ދިވެހި މުޖުތަމަޢަކީ އަދި ހުރިހާ ދިވެހިންނަކީ ދުވަހުގެ ދިރިއުޅުމުގައި ކީރިތި ޤުރުއާނަށް ޢަމަލުކުރާ ބަޔަކަށްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިލްތިމާސްކުރައްވައިފިއެވެ. 

ކީރިތި ޤުރުއާން ހިތުދަސްކުރި ޙާފިޒުން ދަސްވެނިވުން ފާހަގަކުރުމަށް މިރޭ އިސްލާމީ މަރުކަޒުގައި ބޭއްވި ޖަލްސާގައި، އެމަނިކުފާނު ތުއްޕުޅުއިރު ރާއްޖޭގައި ޤުރުއާން ހިތުދަސް ހާފިޒުން މަދުކަން ފާހަގަކުރައްވައި ރައީސް ވިދާޅުވީ އެ ހާލަތު ބަދަލުވީ ރައީސް އަލްއުސްތާޛު މައުމޫން އަބްދުލްގައްޔޫމުގެ ސަރުކާރުން ފެށިގެން އެކި ސަރުކާރުތަކުން ޤުރުއާނަށް އިސްކަންދީގެން ކުރަމުން އައި މަސައްކަތްތަކުގެ ސަބަބުން ކަމަށެވެ. 

އެ މަސައްކަތްތަކުގެ ނަތީޖާއެއްގެ ގޮތުން މިރޭ 24 ހާފިޒުން ދަސްވެނިވެ ހިފްޒުކަމުގެ ސަނަދު ހާސިލުކުރިކަން ފާހަގަކުރައްވަމުން ރައީސް ވިދާޅުވީ ސައްތައިން ސައްތަ މުސްލިމު ގައުމެއްގެ ހައިސިއްޔަތުން ރާއްޖޭގެ އަޒުމާއި އުންމީދު ހުންނަންވީ އެއަށްވުރެ މާ މަތީގައި ކަމަށެވެ. އެގޮތުން އަހަރަކު ހިފްޒުކޮށް ދަސްވެނިވާ ހާފިޒުންގެ އަދަދު މިރޭ ދަސްވެނިވި ހާފިޒުންގެ އަދަދަށްވުރެ އެތައް ގުނައެއް އިތުރުކުރުމަކީ ސަރުކާރުގެ އަޒުމެއްކަމަށާއި، އެކަމުގައި މައިންބަފައިންނާއި ޓީޗަރުންނާ ގުޅިގެން މަސައްކަތްތަކެއް ކުރަންޖެހޭކަމަށް އެމަނިކުފާނު ވިދާޅުވިއެވެ. 

ރައީސް އިތުރަަށް ވިދާޅިވީ ހާފިޒުން އިތުރުކުރާ މަސައްކަތާއި އިސްލާމްދީނަށް ނަސްރު ދިނުމަށް ކޮންމެ މަސައްކަތަކުން ނުކުންނާނީ ހެޔޮ ނަތީޖާ ކަމަށެވެ. އަދި މި ސަރުކާރުން އިސްލާމްދީނަށް ނަސްރު ދިނުމަށްވުރެ އިސްކަންދޭނެ އެހެން ސިޔާސަތެއް ނޯންނާނެ ކަމަށާއި، އިސްލާމްދީނަށް ނަސްރުދިނުމަކީ އެމަނިކުފާނަށް ލިބިވަޑައިގަންނަވާ އެންމެ ބޮޑު ފަޚުރުކަމަށް ވިދާޅުވިއެވެ. 

ކީރިތި ޤުރުއާނަކީ ޢަމަލީ ފޮތެއްކަން ފާހަގަކުރައްވައި ރައީސް ވިދާޅުވީ ތަޖުވީދު މަގުން ރީތިކޮށް ޤުރުއާން ކިޔަވަން އުނގެނުމާއެކު އެ ފޮތަަށް އަމަލުކުރުމަށް އެއަށްވުރެ އިސްކަންދޭންޖެހޭ ކަމަށެވެ. އެގޮތުން ދިރިއުޅުމުގެ ކޮންމެ ވަގުތެއް އަދި ކޮންމެ ދުވަހެއްވެސް ޤުރުއާނާ އެއްގޮތަށް ކުރިއަށްގެންދިއުމުގެ މުހިއްމުކަމުގެ މައްޗަށް އެމަނިކުފާނުގެ ވާހަކަފުޅުގައި އަލިއަަޅުވައިލެއްވިއެވެ. 

ޤުރުއާނަކީ ހަފުލާތަކަށް ޚާއްސަ ފޮތެއް ނޫންކަމަށާއި، މުސްލިމު މުޖުތަމައެއްގެ ހައިސިއްޔަތުން، ކޮންމެ ފަރުދަކުވެސް އެމީހެއްގެ ދުވަހުގެ ދިރިއުޅުމުގައި އަމަލުކުރެވެނީ އަދި އުޅުމާއި ގުޅުންތައް ބައްޓަންކުރެވެނީ ކީރިތި ޤުރުއާނާ އެއްގޮތަށްތޯ ވިސްނައިލަންޖެހޭކަމަށް ވެސް ރައީސް ވިދާޅުވިއެވެ. 

ރައީސް ފާހަގަކުރެއްވީ ރާއްޖެއަކީ ސައްތަައިން ސައްތަ އިސްލާމީ ޤައުމަކަށްވީ ނަމަވެސް މީހުންގެ އަބުރަށް އަރައިގަތުން ފަދަ އިސްލާމްދީން އަދި ކީރިތި ޤުރުއާނުގައި ނަހީކުރައްވާފައިވާކަންކަން ދިވެހި މުޖުތަމަޢުގައި ވަރަށް ބޮޑަށް ފެތުރިފައިވާ ކަމަށެވެ. 

ރާއްޖޭގައި ގެއްލިގެންދާ އިންސާނީ ކަރާމާތް އަނބުރާ އިއާދަކުރެވޭނެ ހަމައެކަނި ގޮތަކީ ކީރިތި ޤުރުއާނަށް އަމަލުކުރުން ކަމުގައި ފާހަގަކުރައްވަމުން ރައީސްވަނީ ނަބަވީ އިރުޝާދުފުޅުގެ އަލީގައި ކޮންމެ މީހަކީވެސް އެމީހެއްގެ ދުލާއި އަތުގެ ނުބައިކަމުން އެހެން މީހުން ސަލާމަތްވެފައިވާ ބައެއްކަން ކަށަަވަރުކުރުމަށް ނަސޭހަތްތެރިވެވަޑައިގެންފައެވެ. 

ކީރިތި ޤުރުއާނުގެ އަލީގައި ކޮންމެ މީހަކުވެސް އެހެނިހެން އިންސާނުންނަށް އިހުތިރާމުކޮށް އެހެން މީހުންގެ ކަރާމާތަށް ގަދަރުކުރަންޖެހޭކަން ފާހަގަކުރައްވަމުން ރައީސް ވިދާޅުވީ އަނެއް އިންސާނާއަކީ ތިމަންނައެކޭ އެއްފަދައިން ކަރާމާތްތެރިކަން ލިބިފައިވާ މީހެއްކަން ކޮންމެ މީހަކުވެސް ގަބޫލުކޮށްގެން ނޫނީ މުޖުތަމައު އިސްލާހުނުވާނެ ކަމަށެވެ.