަންޒަރެވެ. އެންމެ އާދައިގެ ކުދި ކަންކަމުން ފެށިގެން، ސަރުކާރުގެ އެންމެ މުހިއްމު ނިންމެވުންތަކަށް ބެލިޔަސް، ނޫނީ ކުށްކުރާ މީހަކާއި ދެކޮޅަށް ފިޔަވަޅެއް އެޅިޔަސް ފެންނަނީ އިދިކޮޅު ފަރާތްތަކުން އެކަންކަމާއި ދެކޮޅަށް ވާހަކަ ދައްކާ ފާޑު ކިޔާ މަންޒަރެވެ. ސަރުކާރާއި މެދު ރައްޔިތުން ތެރޭގައި ނުތަނަވަސްކަން އުފެއްދޭނެ ގޮތެއް ހޯދުމަކީ އިދިކޮޅުގެ މައިގަނޑު މަސައްކަތޭ ބުނުން އެއީ ބަޔަކު ހިތްހަމަނުޖެހުނަސް ހަގީގަތެވެ. ރާއްޖޭގައި ސިޔާސީ ކަންކަންހިނގާ ގޮތަށް ބަލާއިރު އިދިކޮޅު ސިޔާސީ ޕާޓީތަކުގެ މައިގަނޑު ދައުރަކީ ސަރުކާރުން ކުރާ ކޮންމެ ކަމަކަށް ފާޑު ކިޔޫމާއި ހަޖޫ ޖެހުންކަން އޮތީ ތާރީޚުން ވެސް ފެންނާށެވެ. ސަރުކާރާއި ގުޅިގެން ގައުމުގެ ލާބައާއި މަންފާއަށް މަސައްކަތެއް ނުކުރާތާ ބައެއް ޕާޓީތައް އިދިކޮޅުގައި އޮންނައިރު މުޅިންވެސް ފެންނަނީ ގައުމުގެ ހަމަޖެހުން ނަގާލައި، އިގްތިސާދީ ކުރިއެރުމާއި ތަރައްގީއަށް ހުރަސް އެޅޭ ގޮތަށް ސިޔާސީ ހަރަކާތްތައް ހިންގާ މަންޒަރެވެ. ބައެއް ފަހަރު އެފަދަ ހަރަކާތްތަކުގެ ތެރެއިން ދިވެހިންގެ އާދަކާދައާއި އިސްލާމީ އުސޫލުތަކާއި ހިލާފު ޢަމަލުތައް ވެސް ދަނީ ފެންނަމުންނެވެ. މިއީ ޒިންމާދާރު އިދިކޮޅު ޕާޓީއެއްގެ ފަރާތުން ފެންނަންޖެހޭނެ ފަދަ މަންޒަރުތަކެއް ނޫނެވެ. ސަރުކާރަށް ފާރަވެރިވުމާއެކު، ރައްޔިތުންނާއި ގައުމުގެ ކުރިއެރުމަށް ކުރާ މަސައްކަތްތަކުގައި އިދިކޮޅު ސިޔާސީ ޕާޓީތަކުން އެއްބާރުލުން ދިނުމަކީ ތަހުޒީބު މުޖްތަމަޢުތަކުގައި އެކަން ކުރަމުން އަންނަ އޫސޫލެވެ. ސިޔާސީގޮތުން ކިތަންމެ ވާދަވެރީ ނަމަވެސް، ގައުމީ މަސްލަހަތު ހިމެނޭ ކަންކަމުގައި ގުޅިގެން މަސައްކަތް ކުރުމަކީ ފޮތެއްގައި ލިޔެވިފައި ނެތަސް ތަހުޒީބުވެފައިވާ މުޖްތަމަޢުތަކުގައި ޢަމަލުކުރަމުން އަންނަ އުސޫލެކެވެ. ރާއްޖެއަށް މަލްޓި ޕާޓީ ޑިމޮކްރަސީ ތަޢާރަފްވިތާ 20 އަހަރު މިއަހަރު ފުރޭއިރު، ސިޔާސީ މައިދާނުގައި އުޅޭ ގިނަ ބޭފުޅުން އަދިވެސް ޒިންމާދާރުކަމާއެކު މަސައްކަތްނުކުރާ ކަމަށް ބުނުމަކީ ދޮގަކަށް ނުވާނެއެވެ. ސިޔާސީ ގޭމް ނުވަތަ ސިޔާސީ ކުޅި މޮޅަށް ކުޅެން އެނގިވަޑައިގަންނަވާ ބޭފުޅުން މަދުވުމަކީ، ސިޔާސީގޮތުން ނާތަހުޒީބު ޢަމަލުތައް ފެންނަ މައިގަނޑު އެއް ސަބަބެވެ. އޭގެ އެއް މިސާލަކީ މި ރޯދަމަހު ބަޔަކު ގުރުއާން ކިޔަންވަން ތިބި ތަނެއްގެ ބޭރަށް އެއްވެ، ހަޑިހުތުރު ބަހުން ކުޑަކުދިންނަށް ފުރައްސާރަކޮށް ހިނގި ޢަމަލެވެ. އެ އަމަލު ހިންގި މައިގަނޑު ސަބަބަކީ ސިއްހަތަށް ނުރައްކާތެރި އެއްޗެއްކަމަށްވާ ވޭޕް ސަރުކާރުން މަނާކޮށް، ސިނގިރޭޓް އަގުބޮޑުކުރުމެވެ.

