ދަރުމަ ލިބޭ ކަންކަމަށް މަގުފަހި ކުރުމަކީ ސަރުކާރުގެ ޒިންމާއެއް އަދި ފަހުރެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވެފައި ވަނި  “ރައްޔިތުންނާ އެކު” މި ނަމުގައި ރައީސް އޮފީހުން ކުރިއަށްގެންދިޔަ ޕޮޑްކާސްޓްގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، ރަމަޟާން މަހުގެ ފަހު ދިހައެއް ސަރުކާރުން ބަންދުކުރެއްވީ، އިސްލާމްދީނުގައި ސަވާބާއި، ދަރުމަ ހޯދުމަށް ހުންނަ ކަންކަމަށް، ރައްޔިތުންނަށް މަގުފަހިކޮށްދެއްވުމަށްކަމުގައި ފާހަގަކުރައްވައި އެކަންކަން ކޮށްދެއްވުމަކީ ޒިންމާއެއް އަދި ފަޚުރެއްކަމުގައި ދެކިވަޑައިގަންނަވާކަމަށެވެ.

ރައީސް ވިދާޅުވީ، ސަތޭކަ އިންސައްތަ އިސްލާމުން އުޅޭ ގައުމެއްގައި ހާއްސަކޮށް، ރަމަޟާން މަހު ސަރުކާރުން ރައްޔިތުންނަށް ވީހާވެސް ބޮޑަށް ކަންކަން ފަހިކޮށްދީ ލުއިކޮށްދެއްވުމަށް ވަރަށް އިސްކަންދޭން ޖެހޭނެކަމަށް ގަބޫލުފުޅު ކުރައްވާކަމަށެވެ.