ޤުރުއާން ހިތުދަސް ކުުރުމުގެ މަޝްރޫޢު ފުޅާކުރެއްވުމަށް ވަރަށް ބޮޑު އިސްކަމެއް ދެއްވާ ކަމަށާއި ސަރުކާރުގެ އަމާޒަކީ ކޮންމެ އަހަރަކު 100 ޙާފިޒުން ދަސްވެނިވާ މިންވަރަށް މި މަޝްރޫޢު ފުޅާކުރެއްވުން ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު މިރޭ ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ "ޚާފިޒުން ދަސްވެނިވުމުގެ ރަސްމިއްޔާތު" ގައި ވާހަކަފުޅު ދައްކަވަމުންނެވެ. މިއީ ކީރިތި ޤުރުއާން ހިތުދަސްކުރާ ހާފިޒުންނަށް، ޙާފިޒުކަމުގެ ސަނަދު އެރުވުމަށް މުޅިން އަލަށް ބާއްވަން ފެށި ރަސްމިއްޔާތެކެވެ.

އިސްލާމީ މަރުކަޒުގައި އޮތް މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޝަހީމް ވިދާޅުވީ މިރެއަކީ ވަރަށް ތާރީޚީ ރެއެއް ކަމަށެވެ. އަދި ކީރިތި ޤުރުއާން ހިތުދަސްކުރާ ހާފިޒުންނަށް، ޙާފިޒުކަމުގެ ސަނަދު އެރުވުމަށް ވަކީން ރަސްމިއްޔާތެއް ބޭއްވުމަކީ ޤުުރުއާނަށް އިސްކަން ދިނުމުގެ ތެރެއިން ރައީސުލްޖުމްހޫރިއްޔާ ނިންމެވި ވަރަށް މުހިންމު ނިންމެވުމެއް ކަމަށެވެ.

މިނިސްޓަރު ވިދާޅުވީ މުޅި ދުނިޔެ ވަނީ ކީރިތި ޤުރުއާނަށް ބޭނުންޖެހިފައި ކަމަށެވެ. އެހެން ކަމުން ޤުރުއާންގެ ޖީލެއް ބިނާކުރުމަށް އަލުން މަސައްކަތް ކުރަން ޖެހިފައިވާ ކަމަށް ވިދާޅުވި އެވެ. އެ މަސައްކަތް އާ ހިތްވަރަކާ އެކު މި ސަރުކާރުން ފައްޓަވާފައިވާކަން މިނިސްޓަރު ފާހަގަ ކުރެއްވި އެވެ.

މިނިސްޓަރު އިތުރަށް ވިދާޅުވީ މިއީ އަހަރެއްގެ ތެރޭގައި އެންމެ ގިނަ ޙާފިޒުން ދަސްވެނިވި އަހަރު ކަމަށެވެ. އަދި ވިދާޅުވީ އަމާޒަކީ ޤުރުއާން ހިތުދަސް ކުުރުމުގެ މަޝްރޫއު އިތުރަށް ފުޅާކުރައްވާ އަހަރަކު 100 ޙާފިޒުން އުފެއްދެވުން ކަމަށެވެ.

"އަޅުގަނޑުމެންގެ އަމާޒަކީ ކޮންމެ އަހަރަކު 100 ޙާފިޒުން ދަސްވެނިވާ މިންވަރަށް މި މަޝްރޫއު ފުޅާކުރުމަށް،" މިނިސްޓަރު ވިދާޅުވި އެވެ.

އެ ގޮތުން އިސްލާމީ މަރުކަޒެއް ޤާއިމުވެފައިވާ ކޮންމެ ރަށެއްގައި ޤުރުއާން ހިތުދަސް ކުުރުމުގެ މަޝްރޫޢު ފުޅާކޮށް ކުރިއަށް ގެންދަވާނެ ކަމަށާ ހުރިހާ ރަށެއްގައި މިސްކިތްތަކުގައި އެ މަޝްރޫޢު ކުރިއަށް ގެންދަވާނެ ކަމަށެވެ. އަދި ކީރިތި ޤުރުއާން ކިޔަވައިދޭ ސެންޓަރުތަކާއި ކިލާސްތަކާއި ޙިފުޒު ކުލާސްތަކަށް ސަރުކާރުން އެހީތެރިވެ ދެއްވާނެ ކަމަށެވެ.

މިނިސްޓަރު ވަނީ އެ މަޝްރޫޢުއަށް ތަނަވަސް ކަމުގެ އަޙުލުވެރީން އެހީތެރިވެ ދެއްވުމަށް އެދިވަޑައިގެންފަ އެވެ.

މިރޭ ސަނަދު ހާސިލު ކުރެއްވި ޙާފިޒުންނާއި މުޚާތަބު ކުރައްވާ ވާހަކަފުޅު ދައްކަވަމުން މިނިސްޓަރު ޝަހީމް ވަނީ ޤުރުޢާން ހިތުދަސް ކުރުމުގެ ފުރުސަތު ލިބުމަކީ މާތްﷲ ދެއްވެވި ވަރަށް ބޮޑު ނިޢުމަތެއް ކަމަށެވެ. އަދި އެއީ އެކަލާނގެ ހޮއްވާވާ އިޚްތިޔާރު ކުރައްވަވާ ވަކި ބަޔަކަށް ދެއްވަވާ ނިޢުމަތެއްކަން ފާހަގަ ކުރައްވާ އެ ނިޢުމަތުގެ ބޭނުން ހެޔޮ ގޮތުގައި ހިއްޕެވުމަށް އިލްތިމާސް ކުރެއްވި އެވެ.