ވެލާނާ އިންޓަރނޭޝަނަލް އެއަރޕޯޓުގެ ޑިޕާޗާ ޓާމިނަލުން ސިނގިރޭޓް ކާޓަންތަކެއް ބޭރުކުރަން އުޅުނު މައްސަލާގައި އިތުރު މީހަކު ހައްޔަރު ކޮށްފި އެވެ.

މި މައްސަލާގައި މީގެ ކުރީން އިތުރު ދެ މީހަކު ހައްޔަރު ކޮށްފައިވެ އެވެ. ފުލުހުން މިއަދު ބުނި ގޮތުގައި މި މައްސަލާ ގައި ފަހުން ހައްޔަރު ކުރީ އުމުރުން 23 އަހަރުގެ ދިވެހި ފިިރިހެނެކެވެ. އޭނާގެ ވަނަވަރު ވެސް ވަނީ އާންމު ކޮށްފަ އެވެ. އެއީ ނ. ވެލިދޫ ކަސްގަރަ، މުޙައްމަދު އައިޙަމް އެވެ.

އޭނާ ހައްޔަރު ކޮށްފައި ވަނީ ކޯޓް އަމުރެއްގެ ދަށުންނެވެ. އޭނާގެ ބަންދާއިމެދު ގޮތް ނިންމަން ކޯޓަށް ހާޒިރު ކުރުމުން 10 ދުވަހުގެ ބަންދުގެ މުއްދަތެއްް ޖަހާފައިވާ ކަމަށް ވެސް ފުލުހުން ބުންޏެވެ.

މި މައްސަލާގައި މީގެ ކުރީން ހައްޔަރުކޮށްފައިވަނީ މ. ސިލްވާނެސްޓް އަހްމަދު އަފްޞަލް އާއި ޔޫސުފް ނަޛީރު އެވެ.

މި މައްސަލާ ގައި ހައްޔަރުކުރި ޔޫސުފް ނަޛީރަކީ ފުލުހުންގެ ސާންޖެންޓެއްގެ މަގާމުގައި ހުރި މީހެކެވެ. އޭނާ، މުސާރަ ނުލިބޭ ގޮތަށް ވަޒީފާއިން ސަސްޕެންޑް ކޮށްފައިވާ ކަމަށް ފުލުހުން ރޭ ބުންޏެވެ.