އަންނަ އަހަރުން ފެށިގެން ކޮންމެ ރަމަޟާން މަހަކީ, ދަރިވަރުން ކިޔަވާ ގަަޑިތައް ނުގެއްލޭހެން، ސްކޫލު ދަރިވަރުންނަށް މުޅިން ބަންދު މަހެއްގެ ގޮތުގައި ހަމަޖައްސައިދިނުމަށް މަސައްކަތް ކުރުމަށް އެޑިއުކޭޝަން މިނިސްޓަރަށް ދަންނަވާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. 

"ރައްޔިތުންނާއެކު" މި ނަމުގައި ރައީސް ޑރ.މުހައްމަދު މުއިއްޒު ކުރިޔަށްގެންދަވާ ޕޮޑްކާސްޓްގެ ފުރަތަމަ އެޕިސޯޑްގައި އެމަނިކުފާނު ވިދާޅުވީ ރަމަޟާން މަހަކީ އަޅުކަމަށް އިތުރު ޚާއްސަ ކަމެއް ދޭ މަހަކަށް ހެދުމަށް މި ސަރުކާރުން ގިނަ މަސައްކަތްތަކެއް ކުރައްވާ ކަމަށެވެ. 

އެގޮތުން މިއަހަރު ވެސް އެމަނިކުފާނުގެ ވައުދުފުޅާ އެއްގޮތަށް، މި ބަރަކާތްތެރި ރަމަޟާން މަހުގެ އެންމެ ބަރަކާތްތެރި ދުވަސްތަކުގެ މަންފާ އޭގެ އެންމެ ފުރިހަަމަ ގޮތުގައި ލިބިގަތުމަށް މަގުފަހިކޮށްދެއްވުމުގެ މަގުސަދުގައި މި މަހުގެ ފަހު ދިހަ ދުވަސް ސަރުކާރު ބަންދު ދުވަސްތަކެއްކަަމުގައި އެމަނިކުފާނު ވަނީ ހަމަޖައްސަވާފައެވެ. 

މީގެ އިތުރުން މިއަހަރުގެ މި މުޅި ރަމަޟާން މަހަކީ ސްކޫލު ކުދިންނަށް ވެސް އެއްކޮށް ބަންދު މަހެއްކަން ފާހަގަކުރައްވާ އެމަނިކުފާނު ވިދާޅުވީ ސްކޫލުތައް އެގޮތަށް ބަންދު ކޮށްފައިވަނީ ކުރިން އެގޮތަށް އެކަން ކަނޑައަޅައިގެން ނޫން ކަމަށެވެ. 

ރައީސް ވިދާޅުވީ އެއީ އެކަޑަމިކް ކަލަންޑަރަށް ގެންނެވި ބަދަލާއެކު ދިމާވި ކަމެއް ކަމަށެވެ. ނަމަވެސް އަންނަ އަހަރުން ފެށިގެން މުޅި ރަމަޟާން މަހަކީ ސްކޫލު ދަރިވަރުންނަށް ބަންދު މަހެއްގެ ގޮތުގައި ހަމަޖައްސައިދިނުމަށް މަސައްކަތް ކޮށްދެއްވުމަށް މިހާރު އެޑިއުކޭޝަން މިނިސްޓަރަށް އިރުޝާދުދެއްވާފައިވާ ކަމަށެވެ.

ރައީސް ޑރ. މުއިއްޒު ވިދާޅުވީ މިކަން މިގޮތަށް ކަނޑައެޅުއްވުމަށް މަސައްކަތް ކުރައްވާ އެންމެ ބޮޑު އެއް ސަބަބަކީ ރަމަޟާން މަހު އަޅުކަމަށް ދޭ އިސްކަން އިތުރުކުރުމަށް ދަރިވަރުންނަށް ހިތްވަރު ދިނުމާއެކު ދީނީ ކަންކަމަށް ދަރިވަރުން ލޯބި ޖެއްސުމަށް އިތުރު ބާރެއް ދިނުމުގެ ގޮތުން ކަމަށެވެ. 

އެމަނިކުފާނު ވިދާޅުވީ ރަަމަޟާން މަހަކީ ދަރިވަރުންނަށް ބަންދު މަހަކަށް ވުމާއެކު ބެލެނިވެރިންގެ ފަރާތުން ވެސް ފެނިގެން ދިޔައީ ހިތްހަމަޖެހުން ކަމަށެވެ. އަދި މިކަން ބެލެނިވެރިން ބަލައިގަންނަ ކަމަށް އެމަނިކުފާނު ވިދާޅުވިއެވެ.