ENGLISH
04 އޭޕްރީލު 2025
އޮރެންޖް ހިޔާ ނިމޭއިރަށް ތެލަސީމިއާ ޕޭޝަންޓާއި އެހީތެރިޔާއަށް ހިލޭ ބަހުގައި ދަތުރު ކުރެވޭނެ: ރައީސް
27 މާރިޗު 2025
|
އެންމެ މަޤްބޫލު
ހުޅުމާލޭގައި ތެލެސީމިއާ ޕޭޝަންޓުންނަށް ހާއްސަކޮށްގެން ގާއިމުކުރާ އޮރެންޖް ހިޔާ ހުޅުވޭއިރު، ތެލަސީމިއާ ޕޭޝަންޓާއި އެހީތެރިޔާއަށް ހިލޭ އެމްޓީސީސީ ބަހުގައި ދަތުރުކުރެވޭނެ ގޮތް ހަމަޖައްސައި ދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ.
ރައީސް މިފަދައިން ވިދާޅުވެފައި ވަނީ "ރައްޔިތުންނާއެކު" މި ނަމުގައި އެމަނިކުފާނު ކުރިޔަށްގެންދަވާ ޕޮޑްކާސްޓްގެ ފުރަތަމަ އެޕިސޯޑްގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، އޮރެންޖް ހިޔާ ހުޅުވެންވާއިރަށް އެ ސަރަހައްދަށް ހާއްސަ ބަސް ސްޓޮޕެއް ގާއިމުކުރެވޭނެ ކަމަށެވެ. އަދި އެތަނަށް ދާ ޕޭޝަންޓާއި އޭނާގެ އެހީތެރިޔާއަށް އެމްޓީސީސީގެ ބަސްތަކުގައި ހިލޭ ދަތުރު ކުރެވޭނެ ގޮތް ހަމަޖެހޭނެކަމަށެވެ.
"އެތަނުގެ ހިދުމަތް ހޯދަން ހަމަ ވަރަށް ގިނަ މާލޭގައި ތިބި ތެލެސީމިއާ ކުދިން ވެސް ދާނެ. އަޅުގަނޑު މި ކަނޑައެޅީ، އެމްޓީސީސީގައި މި އޮންނަ ބަސް ސާވިސްގެ ތެރެއިން އެތަނަށް ހާއްސަ ބަސް ސްޓޮޕެއް ކަނޑައަޅަން، އެތަނަށް މަޑުކުރާ ގޮތަށް. އެތަން ހުޅުވެން ވާއިރަށް، އޮރެންޖް ހިޔާ ހުޅުވެން ވާއިރަށް ހުންނާނީ ހަމަޖެހިފައި" - ރައީސް ޑރ.މުހައްމަދު މުއިއްޒު
ތެެލަސީމިއާ ސެންޓަރުގެ ހާލަތު ދަށްކަމަށް ބުނެ އިހުތިޖާޖުކުރުމާއެކު ރައީސް ވަނީ މި މަހުގެ 23 ވަނަ ދުވަހު ތެލެސީމިއާ ސެންޓަރަށް ޒިޔާރަތްކުރައްވާ އެތަނުގެ ހާލަތު ގާތުން ބަލައި އެތަނުގައި، ރައީސް އަބްދުﷲ ޔާމީނުގެ ވެރިކަމުން ފެށިގެން އެ ސެންޓަރުގައި ޑިރެކްޓާ ޖެނެރަލެއް ނެތުމުން އެ މަގާމަށް އަލްފާޟިލް އަޙްމަދު މަޢުޞޫމު އައްޔަންކުރައްވާފައިވެއެވެ.
މީގެއިތުރުން، ޑެޕިއުޓީ ޑިރެކްޓާ ޖެނެރަލަކާއި، ޑިރެކްޓާއެއްގެ މަގާމަށް ދެ ބޭފުޅަކު ކުރިއަށް އޮތް ދުވަސްތަކުގައި ހަމަޖެހިގެންދާނެކަމުގެ ޔަގީންކަން ވެސް ރައީސް ދެއްވާފައިވެއެވެ. ތެލެސީމިއާ ސެންޓަރުގައި މަސައްކަތް ކުރާ ނަރުހުން މަދުވުމުން، އެކަން ހައްލު ކުރުމަށްޓަކައި، ރައީސް ވަނީ ފިނޭންސް މިނިސްޓްރީ އިން ބަޖެޓް ހަމަޖައްސަވައިދެއްވާފައެވެ. ހެލްތު މިނިސްޓްރީންވަނީ އެތަނަށް ފަސް ނަރުހުން ހޯދުމަށް އިއުލާނު ކޮށްފައެވެ.
ޕޮޑްކާސްޓްގައި ތެލެސީމިއާ ސެންޓަރުގެ ވާހަކަތައް ފާހަގަކުރައްވާ ރައީސް ވިދާޅުވީ، އެތަނުގެ ހާލަތު ރަނގަޅު ކުރުމުގެ މަސައްކަތް މިހާރު ކުރިޔަށްދާކަމަށެވެ. އަދި އެ މަސައްކަތްތަށް އެމަނިކުފާނު ވަރަށް ގާތުން ބައްލަވަމުންދާކަން ފާހަގަކުރެއްވިއެވެ.