ބަޔަކު ހަނދާން ނެތަސް މިއަދު އެންމެ ގަދައަށް އަޑުގަދަކުރާ ފަރާތްތަކުގެ ވެރިކަމުގައިވެސް ވަނީ ސިނގިރޭޓާއި ދުންފަތާއި ގުޅޭ އެހެން ތަކެތީގެ އަގުބޮޑު ކޮށްފައެވެ. އޭރު އެކަންކުރީ ދައުލަތަށް ލިބޭ އާމްދަނީ އިތުރުކުރަންކަން އޭރު ވެރިކަމުގައި ތިއްބެވި ބޭފުޅުން ވަނީ ހާމަވެސް ކޮށްފައެވެ. މިއަދު ރައީސް މުއިއްޒުގެ ސަރުކާރުން ދުންފަތުގެ ޑިއުޓީ ބޮޑުކުރީ އެތަކެތިން ނަގާ އިންޕޯޓް ޑިއުޓީ ބޮޑުކޮށްގެން ބޮޑު އާމްދަނީއެއް ހޯދަންކަމަށް އިދިކޮޅު ފަރާތްތަކުން ބުނާއިރު ސިނގިރޭޓުން ލިބޭ އިންޕޯޓް ޑިއުޓީ ބޮޑުނުކޮށްވެސް ސަރުކާރަށް އާމްދަނީ ހޯދޭނެ އެތައް ގޮތެއް އެބައޮތްކަން އިޤްތިޞާދީ ތަޖުރިބާކާރުންނަށް އެނގިވަޑައިގަންނަވާއެވެ. އަދި ލިބޭ އާމްދަނީ އިތުރުކުރަން ބޭނުންވާނަމަ ވޭޕް މަނާކުރުމުގެ ބަދަލުގައި އޭގެއިން ނަގާ ޑިއުޓީ ބޮޑުކޮށްގެން، ބޮޑު އާމްދަނީއެއް ހޯދުމުގެ ފުރުސަތުވެސް ސަރުކާރަށް އެބައޮތެވެ. މީގެއިތުރުން ވޭޕާއި ސިނގިރޭޓާއި ގުޅިގެން އަޅާ ފިޔަވަޅުތަކުން ސިޔާސީގޮތުން ކުރިމަތިވާނެ އުނދަގޫތަކުން ރެކެން ބޭނުންވާނަމަ، ސިނގިރޭޓް އަގު ކުރިން ހުރި ވަރަށްވުރެވެސް ހެޔޮކޮށް، ސިޔާސީގޮތުން މެޑަލްތައްވެސް ޖެހުމުގެ ފުރުސަތުވެސް ރައީސް މުޢިއްޒުގެ ސަރުކާރަށް އެބައޮތެވެ. ނަމަވެސް ވޭޕް މަނާކޮށް، ދުންފަތް އަގުބޮޑުކުރުމަށް ރައީސުލްޖުމްހުރިއްޔާ ޑރ.މުހައްމަދު މުއިއްޒު ނިންމެވި ނިންމެވުމަކީ ވަރަށް މާތް މަގްސަދެއްގައި ނިންމެވި ނިންމެވުމެކެވެ. އެއީ އަންނާން އޮތް ޖީލުތަކާޢި މިހާރު އޮތް ޒުވާން ޖީލާއި އަޅުގަނޑުމެން ކުޑަކުޑަކުދީންގެ މުސްތަޤްބަލަށްޓަކައި ނިންމެވި ޤައުމީ ނިންމެވުމެކެވެ. އަދި ދުންފަތުގެ ބާވަތްތަކުން ނަގާ ޑިއުޓީ ބޮޑުކޮށްގެން ލިބޭ އާމްދަނީ ދުންފަތުން ދުރުހެލިވުމަށް ބޭނުންވާ ފަރާތްތަކުގެ ފަރުވާއަށް ހޭދަކުރެއްވުމަށް ރައީސް މުޢިއްޒު ނިންމެވި ނިންމެވުންވެސް އެކަން ކުރީ ސަރުކާރު ހިންގަން އާމްދަނީއެއް ހޯދަން ނޫންކަން ސާފުވެއެވެ. 

