ރާއްޖެއިން ނެދަލެންޑްސްއަށް ކަނޑައަޅުއްވާފައި ހުންނަވާ ނޮން-ރެސިޑެންޓް ސަފީރު ޤީލާ ޢަލީ، އެކަމަނާގެ ސަފީރުކަމުގެ ފަތްކޮޅު ނެދަލެންޑްސްގެ ރަސްގެފާނު ހިޒް މެޖަސްޓީ ކިންގް ވިލްއެމް-އެލެގްޒެންޑަރއަށް މިއަދު ހެނދުނު އަރުވައިފިއެވެ.

މި ރަސްމިއްޔާތު ބޭއްވުނީ ދަ ހޭގުގައި ހުންނަ 'ނޫރުދެއިންދް' ޕެލަސްގައެވެ.

ފަތްކޮޅު އެރުވުމުގެ ރަސްމިއްޔާތަށްފަހު ބޭއްވުނު ޕްރައިވެޓް އޯޑިއަންސްގައި، ސަފީރު ޤީލާ ޢަލީ ވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ފަރާތްޕުޅުން ނެދަލެންޑްސްގެ ރަސްގެފާނަށް ތަހުނިޔާއާއި ހެޔޮއެދުން އަރިސްކުރައްވާފައެވެ.

އަދި ދިވެހިރާއްޖެ އާއި ނެދަލެންޑްސްއާ ދެމެދު އޮތް ގާތް ގުޅުން އިތުރަށް ހަރުދަނާކުރުމަށް މަސައްކަތްކުރައްވާނެ ކަމުގެ ޔަގީންކަން އެކަމަނާ އަރުވާފައިވެއެވެ.

ދިވެހިރާއްޖެ އާއި ނެދަލެންޑްސްއާ ދެމެދު ޑިޕްލޮމެޓިކް ގުޅުން ޤާއިމުކުރެވުނުތާ 45 އަހަރު ވެފައިވާއިރު، ފަތުރުވެރިކަމާއި ތަރައްޤީގެ މަޝްރޫޢުތަކުގައި ނެދަލެންޑްސްއަކީ ދިވެހިރާއްޖޭގެ މުހިންމު ބައިވެރިއެއްކަން ފާހަގަކުރެވެއެވެ.

މި ރަސްމިއްޔާތުގައި ސަފީރު ޤީލާ ޢަލީގެ އަރިހުގައި އެކަމަނާގެ ފިރިކަލުން ޢަބްދުﷲ މުޝްރިފް އަދި ބެލްޖިއަމްގައި ހުންނަ ދިވެހިރާއްޖޭގެ އެމްބަސީގެ ފަސްޓް ސެކްރެޓަރީ، މުޙައްމަދު ޝައްފާޢު އިބްރާހީމް ބައިވެރިވެވަޑައިގެންނެވިއެވެ.