ދެހާސް ސައްބީސް ވަނަ އަހަރުގެ ފީފާ ވޯލްޑް ކަޕާ ކުރިމަތިލާއިރު، ބްރެޒިލްގެ ކޯޗުގެ މަގާމަށް ރެއާލް މެޑްރިޑްގެ މިހާރުގެ ކޯޗު، ކާލޯ އަންޗެލޮޓީ ގެނައުމުގެ މަސައްކަތް އެ ގައުމުގެ ފެޑެރޭޝަނުން އަނެއްކާވެސް ފަށާފައިވާ ކަމަށް ފަހުގެ މީޑިއާ ރިޕޯޓްތައް ބުނެފިއެވެ.

މީގެކުރިން، ދެ ފަހަރެއްގެ މަތިން ބްރެޒިލްގެ ފުޓްބޯޅަ ފެޑެރޭޝަން (ސީބީއެފް) އިން ވަނީ، އެ ގައުމުގެ ފުޓްބޯޅަ ޓީމުގެ ކޯޗުގެ މަގާމަށް އަންޗެލޮޓީ ގެނައުމަށް މަސައްކަތްކޮށްފައެވެ.

ބްރެޒިލްގެ ފުޓްބޯޅަ ފެޑެރޭޝަނުން ބޭނުންވަނީ، މިހާރުގެ ކޯޗު، ޑޮރިވާލް ޖޫނިއާގެ ބަދަލުގައި އަންޗެލޮޓީ އެ މަގާމަށް ގެނައުމަށެވެ.

މިހާރު ކުރިއަށްދާ ފީފާ ވޯލްޑް ކަޕް ކޮލިފައިންގައި ދެކުނު އެމެރިކާގެ ގްރޫޕުގައި އެންމެ ފަހުން ވާދަވެރި އާޖެންޓީނާއާ ދެކޮޅަށް ކުޅުނު މެޗުން 4-1 އިން ބްރެޒިލް ބަލިވެ، ކޯޗު، ޑޮރިވާލް ޖޫނިއާ އަށް އޮތް ޕްރެޝަރު ވަނީ އިތުރުވެފައެވެ.

މި ވާހަކަތަކާ ގުޅޭގޮތުން ރެއާލުން މިހާތަނަށް ބުނެފައިވަނީ، އަންޗެލޮޓީ އާއި ބްރެޒިލާ ދެމެދު އެއްވެސް ގުޅުމެއް އޮތް ކަމަށްވާނަމަ އެކަމެއް އެމީހުންނަށް ނޭނގޭ ކަމަށެވެ.

ބްރެޒިލްގެ ކޯޗުގެ މަގާމަށް އަންޗެލޮޓީ ގެނައުމުގެ މަސައްކަތް އެންމެ ބޮޑަށް ކޮށްފައިވަނީ ދާދިފަހުން އެ ގައުމުގެ ފުޓްބޯޅަ ފެޑެރޭޝަނުގެ ރައީސްގެ މަގާމަށް އިންތިޚާބަކާ ނުލައި ހޮވުނު އެޑްނަލްޑޯ ރޮޑްރިގޭސް އެވެ.

މީގެއިތުރުން، ރައީސްގެ މަގާމަށް ކުރިމަތިލުމަށް ޝައުގުވެރިކަން ފާޅުކުރި އެއް ފަރާތް ކަމަށްވާ، ކުރީގެ ލެޖެންޑަރީ ފޯވާޑް، ރޮނާލްޑޯ ވެސް ބްރެޒިލްގެ ގައުމީ ފުޓްބޯޅަ ޓީމުގެ ކޯޗުގެ މަގާމަށް އަންޗެލޮޓީ ގެނައުމަށް ވިސްނާފައެވެ.

އެކަމަކު، ރެއާލުން މިހާތަނަށް ވެސް ހުރީ އަންޗެލޮޓީ ދޫކޮށްލާ ގޮތަކަށް ނޫނެވެ. ދެހާސް އެކާވީސް ވަނަ އަހަރު ދެވަނަ ފަހަރަށް ރެއާލަށް އެނބުރިއައުމަށްފަހު އަންޗެލޮޓީ ވަނީ، މިހާތަނަށް އެ ޓީމަށް 10 މުބާރާތް ކާމިޔާބުކޮށްދީފައެވެ. އޭގެތެރޭގައި، ނިމިދިޔަ ސީޒަނުގެ ސްޕެނިޝް ލީގާއި ޔުއެފާ ޗެމްޕިއަންސް ލީގު ތަށި ކާމިޔާބުކުރުން ހިމެނެއެވެ.

އެހެންނަމަވެސް، މި ސީޒަނުގައި ރެއާލުން ތާރީޚީ ތިން މުބާރާތެއްގެ ތަށްޓަށް ވާދަކުރަމުންދާއިރު، އަންނަ ސީޒަނުގައި އެ ޓީމުގެ ކޯޗުގެ މަގާމުގައި ހުންނާނެ ފަރާތަކާ މެދު ވަނީ ސުވާލު އުފެދިފައެވެ.

ރެއާލްގެ ކޯޗުގެ މަގާމަށް ދެން އެންމެ ފެނުން ގާތީ، ބަޔާ ލެވަކޫސަންގެ މިހާރުގެ ކޯޗު، ޒާބީ އެލޮންސޯ ކަމަށް ފަހުގެ މީޑިއާ ރިޕޯޓްތައް ބުނެއެވެ. އަދި، އެލޮންސޯ އާއެކު ރެއާލުން މަޝްވަރާތައް ބާއްވާފައިވާ ކަމަށް ވެސް ފަހުގެ މީޑިއާ ޚަބަރުތައް ބުނެއެވެ.

މިއިން އެއްވެސް ވާހަކައެއް ރެއާލުން ކަށަވަރުކޮށްދީފައިނުވާއިރު އަންޗެލޮޓީގެ މުސްތަގުބަލާ ގުޅޭގޮތުން، މީގެކުރީން އޭނާ ބުނެފައިވަނީ، ރެއާލްގެ މިހާރުގެ ރައީސް ފްލޮރެންޓީނޯ ޕެރޭޒްގެ ދައުރުގެ އަދި ބާކީ ހަތަރު އަހަރު އޮތުމާއެކު، އެ މުއްދަތު ހަމަވަންދެން އެ ކުލަބުގައި ދެމިހުންނާނެ ކަމަށެވެ.