ކީރިތި ޤުރުއާނާ ބެހޭ ވަޤުފް އިމާރާތެއް އެޅުމަށް މާލެއިން ބިމެއް ހަމަޖައްސާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ކީރިތި ޤުރުއާން ހިތުދަސްކުރި ޙާފިޒުން ދަސްވެނިވުން ފާހަގަކުރުމަށް ރޭ އިސްލާމީ މަރުކަޒުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ. މި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ފަހު ދިހައިގެ ބަންދުތެރޭގައި ވެސް މިކަމާއި ގުޅުންހުރި މަސައްކަތްތައް ކޮށްފައިވާކަމަށާއި، ސަރުކާރު ހުޅުވުމަށްފަހު މިކަމާއިގުޅޭ ސިޓީ އިސްލާމިކް މިނިސްޓްރީއަށް ފޮނުވާނެކަމަށެވެ.

ހަމައެހެންމެ މިކަމަކީ ފިކުރީ އަދި ހުރިހާ މާނައެއްގައިވެސް ފުރިހަމަ އިންވެސްޓްމެންޓަކަށް ވެގެންދާނެކަމަށް ރައީސް ފާހަގަކުރެއްވިއެވެ. 

މީގެއިތުރުން ސައްތައިން ސައްތަ އިސްލާމީ ޤައުމަކަށްވެހުރެ، މި ޤައުމުގެ ކޮންމެ އަފުރާދެއްގެ އުޅުމާއި ގުޅުން ރަނގަޅުކުރުމަށާއި އަޅުގަނޑުމެންގެ ޢަމަލުތައްހުރީ ކިހިނެތްތޯ ބަލައި ހިސާބުކުރުން މުހިންމުކަމަށެވެ. އެގޮތުން މުޖުތަމަޢު ތެރޭގައި ހުރި ގޯސް އާދަތައްކަމަށްވާ މީހުންގެ އަބުރަށް އަރައިގަތުމާއި ދެބައޮޑުވުމާއި ނެތިމޮށުމާއި ދޮގުވާހަކަތައް ފެތުރުން ވަނީ އާންމުވެފައިކަމަށެވެ. 

ރައީސްގެ ވާހަކަފުޅުގައި އިތުރަށް ފާހަގަކުރެއްވީ މުސްލިމުންނަށްވީތީވެ ރިވެތި ސިފަތައް ބަހައްޓަންޖެހޭނެ ކަމަށާއި، މުސްލިމުން ވާންޖެހޭނީ އެކަކު އަނެކަކަށް އޯގާވެރި ރަޙުމުކުރާ ބައެއްގެގޮތުގައި ކަމަށެވެ. އަދި މި ޤައުމުގައި އިސްލާމީ ކަންކަން ކުރިއަށް ގެންދިއުމުގައި އެންމެން ގުޅިގެން މަސައްކަތްތަކެއް ކުރުމަކީ މިފަދަ ރެއެއްގައި ވަރަށް ބޮޑަށް އަޒުމް އައުކުރަން ޖެހޭ ކަމެއްކަމަށް ވެސް ރައީސް ފާހަގަކުރެއްވިއެވެ. 

މިއީ ކީރިތި ޤުރުއާން ހިތުދަސްކޮށްފައިވާ ޙާފިޡުން ދަސްވެނިވުން ފާހަގަކުރައްވައި ސަނަދު ދެއްވުމަށް ރާއްޖޭގައި ބޭއްވި ފުރަތަމަ ޖަލްސާއެވެ.