ENGLISH

04 އޭޕްރީލު 2025

Advertisement

ރައީސްގެ ތަޤުރީރަށް ނަޒަރެއް؛ ޤުރުއާނަށް އޭގެ ޙައްޤު މަޤާމު ދިނުމަށް ކުރެއްވި އިލްތިމާސެއް

27 މާރިޗު 2025

|

ޝިފްޒާން އަޙްމަދު

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ފޮޓޯ: ރައީސް އޮފީސް

ރޭ އިސްލާމީ މަރުކަޒުގެ ޖަލްސާކުރާ މާލަމުގައި އޮތް މި އަހަރު ކީރިތި ޤުރުއާން ހިތުދަސްކުރި ހާފިޒުން ދަސްވެނިވުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޤައުމާ މުޚާތަބުކުރައްވައި ދެއްކެވި ވާހަކަފުޅަކީ ކަނުލައި އަޑުއަހައި، އެވާހަކަފުޅާމެދު ފުންކޮށް ވިސްނަައިލަންޖެހޭ ފަދަ މުހިއްމު ވާހަކަފުޅެކެވެ. 

ރޭގެ ޖަލްސާގައި ރައީސް ދެއްކެވި ވާހަކަފުޅުތަކަށް ވިސްނައިލުމުން، އެ ވާހަކަފުޅުތަކުގެ މަޤުޞަދު ސާފުވެއެވެ. ހަލާކުވަމުން ހާވިޔާވަމުންމިދާ ދިވެހި މުޖުތަމަޢު ސަލާމަތްކުރެވޭނެ ގޮތެއްގެ މައްޗަށް އަލިއަޅުވައިލައްވައި މަގެއް އަލިކޮށްދެއްވުމެވެ. ރައީސްގެ ތަޤުރީރުން އެ މަގު އަޅުގަނޑުމެން އެންމެނަށް އެވަނީ ދައްކުވައިދެއްވާފައެވެ. 

ކީރިތި ޤުރުއާނަކީ އަމަލީ ފޮތެއް

އެގޮތުން އެމަނިކުފާނުގެ ވާހަކަފުޅުގެ މައިގަނޑު ނާރެހަކީ ފަރުދީ ދިރިއުޅުމާއި، ޖަމާޢީ ގުޅުންތަކުގައި ކީރިތި ޤުރުއާނުގެ ދައުރު ހަނދާކޮށްދެއްވުމެވެ. ޤުރުއާނަކީ މުސްލިމުންގެ ޙަޔާތުގެ ހުރިހާ ކަމެއް އެ މައްޗަށް ބިނާވެފައިވާ ދުސްތޫރެވެ. އެއަށްވުރެ މަތިވެރި ދެވަނަ ޤާނޫނެއް، ފޮތެއް މުސްލިމުންގެ ދިރިއުޅުމުގައި ނޯންނާނެއެވެ. ރައީސްގެ ތަޤުރީރުގައި ހަނދުމަފުޅުކޮށްދެއްވީ މި ޙަޤީޤަތެވެ. 

އެގޮތުން ކީރިތި ޤުރުއާނުގެ ޠަބީޢަތާމެދު ވާހަކަދައްކަވަމުން ރައީސް ވަނީ އެ ފޮތަކީ ޢަމަލީ ފޮތެއްކަން ފާހަގަކުރައްވާފައެވެ. އަދި އެ ފޮތަކީ ހަފުލާތަކުގައި ކިޔަވައިލަން އޮންނަ، ސެރެމޯނިއަލް ފޮތެއް ނޫންކަން ފާހަގަކުރައްވަމުން ރައީސް އެ ފޮތް ސިފަކުރެއްވީ މުސްލިމުންގެ "ގައިޑް ބުކް" ނުވަތަ މުސްލިމުންނަށް މަގުދައްކާ ފޮތުގެ ގޮތުގައެވެ. 

ރައީސްގެ ވާހަކަފުޅުގައި ފާހަގަކުރެއްވި ފަދައިން ކީރިތި ޤުރުއާނަކީ ދިރިއުޅުމުގެ އެންމެހައި މައިދާނެއްގައި އިންސާނާ ކާމިޔާބަށް ވާސިލުވުމަށް ބޭނުންވާނެ ހުރިހާ އިރުޝާދުތަކެއް އެ ފޮތެއްގައި ހިމެނޭ ފޮތެކެވެ. އެ ފޮތުގެ ކޮންމެ ސޫރަތަކީ އަދި އާޔަތަކީ މުސްލިމުންގެ ދިރިއުޅުމުގެ ކަންކަމަށް އަލިކޮށްދޭ ވޮށްތަކެކެވެ. 

