ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ ޝަރީއާ ކޮމްޕްލަޔަންޓް ލޯނުތަކަށް ހެއްދެވުމަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަށް ޝުކުރުއަދާކުރައްވާ ބައެއް ދީނީ ޢިލްމުވެރީން ރައީސްގެ ނިންމެވުމަށް ތަޢުރީފު ކުރައްވައިފި އެވެ.

ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ، އިސްލާމީ ހަމަތަކަށް ފެތޭ، "ޝަރީޢާ ކޮމްޕްލަޔަންޓް" ލޯނުތަކަކަށް ހެދުމަށްޓަކައި ރައީސް ވަނީ ކަމާ ބެހޭ ފަރާތްތަކަށް ލަފާ ދެއްވައި އެކަންކަން ތަންފީޒު ކުރެއްވުމަށް އަންގަވާފަ އެވެ.

އެކަން ފާހަގަކުރައްވާ މަޝްހޫރު ދީނީ ޢިލްމުވެރިޔާ އަދި އިސްލާމިކް ޔުނިވާސިޓީގެ ވައިސް ޗާންސެލާ ޑރ. އަލީ ޒާހިރު ބިން ސަޢީދު ޤާސިމް ވަނީ ‏ރިބާ ހިމެނޭގޮތަށް ކުރިން ދޫކުރަމުން އައި ސްޓޫޑެންޓް ލޯނު، އިސްލާމީ ޝަރީޢާ ހުއްދަ ކުރާ ގޮތަށް ބަދަލު ކުރަން ނިންމެވި ކަމަށްޓަކައި ރައީސުލް ޖުމްހޫރިއްޔާ ⁦އަށް އިޚްލާސްތެރިކަމާއެކު ޝުކުރު ދަންނަވާ ކަމަށް ވިދާޅުވެފަ އެވެ.

އަދި މިފަދަ ކަންކަމަކީ ދީނަށް ލޯބިކުރާ ކޮންމެ މީހަކު އުފާވާނެ ކަންކަން ކަމަށް ވިދާޅުވި އެވެ.

މަޝްހޫރު ދީނީ ޢިލްމުވެރިޔާ އަދި ޖަމިޢްޔަތުއްސަލަފުގެ ނާއިބު ރައީސް އައްޝައިޚް އަޙްމަދު ސަމީރު އިބްރާހިމް ވެސް ވަނީ ރައީސްގެ އެ ނިންމެވުމަށް ތަޢުރީފު ކުރައްވާފަ އެވެ.

ޝެއިޚް ސަމީރު ވަނީ އިސްލާމީޝަރީޢާ ހުއްދަ ކުރާ އުޞޫލުން ސްޓޫޑެންޓް ލޯނުގެ ކަންކަން ތަރުތީބުކޮށްދެއްވަން ނިންމެވިކަމަށްޓަކައި ރައީސަށް ޝުކުރު ދަންނަވާފަ އެވެ. އަދި ވިދާޅުވީ މީ އިސްލާމީ އުޞޫލަށް ކަންކަން ބައްޓަން ކުރެއްވުމުގައި ރައީސުލް ޖުމުހޫރިއްޔާ އެޅުއްވި ވަރަށް ހެޔޮ ފިޔަވަޅެއް ކަމަށެވެ.

ދީނީ ޢިލްމުވެރިޔާ އައްޝައިޚް ޝަފީޢު އަބްދުﷲ ވެސް ވަނީ ރައީސްގެ އެ ނިންމެވުމަށް ތަޢުރީފު ކުރައްވާ އެއީ ދިވެހި ދަރިވަރުންނަށް ލިބިގެންދިޔަ ވަރަށް އުފާވެރި ޚަބަރެއް ކަމުގައި ވިދާޅުވެފަ އެވެ.

ރައީސް އިރުޝާދު ދެއްވި ކަންކަމުގެ ތެރޭގައި، ކުރިން ލޯނު ނަގާއިފައިވާ ފަރާތްތަކުން ދައްކަން ހުންނަ ފައިސާއިން އެޑްމިނިސްޓްރޭޓިވް ފީ އުނިކޮށް ދަރިވަރުންގެ ލޯނު އަދަދުތައް އަލުން އެޖަސްޓްކުރުން ހިމެނެ އެވެ.

މީގެއިތުރުން ލޯނާއެކު ހިމެނިފައިވާ %1 އެޑްމިނިސްޓްރޭޓިވް ފީ ގެ ގޮތުގައި ނަގަމުންދާ އަދަދު އެއްކޮށް އުނިކުރުމަށް އަންގަވާފައިވާއިރު ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ޗާޖު ނުކުރުމަށް އެމަނިކުފާނު އިރުޝާދު ދެއްވި އެވެ.

‏