ކީރިތި ޤުރުއާން އުނގެނި ދީނީ ކަންކަމަށް ލޯބި ކުރާ މުޖުތަމައެއް ބިނާ ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުންގެންދަވާ މަތިވެރި މަސައްކަތް ކާމިޔާބު ވަމުންދާތަން ފެނުމަކީ އުފާވެރި މަންޒަރެއް ކަމަށް ރައީސުލްޖުމްހޫރިއްޔާގެ ނާއިބު އަލްއުސްތާޛު ޙުސައިން މުޙައްމަދު ލަޠީފް މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ޙާފިޡް ކަމުގެ ސަނަދު މިރޭ ހާސިލު ކުރެއްވި 24 ހާފިޒުންނަށް މަރުހަބާ ދަންނަވާ އެކްސްގައި ކުރެއްވި ޕޯސްޓެއްގަ އެވެ.

ނާއިބު ރައީސް ވިދާޅުވީ މިރޭ ފެނިގެން މި ދިޔައީ ދީނީ ކަންކަމަށް އިސްކަންދޭ ޒުވާން ޖީލެއް ދިވެހި ރާއްޖޭގައި ބިނާ ކުރެވެމުންދާ އުފާވެރި މަންޒަރު ކަމަށެވެ.

އެމަނިކުފާނު ވަނީ އިސްލާމްދީނުގެ ޞައްޙަ ޢަޤީދާގެ މަތީގައި އަޅުގަނޑުމެންގެ ހިތްތައް ސާބިތުކުރުމުގެ ހެޔޮ ތައުފީޤު ދެއްވުން އެދި ދުޢާ ކުރައްވާފަ އެވެ.

މިރޭ އޮތް ރަސްމިއްޔާތުގައި ޙާފިޡް ކަމުގެ ސަނަދު ހާސިލު ކުރެއްވި 24 ހާފިޒުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ސަނަދު ދެއްވާފަ އެވެ. މިއީ އެއް އަހަރުތެރޭ އެންމެ ގިނަ ޙާފިޒުން ސަނަދު ހާސިލު ކުރެއްވި އަހަރެވެ. މިދިޔަ ނުވަ މަސްތެރޭ 24 ފަރާތަކުން ސަނަދު ހާސިލުކުރައްވާފައިވާއިރު ސަރުކާރުގެ އަމާޒަކީ އަހަރަކު 100 ޙާފިޒުން އުފެއްދޭ މިންވަރަށް ޤުރުއާން ހިތުން ދަސްކުރުމުގެ މަޝްރޫއު ފުޅާ ކުރެއްވުމެވެ.