"އަޅުގަނޑުމެންގެ ގައިޑް ބުކަކީ އަޅުގަނޑުމެން އަމަލީ ގޮތުން ކަންކަން ކުރާއިރު، ކަންކަން ކުރަންވީ ގޮތް ބަަލައި ދަސްކުރާ ފޮތަކަށްވާންވީ ﷲ ސުބްޙާނަހޫ ވަތަޢާލާ އަޅުގަނޑުމެންނަށް ދެއްވާފަައި މިއޮތް ކީރިތި ޤުރުއާން. އެއީ ޕްރެކްޓިކަލް ފޮތެއް ޢަމަލީ ފޮތެއް. އެއީ ހަމައެކަނި މިކަހަލަ ޖަލްސާތަކުގައި ކިޔަވައިލަން އޮންނަ ސެރެމޯނިއަލް ފޮތެއް ނޫން." - ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު 

ރާއްޖޭގެ މިއަދުގެ ޙާލަތު؛ ޤުރުއާނުގެ ތަޢުލީމާތަށް އަމަލުކުރެވޭތޯ؟

ޤުރުއާނަށް އަމަލުކުރުމުގެ މުހިއްމުކަން ފާހަގަކުރައްވައި، އެކަމަށް ބާރުއެޅުއްވުމާއެކު ރައީސް އުފެއްދެވި ސުވާލަކީ މި މުޖުތަމަޢުގެ ކޮންމެ ފަރުދަކުމެ އަމިއްލަ ނަފްސާ ކުރަންޖެހޭ ސުވާލެކެވެ. އެމަނިކުފާނު ކުރެއްވި ސުވާލަކީ ދިވެހި މުޖުތަމައުގައި ކީރިތި ޤުރުއާނަށް އެކަށީގެންވާ ގޮތެއްގައި އަމަލުކުރެވޭތޯ އުފެއްދެވި ސުވާލެވެ. ފާހަގަކުރެއްވީ އެ ސުވާލަކީ ކޮންމެ ފަރުދަކުމެ އަމިއްލަ ނަފްސާކުރަންޖެހޭ ސުވާލެއް ކަމެވެ. 

ކީރިތި ޤުރުއާނަށް އަމަލުކުރުމަކީ މުހިއްމުކަމެއްކަން ދިވެހިންކުރެ ނުދަންނަ މީހަކު ނުހުންނާނެއެވެ. ޤުރުއާނަށް އަމަލުކުރުމުގެ އަހަންމިއްޔަތާއި، އެ ފޮތުން އުނގަންނައިދީފައިވާ އުސޫލުތަކާއި ގަވާއިދުތަކުގައި ހިފަހެއްޓުމުގެ މުހިއްމުކަަން އަޅުގަނޑުމެން ޅައިރުއްސުރެ ދަސްކޮށްދީ ކިޔައިދެއެވެ. ނަމަވެސް އެ ފޮތަށް އަމަލުކުރަންޖެހޭ ހިނދު އަޅުގަނޑުމެންނަށް އެ ފޮތަށް އަމަލުކުރެވޭތޯ އަމިއްލަ ނަފުސުތަކާ ސުވާލުކުރަންޖެހެއެވެ. 

ރައީސްވަނީ އެ ސުވާލަށް ޖަވާބުދެއްވާފައެވެ. ވިދާޅުވެދެއްވީ މިއަދު މި މުޖުތަމައުގެ ހާލަތު އޮތް ގޮތެވެ. ސިފަކޮށްދެއްވީ އިސްލާމްދީނާއި ކީރިތި ޤުރުއާނުގައި ނަހީކުރައްވާފައިވާ ހުރިހާ ކަމެއް މި މުޖުތަމައުގައި ފެތުރިފައި އޮތް މިންވަރެވެ. އެކަންކަމަށް އަރައިގަތުމަކީ އާދައިގެ ކުދިކުދި ކަންކަން ކަމުގައި ވެފައި އޮތް ގޮތެވެ. 