"ވޭޕުގެ ވިޔަފާރިކުރި މީހުންގެ ކުށެއް ނެތް. އެހެންނަމަވެސް ގައުމުގެ ރައްޔިޔުން ހާލުގެ ދުލުން އެދެމުންދިޔައީ، ތިމަންމެން މިކަމުން ސަަލާމަތްކޮށްދޭށޭ. " - ރައީސުލްޖުމްހޫރިއްޔާ ޑރ.މުހައްމަދު މުއިއްޒު 

ވޭޕް މަނާކޮށް، ދުންފަތާއި ދެކޮޅަށް ރައީސް މުއިއްޒު އެޅުއްވި ފިޔަވަޅުތަކަކީ ސިޔާސީ އެހެން ލީޑަރުން ވެސް އަޅުއްވަން ބޭނުންފުޅުވި ފިޔަވަޅުތަކެއްކަން ޔަގީނެވެ. ނަމަވެސް ބޮޑެތި އެހެން ނިންމެވުންތައް ފަދައިން، އެ އުނދަގޫ ނިންމެވުން ނިންމަވަން ކެރިވަޑައިގަތުމުގެ ހިތްވަރު ލިބިވަޑައިގެންނެވި ހަމައެކަނި ވެރިޔަކީ ރައީސް މުޢިއްޒު އެވެ. އަދި އެމަނިކުފާނަށްފަހު އެހެން ބަޔަކު ވެރިކަމާއި ހަވާލުވިނަމަވެސް އެ ނިންމެވުންތައް ބަދަލުކޮށް، ދުންފަތުގެ އަގުހެޔޮކޮށް ނުވަތަ ވޭޕް ހުއްދަ ކުރާނެތޯ މިއީ ކޮށްލުން ރަނގަޅު ސުވާލެކެވެ. ސިނގިރޭޓާއި ވޭޕާއި ދުންފަތުގެ ސަބަބުން ކުރިމަތިވާ ސިއްހީ މައްސަލަތަކުގެ އިތުރުން، އެއަށް ދެވިހިފާ މިންވަރު ބޮޑުވެ، އެކަމަށް ކުރާ ހޭދަ އިތުރުވެ، އެކަމުގެ ސަބަބުން އިޖްތިމާއި އެތައް މައްސަލަތަކެއް ކުރިމަތިވާކަން އެކިއެކި ދިރާސާތަކުން ވަނީ ހާމަވެފައެވެ. ހަމަގައިމުވެސް ސިނގިރޭޓާއި ވޭޕުން ލިބޭނެ އެއްވެސް ފައިދާއެއް މިހާތަނަށް ބަޔަކަށް ދެއްކިފައެއްނުވެއެވެ. ދުންފަތުގެ ސަބަބުން އޮތް ނުރައްކާތައް އިންތިހާއަށް ބޮޑުއިރު އަޅުގަނޑުމެންގެ ގައުމުގެ ހިންގުމާއި މާދަމާ ހަވާލުވާން އޮތް ޖީލަކީ ދުންފަތަށް ދެވި ހިފާފައި އޮތް ޖީލަކަށް ވެއްޖެނަމަ މިގައުމުގެ ތަރައްގީއާއި ކުރިއެރުން މަޑުޖެހި، ތަރައްގީވަމުން އަންނަ ގައުމެއްގެ ދަރަޖަ ގެއްލުމަކީވެސް އެކަށީގެންވާކަމެއް ކަމަށް ތަޖުރިބާކާރުން ބުނެއެވެ. ސިނގިރޭޓާއި ވޭޕުން އަމިއްލަ ނަފްސާއި، މުޖްތަމަޢުއާއި މުޅި ގައުމަށް އޮތް ނުރައްކަލަށް ބަލާއިރު، އެތަކެއްޗާޢި ދެކޮޅަށް ރައީސް މުއިއްޒުގެ ސަރުކާރުން އެޅި ފިޔަވަޅުތަކަށް ތަހުޒީބީ މުޖްތަމަޢުއެއްގައި ނަމަ އިދިކޮޅު ފަރާތްތަކުން މަރުހަބާ ކިޔައި، އެކަންކަން ތަންފީޒުކުރަން އެއްބާރުލުމާއި