ENGLISH

04 އޭޕްރީލު 2025

Advertisement

ސްޑޫޓެންޑް ލޯނުތައް އިސްލާމީ ހަމަތަކަަށް ފެއްތެވުމަށް އެންގެވުން: ވަޒީރާއި އިސް އިމާމުގެ ތަޢުރީފު

28 މާރިޗު 2025

|

އަޙުމަދު ޙަމީދު

ޖަލްސާއެއްގައި މިނިސްޓަރު ޝަހީމް އަދި އިސްއިމާމު ޝެއިހް ލަޠީފް -- ފޮޓޯ: އިސްލާމިކް މިނިސްޓްރީ

ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ ޝަރީއާ ކޮމްޕްލަޔަންޓް ލޯނުތަކަށް ހެއްދެވުމަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު އެންގެވި އެންގެވުމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު އާއި އިސްލާމީ މަރުކަޒުގެ އިސް އިމާމު އައްޝައިޚް މުޙައްމަދު ލަޠީފް ތަޢުރީފު ކުރައްވައިފި އެވެ.

އެކްސްގައި ރޭގައި ކުރެއްވި ޕޯސްޓެއްގައި ރައީސް ވިދާޅުވީ ރާއްޖެ އާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫ ކޮށްފައިވާ ލޯނު ތަކަކީ، އިސްލާމީ ހަމަތަކަށް ފެތޭ، "ޝަރީޢާ ކޮމްޕްލަޔަންޓް" ލޯނުތަކަކަށް ހެދުމަށް ކަމާ ބެހޭ ފަރާތްތަކަށް އެދިވަޑައިގެންފައިވާ ކަމަށެވެ.

އެމަނިކުފާނު އެދިވަޑައިގަތް ކަންކަމުގެ ތެރޭގައި، ކުރިން ލޯނު ނަގާއިފައިވާ ފަރާތްތަކުން ދައްކަން ހުންނަ ފައިސާއިން އެޑްމިނިސްޓްރޭޓިވް ފީ އުނިކޮށް ދަރިވަރުންގެ ލޯނު އަދަދުތައް އަލުން އެޖަސްޓްކުރުން ހިމެނެ އެވެ.

މީގެއިތުރުން ލޯނާއެކު ހިމެނިފައިވާ 1 އިންސައްތަ އެޑްމިނިސްޓްރޭޓިވް ފީ ގެ ގޮތުގައި ނަގަމުން އަންނަ އަދަދު އެއްކޮށް އުނިކުރުމަށް އަންގަވާފައިވާއިރު ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ޗާޖް ނުކުރުމަށް އެމަނިކުފާނު ލަފާ ދެއްވި އެވެ.

ރައީސްގެ އެ ނިންމެވުމަށް ތަޢުރީފު ކުރައްވަވާ މިނިސްޓަރު ޝަހީމް ވަނީ ‏ދަރިވަރުންގެ ތަޢުލީމަށް ސަރުކާރުން ދޫކުރާ ލޯން އިސްލާމީ ޝަރީޢާއާ އެއްގޮތަށް ދޫކުރަން ރައީސް ⁦‪މުޢިއްޒު ނިންމެވި ތާރީޚީ ނިންމެވުމަށްޓަކައި ރައީސަށް ޝުކުރު ދަންނަވާފައެވެ.

އަދި ވިދާޅުވީ ޒަމާން ތަކެއް ވަންދެން ޙައްލުނުވެ އޮތް މި މައްސަލައަށް ޙައްލެއް ލިބިގެން ދިޔަކަމީ ވަރަށް ހެޔޮ ނިންމެވުމެއް ކަމަށެވެ.

ޝެއިޚް ލަތީފް ވަނީ ރައީސްގެ އެ ނިންމެވުމަކީ ވަރަށް އުފާވެރި ނިންމެވުމެެއްކަން ފާހަގަ ކުރައްވާފަ އެވެ.

އަދި ރައީސަށް ޙެޔޮ ޖަޒާއަށް އެދިވަޑައިގެން އެމަނިކުފާނުގެ އިސްލާޙީ މަސައްކަތްޕުޅުގައި ބަރަކާތް ލެއްވުން އެދި ދުޢާ ކުރެއްވި އެވެ.

ރައީސްގެ އެ ނިންމެވުމަށް ޢިލްމުވެރީންނާއި ދަރިވަރުންނާއި ތަޢުލީމީ ދާއިރާގެ ބޭފުޅުންނާއި ވަރަަށް ގިނަ ޢާންމުން އަންނަނީ ތަޢުރީފު ކުރަމުންނެވެ.

ކިޔުންތެރިންގެ ހިޔާލު