"އަަޅުގަނޑުމެން އެކަކު އަނެކަކުގެ އަނބުރަށް އަރައިގަންނަނީ، ދެބައޮޑުވަނީ، ނެތިމޮށެނީ، ދޮގު ވާހަކަތައް އިންތިހާއަށް ފަތުރަނީ، މިހެން ގޮސް އަޅުގަނޑުމެންގެ ތެރޭގައި ނެތް ކަމެއް ނެތް. ގޯސް ހުރިހާ އާދައެއް، އިސްލާމްދީނުގައި، މި ކީރިތި ޤުރުއާނުގައި މަނާކުރައްވާފައިވާ، އެކަންކަމާ ދުރަށްދާން އަންގަަވާފައިވާ ހުރިހާ ކަމެއް، ސައްތަައިން ސައްތަ އިސްލާމީ މި ގައުމުގައި އަޅުގަނޑުމެންގެ ތެރޭގައި އަޅުގަނޑުމެން މިކުރަނީ." - ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު 

އިންސާނީ ކަރާމާތް؛ ޤުރުއާނިއްޔަ މަބްދައެއް

ކީރިތި ޤުރުއާނުގައި މާތްﷲ ބަޔާންކުރައްވާފައިވަނީ އެކަލާނގެ އެހެނިހެން މަޚުލޫޤުންގެ މައްޗަށް އިންސާނާ މާތްކުރެއްވި ކަމަށެވެ. އަދި އެ އިންސާނާއަށް ކަރާމަތުގެ ސިފަ ދެއްވި ކަމުގައެވެ. އެ ސިފައަކީ ކޮންމެ އިންސާނަކަށްމެ އިންސާނަކަށްވީތީ މާތްﷲ ދެއްވަވާފައިވާ ސިފައެއްކަަން ޤުރުއާނުގެ ޞަރީޙަ ނައްޞުން އެނގެއެވެ. 

އާދަމުގެ ދަރީން ކަރާމާތްތެރިކުރެއްވިކަން ބަޔާންކުރައްވާފައިވާ ޤުރުއާނުގެ އާޔަތަށް އިޝާރާތްކުރައްވައި ރައީސް ފާހަގަކުރެއްވީ ކޮންމެ މީހަކުވެސް އެމީހެއްގެ އަތާއި ދުލުގެ ނުބައިކަމުން އެހެން މީހުން ސަލާމަތްވެފައިވޭތޯ އަމިއްލަ ނަފްސާ ސުވާލުކުރަންޖެހޭ ކަމަށެވެ. 

ރައީސް ފާހަގަކުރެއްވީ ކޮންމެ ޙައްޤަކާއެކު އެ ޙައްޤާ ގުޅިފައިވާ ޙުދޫދުތަކެއްވެސް ހުންނާނެ ކަމަށެވެ. އަދި މުޖުތަމަޢު ރަނގަޅުވާނީ ކޮންމެ މީހަކުވެސް އެހެން މީހުންނަށްވެސް އިންސާނީ ކަރާމާތް ލިބިފައިވާކަން ޤަބޫލުކޮށްގެންކަމަށް އެމަނިކުފާނު ވިދާޅުވިއެވެ. 

"އަޅުގަނޑުމެން ކޮންމެ މީހަކީ ކަރާމާތެއް ލިބިގެންވާ މީހެއް. އޭގެ މަފުހޫމަކީ އަޅުގަނޑުމެން ކޮންމެ މީހަކީ އަނެއް އިންސާނާއަށް އިހުތިރާމު އަދާކުރަންޖެހޭ މީހެކޭ. ހައްގުތަކާއެކު އޭގެ ހުދޫދުތަކެއްވެސް އޮވޭ. " - ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު

އާދޭހެވެ. މިއީ ޤުރުއާނުގެ އުނގަންނައިދިނުމެވެ. އެކަކު އަނެކަކަށް އިޙުތިރާމުކުރާ، އޯގާތެރިކަމާއި ކުލުނެވެރިކަން އިސްކުރާ މުޖުތަމަޢެއްގެ ގޮތުގައި އިސްލާމީ މުޖުތަމަޢުތައް ބިނާކުރުމަށް ބޭނުންވާ ހުރިހާ އިރުޝާދެއް ކީރިތި ޤުރުއާނުގައި ސާފުކޮށް ބަޔާންވެފައިވެއެވެ. ނަމަވެސް އިސްލާމީ މުޖުތަމައުތަކުން އެކަންކަން ނުފެންނަ ސަބަބަކީ ޤުރުއާނަކީ ހަމައެކަނި ދުލުކޮޅުން ކިޔަވައިލެވޭ ފޮތަކަށް ވެފައި އޮތުމެވެ. 

