ENGLISH
04 އޭޕްރީލު 2025
ރައީސްގެ ވައުދުފުޅު ފުއްދެވުން؛ 48 ގަޑިއިރުތެރޭ ފައިސާ ދޫކުރަން ފެށިފަހުން މަސްވެރިންނަށް 385 މިލިއަން ރުފިޔާ ދޫކޮށްފި
27 މާރިޗު 2025
|
މަސްވެރިންތަކެއް، ފޮޓޯ: މަސްވެރިން
އެންމެ މަޤްބޫލު
ރިޔާސީ އިންތިޚާބުގައި އެމަނިކުފާނު ވައުދުވެވަޑައިގެންނެވި ގޮތަށް މަސްވެރިންނަށް 24 ގަޑިއިރު ތެރޭ ފައިސާ ދޫކުރަން ފެށިފަހުން ފާއިތުވި މުއްދަތުގައި މަސްވެރިންނަށް ޖުމްލަ 385 މިލިއަން ރުފިޔާ ދޫކޮށްފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ރައްޔިތުންގެ ސުވާލުތަކަށް ޖަވާބުދެއްވައި ޚިޔާލުތައް އަޑުއެއްސްވުމުގެ ގޮތުން ރައީސުލްޖުމްހޫރިއްޔާގެ އޮފީހުން ފެށި "ރައްޔިތުންނާ އެކު" ސިލްސިލާ ޕޮޑްކާސްޓުގެ ފުރަތަމަ އެޕިސޯޑުގައި މިއަދު ދެއްކެވި ވާހަކަފުޅުގައެވެ.
ރައީސްގެ ވައުދުފުޅާ އެއްގޮތަށް 48 ގަޑިއިރު ތެރޭ މަސްވެރިންނަށް ފައިސާ ދޫކުރުމަށް ފިނޭންސް މިނިސްޓްރީއާއި މިފްކޯއާއި ބޭންކް އޮފް މޯލްޑިވްސް ގުޅިގެން ހާއްސަ އިންތިޒާމުތަކެއް ހަމަޖައްސައި، އެ އިންތިޒާމުތަކުގެ ތެރެއިން ގަވައިދުން ފައިސާ ދޫކުރަން ފެށީ ފާއިތުވި އަހަރުގެ ޑިސެންބަރު މަހުގެ 10 ވަނަ ދުވަހެވެ.
ޕޮޑްކާސްޓުގައި ރައީސް ފާހަގަކުރެއްވީ އެމަނިކުފާނު ވައުދުވެވަޑައިގެންނެވި ގޮތަށް ފާއިތުވި މަސްވެރިންގެ ދުވަހުން ފެށިގެން ކޮންމެ 48 ގަޑިއިރަކުން މަސްވެރިންނަށް ފައިސާ ދޫކުރަމުން އަންނަކަމެވެ. އެމަނިކުފާނު ވިދާޅުވީ އެ ދުވަހުން ފެށިގެން މިއަދާ ހަމައަށް 385 މިލިއަނަށްވުރެ ގިނަ ރުފިޔާ މަސްވެރިންނަށް ދޫކޮށްފައިވާ ކަމަށެވެ.
"މަސްވެރިންގެ ވާހަކަ ދައްކާއިރު އަޅުގަނޑުގެ ވައުދެއް އެއީ ރިޔާސީ އިންތިހާބުގަ މަސްވެރިންނަށް 48 ގަޑިއިރުތެރޭގައި ފައިސާ ދިނުން. އެކަން މިދިޔަ ޑިސެމްބަރުން ފެށިގެން މިއަދާ ހަމައަށް މިއާ ކޮންމެ ދުވަހަކު މިއައީ ފައިސާ ދެމުން. ފައިސާ ދެމުން އައިސް އަޅުގަނޑު ހަމަ ދަންނަވާލަންބޭނުން މިހާތަނަށް އައިއިރުގަ ގާތްގަޑަކަށް 385 މިލިޔަން ރުފިޔާ، ދޫކުރެވުނު." ރައީސް ވިދާޅުވިއެވެ.
ރައީސް އިތުރަށް ފާހަގަކުރެއްވީ އެމަނިކުފާނު ވެރިކަމާ ހަވާލުވެވަޑައިގެންނެވިއިރު މަސްވެރިންނަށް ދޭންޖެހޭ ފައިސާގެ ތެރެއިން 250 މިލިއަނެއްހައި ރުފިޔާ ނުދީ ހުރިކަމެވެ. އަދި އެ ފައިސާ މަސްވެރިންނަށް ދިނީ މި ސަރުކާރުންކަން ފާހަގަކުރައްވަމުން ރައީސް ވިދާޅުވީ އެ ބެކްލޮގު ސާފުކޮށް ކޮންމެ 48 ގަޑިއިރަކުން މަސްވެރިންނަށް ފައިސާ ލިބޭނެ އިންތިޒާމު މިހާރު ހަމަޖައްސަވާފައިވާ ކަމެވެ.
އަދި 48 ގަޑިއިރު ތެރޭގައި ފައިސާ ލިބޭނެ އިންތިޒާމު ތަރުތީބުކުރެއްވުމަށްފަހު، މިހާރު ކޮންމެ ދުވަހަކުވެސް ފައިސާ ދޫކުރަމުން އަންނަކަން ހިސާބުތަކުން ފެންނާނެކަން ރައީސް ފާހަގަކުރެއްވިއެވެ. އަދި ސަރުކާރު ބަންދު ދުވަސްތަކުގައިވެސް މަސްވެރިންނަަށް ދޭންޖެހޭ ފައިސާ ދޫކުރަމުންދާކަމަށް ވިދާޅުވިއެވެ.
ސަރުކާރުން އަންނަނީ މަސްވެރިކަމުގެ ސިނާއަތް ތަރައްގީކުރުމަށްޓަކައި ގިނަ މަސައްކަތްތަކެއް ކުރަމުންނެވެ. އެގޮތުން މަސްވެރިން ބާނާ މަސް ރައްކާކުރުމުގެ ގާބިލުކަން އިތުރުކުރުމާއެކު، މަހަށް އަގު އިތުރުކޮށް ބޭރުކުރެވޭ މިންވަރު އިތުރުކުރުމަށް ގާއިމުކުރަންޖެހޭ އުމްރާނީ ވަސީލަތްތައް ގާއިމުކުރުމުގެ މަސައްކަތް ސަރުކާރުން އަންނަނީ ކުރަމުންނެވެ.