އެހީތެރިކަން ދޭނެއެވެ. ދުނިޔޭގެ ކުރިއަރާފައިވާ ޑިމޮކްރަސީތަކުގަޢި އެކަން އޮންނަނީ ހަމަގައިމުވެސް އެހެންކަން އަޅުގަނޑުމެންނަށް އެހެރީ ފެންނާށެވެ. ސިޔާސީގޮތުން ކިތަންމެ ވާދަވެރިނަމަވެސް، މުޅި ޤައުމާއި ރައްޔިތުންގެ މަސްލަހަތު ހިމެނޭ ކަންކަމުގައި އެމީހުން ތިބެނީ އެއް ގަލަކަށް އަރައެވެ. ނަމަވެސް ރާއްޖޭގައި އެކަން އޮތީ މުޅިން ތަފާތުކޮށެވެ.

އިދިކޮޅު ފަރާތްތަކުން މިއަދު މަގުތަކަށް މީހުން އެއްކުރުމަށް ދައްކާ އެންމެ ބޮޑު ވާހަކައަކީ ވޭޕް އާއި ސިނގިރޭޓުގެ ވާހަކައެވެ. އަދި އެއީ ރައްޔިތުންގެ ހައްގުގައި ދައްކާ ވާހަކައެއް ކަމަށް އިދިކޮޅު ފަރާތްތަކުން ބުނާއިރު، އަމިއްލަ ދަރިޔަކަށް ވޭޕް ނުވަތަ ސިނގިރޭޓް ދޭން ބޭނުންވާ އެއްވެސް މަޔަކު ނުވަތަ ބަފަޔަކު ހުންނާނެތޯ މިއީ އިދިކޮޅު ސިޔާސީވެރިން ޖަވާބު ދެއްވަންޖެހޭ ސުވާލެކެވެ. އަދި ނުބައި އާދަޔަކުން ގައުމު ސަލާމަތްކުރުމަށް ސަރުކާރަން އެޅުއްވި ފިޔަވަޅަކީ ހަމަ ގޯސް ނިންމެވުމެއްތޯ، މިއީވެސް ކޮށްލަން ރަނގަޅު ސުވާލެކެވެ. އިދިކޮޅު ފަރާތްތަކުން ސަރުކާރަށް ފާރަވެރިވާނެ ޖެހޭނެއެވެ. ނަމަވެސް އެއީ ޑިމޮކްރަސީގެ ހަމަތަކާއި އުސޫލުތަކުގެ ތެރެއިންނެވެ. ގާނޫނާއި ގަވާއިދުތަކުގެ ތެރެއިންނެވެ. އަދި އެ ހަމަތަކުގެ މަތިން ވާދަވެރި ސިޔާސީ ހަރަކާތްތައް ހިންގުމުގެ މިނިވަންކަން ކަށަވަރުކޮށްދެއްވާނެކަމާއި، ގާނޫނުއަސާސީން ލިބިދޭ ނޫސްވެރިކަމުގެ މިނިވަންކަމުގެ ހައްގާއި ހިޔާލު ފާޅުކުރުމުގެ މިނިވަންކަމުގެ ހައްގުތައް ފަދަ އަސާސީ ހައްގުތަކަށްވެސް އިހްތިރާމްކޮށް، އެ ހައްގުތައް ލިބިދެވޭކަން ސަރުކާރުން ކަށަވަރުކޮށްދެއްވާނޭކަމަށް ރައީސް މުއިއްޒު ވަނީ ތަކުރާރުކޮށް ވިދާޅުވެފައެވެ. އަދި ސިޔާސީގޮތުން އެމީހަކު ތާއީދުކުރާ ފިކުރަކާއި ގުޅިގެން ނުވަތަ ފާޅުކުރާ ހިޔާލަކާއި ގުޅިގެންވިޔަސް، އެއްވެސް ރައްޔިތަކާއި މެދު އެއްވެސް ފިޔަވަޅެއް ނާޅުއްވާނެކަމުގެ ޔަގީންކަން ދެއްވުމުގެ އިތުރުން، އެކަން ބަހާއި ޢަމަލުން ދަނީ ސާބިތުކޮށްދެއްވަމުންނެވެ. މީގެކުރީ ސަރުކާރުތަކުގައި