މާލޭގައި "އީދު ހަވީރު 1446" ގެ ނަމުގައި ބޭއްވުމަށް ހަމަޖެހިފައިވާ ބޮޑު ހަވީރުގެ ތައްޔާރީތަކަށްޓަކައި ސަލްޓަން ޕާކު ވަގުތީގޮތުން ބަންދުކުރުމަށް ސަރުކާރުން ނިންމައިފިއެވެ.

ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީން އިއްޔެ ނެރުނު އިއުލާނެއްގައި ބުނެފައިވާ ގޮތުގައި، މާދަމާއިން ފެށިގެން ފިތުރު އީދު ދުވަހާ ހަމައަށް ސަލްޓަން ޕާކު އާންމުންނަށް ބަންދުކުރެވޭނެއެވެ.

މި ފިޔަވަޅު އަޅަނީ ސަލާމަތީ ބާރުތަކާއި ސަރުކާރު ހިއްސާވާ ކުންފުނިތައް ގުޅިގެން އިންތިޒާމުކުރާ "އީދު ހަވީރު 1446" ގެ ތައްޔާރީތަކަށްޓަކައެވެ.

މި ހަރަކާތް އޮންނާނީ މާލޭ ސަލްޓަން ޕާކުން ފެށިގެން އިސްލާމީ މަރުކަޒު މައިދާނާއި، ޖުމްހޫރީ މައިދާނާއި، ރަސްމީ ބޮޑުފާލަމުގެ ސަރަހައްދު ހިމެނޭ ގޮތަށް ހާއްސަކޮށް ތައްޔާރުކުރެވޭ ބޮޑު ސަރަހައްދެއްގައެވެ.

މިނިސްޓްރީން އިތުރަށް ހާމަކުރި ގޮތުގައި، މި ސަރަހައްދުގައި އީދު ހަވީރަށް ޒިޔާރަތްކުރާ އާއިލާތަކަށް މަޑުކޮށްލައިގެން ތިބެވޭނެ އިންތިޒާމާއި، އެކިއެކި ކުޅިވަރު ހަރަކާތްތަކުގައި ބައިވެރިވުމުގެ ފުރުސަތު ލިބޭނެއެވެ.

މީގެ އިތުރުން، މުނިފޫހިފިލުވުމުގެ ތަފާތު ހަރަކާތްތަކާއި އީދު ހަދިޔާ ދިނުމުގެ ކަންކަންވެސް ކުރިއަށްދާނެއެވެ.

މިނިސްޓްރީން ބުނެފައިވާ ގޮތުގައި "އީދު ހަވީރު 1446" ކުރިއަށްދާނީ ފިތުރު އީދު ދުވަހުގެ ހަވީރު 4:00 އިން 6:00 އަށެވެ.