ބަދަލުގެ ފެށުމަކީ އަމިއްލަ ނަފުސުތައް 

ކީރިތި ޤުރުއާނުގެ މޫރި އާޔަތްތަކާ ހަވާލާދެއްވަމުން ރައީސް ފާހަގަކުރެއްވީ މުޖުތަމައަށް ގެންނަން އެދޭ ހެޔޮ ބަދަލުގެ ފެށުމަކީ ވަކިވަކި ފަރުދުން ކަމެވެ. ކޮންމެ މީހަަކުވެސް އެމީހެއްގެ އަމިއްލަ ނަފްސު އިސްލާހުކޮށްގެން ނޫނީ ޖަމާއަތެއްގެ ގޮތުގައި މުސްލިމު މުޖުތަމައުތައް އިސްލާހުނުވާނެ ކަމުގައި ރައީސް ފާހަގަކުރެއްވިއެވެ. 

"މިގޮތަށް ކީރިތި ޤުރުއާނުގައި އައިސްފައި ހުންނަ ކަންކަމަަށް އަޅުގަނޑުމެން އަމިއްލައަށް އަމަލުކުރަން ފަށަންޖެހޭ ކަމެއް ކީރިތި ޤުރުއާނަކީ. އެހެންނޫނިއްޔާ ކާކަށްތޯ އޮޅުވައިލެވެނީ؟ އަޅުގަނޑުމެންގެ އަމިއްލަ ނަފްސަށް އޮޅުވައިލަނީ. އަޅުގަނޑުމެންގެ އަމިއްލަ ނަފްސުތައް އިސްލާހުނުކުރަންޏާ ސަލާމަތެއް ނޯންނާނެ. އަޅުގަނޑުމެންގެ މި ޤައުމު ހަމަމަގަށް ގެންނަންޏާވެސް އަޅުގަނޑުމެންގެ ނަފްސު އިސްލާހުކުރަންޖެހޭ ނޫންތޯ؟ " - ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު 

އުމްރާނީ ތަރައްގީގެ ބޮޑެތި މަޝްރޫއުތައް ހިންގުނު ނަމަވެސް ހިތާއި ބުއްދިއަށް ކީރިތި ޤުރުއާނުގެ މަތިވެރި އަލިކަން ނުވަންނަނަމަ ހަގީގީ ތަރައްގީއެއް ހާސިލުނުވާނެ ކަމަށް ވިދާޅުވެ، ރައީސް ފާހަގަކުރެއްވީ ޤުރުއާނުގެ މަތިވެރި ތައުލީމުތަކުން ފިކުރުތައް މުއްސަނދިކުރަންޖެހިފައިވާ ކަމެވެ. އަދި ޤުރުއާން އުނގަންނައިދޭ އަޚުލާޤިއްޔަތު މުޖުތަމައުގައި ދިރުވައި އާލާކުރަންޖެހޭ ކަމަށްވެސް އެމަނިކުފާނު ވިދާޅުވިއެވެ. 

ރައީސްގެ މި ތަޤުރީރުގައި ދެއްވާފައިވާ މުހިއްމު މެސެޖުތަކަކީ ދިވެހިރާއްޖެ މިއަދު އޮތް ހާލަތަށް ބަލާއިރު ދިވެހިންނަށް މުހިއްމު މެސެޖުތަކެކެވެ. ކީރިތި ޤުރުއާން ކިޔެވުމަށާއި، ކިޔަވައިދިނުމަށް މުހިއްމު އަހައްމިއްޔަތެއް ދޭ ފަދައިން ކީރިތި ޤުރުއާނަށް އަމަލުކުރުމާއި، ޤުރުއާނަކީ ދިރިއުޅުމުގެ ސަމުގާ ކަމުގައި ހެދުމަށް ބޭނުންވާ ތަރުބިއްޔާތާއި ހޭލުންތެރިކަން ޒުވާނުންނާއި ތުއްތުކުދީންގެ މެދުގައި އުފެއްދުމަށް އިސްކަންދޭންޖެހެއެވެ. ހަމަޖެހުން ޤާއިމުވެގެންވާ، އެކަކު އަނެކަކަށް އިހުތިރާމުކުރާ، އިންސާނީ ކަރާމާތް އެންމެންމެ ނަގަހައްޓާ މަޖުތަމަައެއް އުފެއްދޭނީ އެ މުޖުތަމަޢުގެ ހިތުގައި ޤުރުއާން ބާއްވައިގެންނެވެ. 

ކިޔުންތެރިންގެ ހިޔާލު