ބަދަލުހިފުމުގެ ރޫހުގައި ނުވަތަ ސިޔާސީގޮތުން ވާދަވެރިކަން ބޮޑުވުމުން އިދިކޮޅު ސިޔާސީ ވެރިންނާއި ދެކޮޅަށް ފިޔަވަޅުތައް އެޅިނަމަވެސް، ރައީސް މުޢިއްޒު ވެރިކަމަށް ވަޑައިގެންނެވީ ރާއްޖޭގެ ވެރިކަމުގައި ތާރީހުގައި އޮތް އެ އާދަކާދަ ނިމުމަކަށް ގެންނަވާނެކަމުގެ ވަޢުދާއެކުއެވެ. އެމަނިކުފާނު އަދިވެސް ހުންނެވީ އެ ވަޢުދު މަތީގައިކަން ސާބިތުކޮށްދޭ އެންމެ ވަރުގަދަ ހެއްކަކީ، ރައީސް މުޢިއްޒުއާއި ސަރުކާރުގެ އިސްވެރިންނާއި ގުޅޭގޮތުން ހަގީޤަތާއި ހިލާފު އެތައް ވާހަކަތަކެއް ސިޔާސީ ޕޯޑިއަމްތަކުގައި ދައްކަމުންދާއިރުވެސް، މިހާތަނަށް އައިއިރު ސިޔާސީ އެއްވެސް ވާދަވެރިޔަކާއި ދެކޮޅަށް ފިޔަވަޅެއް އަޅުއްވާ، ނުވަތަ ޖަލަށްލުންފަދަ ކަމެއް މި ސަރުކާރުން ކުރައްވާފައި ނުވުމެވެ.

"މިދިޔަ ދުވަސްތަކަށް ބައްލަވާ. އެއްވެސް މީހަކަށް ސިޔާސީ މީހަކަށްވެގެން އަދަބެއް ނުދެން. އަޅުގަނޑު ބޭނުން ގައުމަށް ހަމަޖެހުން އަންނަ. ސިޔާސީ ގޮތުން އަނިޔާވެރިވެ، އެކަހެރިކޮށް، ބަންދުކޮށްހެދުމަކީ އަޅުގަނޑުގެ ކިބައިން ފެންނާނެ ކަމެއް ނޫނޭ،" ރައީސް ވިދާޅުވިއެވެ. 

ރައީސް މުޢިއްޒު ޤަބޫލުކުރައްވާގޮތުގައި ރާއްޖެއަށް ފާގަތިކަމާއި ކުރިއެރުން ގެނެސްދެވޭނީ ރާއްޖޭގައި ހަމަޖެހުން ގާއިމްވެފައި އޮވެގެނެވެ. އަދި ސިޔާސީ ހަލަބޮލިކަމާއެކު، ޤައުމުގެ ހަމަޖެހުން ގެއްލި ތަރައްގީގެ އަމާޒުތަކަށް ވާސިލުވުމަށް ކުރާ ދަތުރު އެތައް ގުނައަކުން މަޑުޖެހޭނެކަން އެއީ ފަހުގެ ތާރީހުންވެސް ރާއްޖެއިން ފެންނަން ހުރި މަންޒަރެވެ. ސަރުކާރުން ކުރާ ކޮންމެ ކަމަކަށް ފާޑު ކިޔައި، ރައްޔިތުންގެ ތެރޭގައި ދޮގު ވާހަކަތައް ފެތުރުމަކީ އެކަމުގެ ސަބަބުން ގައުމުގެ ހަމަޖެހުން ގެއްލި، ގައުމީ ތަރައްގީއަށް ހުރަސް އެޅޭނެކަންކަމެވެ. އެހެންކަމުން ގައުމުގެ ހަމަޖެހުން ނަގާލާ، ރައްޔިތުންގެ ފާގަތިކަމަށް ކުރާ މަސައްކަތަށް ހުރަސް އެޅުމުގެ ފުރުސަތު އެއްވެސް ބަޔަކަށް ނުދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރމުހައްމަދު މުއިއްޒު ވަނީ ދިވެހި ރައްޔިތުންނަށް އަރުވާފައެވެ.

