"ގެދޮރުވެރިޔާ" ސްކީމްގެ ދަށުން ކުރީ ސަރުކާރުން ހުޅުމާލޭގައި އިމާރާތްކުރަން ފެށި 4000 ފްލެޓު ލިބުނު މީހުންގެ ލިސްޓް އާންމުކޮށް, ޝަކުވާ  ހުށަހެޅުމުގެ ފުރުސަތު ހުޅުވާލުމާއެކު މިހާތަނަށް 2،843 ޝަކުވާ ހުށަހަޅައިފިއެވެ.

"އެމްއެމްޓީވީ" އަށް މައުލޫމާތު ދެއްވަމުން ހައުސިންގ މިނިސްޓްރީގެ މީޑިޔާ އޮފިޝަލް ވިދާޅުވީ، ފްލެޓް ލިސްޓަށް މިހާތަނަށް 2،843 ޝަކުވާ ހުށަހަޅާފައިވާކަަމަށެވެ. އެގޮތުން، ތިން ކޮޓަރީގެ ފްލެޓްތަކަށް 2079 ޝަކުވާ ލިބިފައިވާއިރު ދެ ކޮޓަރި ހިމެނޭ ފްލެޓްތަކަށް 764 ޝަކުވާ ލިބިފައިވެއެވެ.

ފްލެޓް ލިބުނު ފަރާތްތައް އިއުލާން ކުރުމަށްފަހު އެ ލިސްޓަށް ޝަކުވާ ހުށަހެޅުމުގެ ފުރުސަތު އެންމެ ފުރަތަމަ ހުޅުވާލީ މާރިޗު 1 އިން 31 ގެ ނިޔަލަށެވެ. އެ މިނިސްޓްރީ އިން މި މަހުގެ 19 ވަނަ ދުވަހު އާއްމުކުރި އިއުލާނުގައި ބުނީ ލިސްޓަށް ޝަކުވާ ހުށަހެޅުމުގެ ފުރުސަތު އަންނަ އޭޕްރީލް މަހުގެ 15 ވަނަ ދުވަހުގެ ނިޔަލަށް މިހާރު އިތުރުކޮށްފައިވާ ކަމަށެވެ. 

 ފޯމް ހުށަހަޅާފައިވާ ފަރާތެއްނަމަ އެ ފަރާތުގެ ފޯމާއި ގުޅޭ ޝަކުވާ 'ގެދޮވެރިޔާ ޕޯޓަލް' މެދުވެރިކޮށް ހުށަހެޅުމަށް އަދި ލިސްޓުގައިވާ ފަރާތަކާއި ގުޅޭ ޝަކުވާއެއް ނަމަ gedhoruveriya@infrasructure.gov.mv އީމެއިލްއަށް ނުވަތަ މިނިސްޓްރީއަށް އެޑްރެސްކޮށް ފޮނުވޭ ސިޓީއަކުން ހުށަހެޅޭނެ އެވެ. މީގެ އިތުރުން، ޝަކުވާ ހުށަހެޅުއްވުމުގެ މުއްދަތުގެ ތެރޭގައި ޝަކުވާ ހުށަހެޅުއްވުމުގެ ކަންކަން ކުރިޔަށްގެންދާނެ ގޮތާއި ގުޅޭ އިތުރު މަޢުލޫމާތު ސާފުކުރުމަށް ހައުސިންގ މިނިސްޓްރީގެ ނަންބަރު 4004911 އަދި 4004910 ފޯނަށް ގުޅުއްވައިގެން މަޢުލޫމާތު ސާފުކުރެވޭނެއެވެ.