އަޑު ރައީސް މިހެން ވިދާޅުވާ އަޑުކޮޅު ރައީސުލްޖުމްހޫރިއްޔާގެ މަގާމުގައި ރައީސް މުޢިއްޒު އެ ހުންނެވީ ސިޔާސީގޮތުން ބަދަލު ހިފުމުގެ ރޫހެއްގައެއް ނޫނެވެ. ނުވަތަ އަމިއްލަ މަންފާޢަށް ކަންތައްތައް ހާސިލުކުރާކަށްވެސް ނޫންކަން އެމަނިކުފާނު ވަނީ ތަކުރާރުކޮށް ވިދާޅުވެފައެވެ. ދިވެހި ދައުލަތުގެ އެންމެ މަތީ ވެރިޔާގެ މަޤާމުގައި އެ ހުންނެވީ ދިވެހި ރައްޔިތުންނަށް ހުރިހާ ދާއިރާއަކުންވެސް އަދަށްވުރެ ފާގަތި މާދަމާއެއް ހޯއްދަވައިދެއްވުމުގެ މަތިވެރި އަޒުމުފުޅުގަޢެވެ. އެ މަސައްކަތް ކާމިޔާބުކުރުމަށް ބޭނުންވާ ހިކުމަތްތެރިކަމާއި ވިސްނުންތެރިކަން އެމަނިކުފާނުގެ ކިބައިގައި ހުރިކަން ސާބިތުކޮށްދެއްވަމުންދާއިރު، ތަރައްޤީގެ އައު އުސްމިންތަކަކާއެކު، ދިވެހީންގެރާއްޖެއެއް ހޯއްދަވައިދެއްވުމަށް އެމަނިކުފާނު ފައްޓަވާފައިވާ ދަތުރުފުޅުގައި ކާމިޔާބުގެ އައްސޭރިއަށް ވާސިލުވުމަށް ދިވެހި ރައްޔިތުންގެ ކިބައިން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެދިވަޑައިގަންނަވަނީ އެންމެ ކަމަކަށެވެ. އެއީ ތަރައްޤީގެ ލަނޑުދަނޑިތައް ފެއިލްކޮށްލަން ބޭނުންވާ ފަރާތްތަކުން ރައްޔިތުންގެ ތެރޭގައި ނުތަވަނަސްކަން އުފައްދަން ކުރާ މަސައްކަތާއި ދުރުހެލިވެ، ރައްޔިތުންނަށް ތަރައްޤީއާއި ކުރިއެރުމާއި ފާގަތިކަން ހޯއްދަވައިދެއްވުމަށް ރައީސް މުޢިއްޒުއާއި އެމަނިކުފާނުގެ ސަރުކާރުން ކުރައްވާ މަސައްކަތަށް ރައްޔިތުން އެއްބާރުލުން ދެއްވައި އެހީތެރިކަން ދެއްވުމަށެވެ. ރައްޔިތުންގެ އެހީތެރިކަމާއި އެއްބާރުލުން ލިބިވަޑައިގަންނަވާނަމަ، ރައްޔިތުން ދެކެމުންދާ ތަރައްޤީގެ ހުވަފެންތައް ހަޤީގަތަކަށް ހައްދަވައިދެއްވާނެކަމުގެ ޔަޤީންކަން ދިވެހި ރައްޔިތުންނަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ދެއްވާފައެވެ. 

ކިޔުންތެރިންގެ ހިޔާލު